1 Korin 10 - U Bulunagana U Niga

E möa tego hatsunono mena milimiou u kesa

¹ A matsi hahatoulana, alimiou goma solopalemi a ka te butuia turu tuburara i manasa. U köasi tere Sunahan e kopo kap hoboto raien, na nori hoboto i tataala aroho silaia i gusuna u Tasi u Rörö.

² E here nei nori i baptais hobotoia turu köasi na turu tasi bate pala tala uaier tere Mosis.

³ Nori hoboto i nouia tara kannou te lama i Kolö.

⁴ Na nori hoboto i ua hasia turu töa puku u ramun te hala sila naia e Sunahan turu lapo. U lapo teka nonei e Kristo, na e Kristo e la gono has meraien.

⁵ Kaba e Sunahan e raharaha noa hasir u katuun u parpara i gusuren, ba nori te mater ba tuenrei ren e tsihasa raria tara makum a palaka.

⁶ A manka teka e haröto ranei ra tegima mate sil menai ra a manka man omi ti markato has uaien.

⁷ Ara gima hatsunone ii u kesa ti markato uu a palai i taren. U Buku u Göagono e poeiena, “U katuun i gum sil tegi nou uaien na tegi ua uaien bate takei siler tegi hirata uaien.”

⁸ Ara gima tsikolo ii na ra gima lulu tson ii ti markato uu a palai i taren ba u 23,000 turu katuun i taren e mate meier u töa puku u lan.

⁹ Ara gima torohane ii a Tsunono ti markato uu a palai i taren ba u kökötsi e kato hamate raren.

¹⁰ Ara gima ranga homi nai a nikaka i tarara ti markato uu a palai i taren ba angelona tara tou mate e atung hamate raren.

¹¹ A manka hoboto teka e butu sil tegi haröto meraira tegima markato uaira teka. I koloto sileien tego hatuts meraien ra a man markato teka, ara te töatöa noara te ka ria turu tsiktsiki teka te katsin kapa hamanasana a pöata.

¹² A katuun te poeiena e kukute hatagalena a markato a niga ega hanei sil tego kato homi uaien.

¹³ U mamana u torohana te butuna i tamilimiou e roron butu hasna turu katuun hoboto. Kaba e Sunahan a katuun a hihipakoko na nonei ema haniga na noi u torohana te tagala bala na nou a nitagala i tamilimiou. Kaba, e Sunahan e kato bera noi limiou a maroro tego bus ba sila na milimiou u torohana ba limiou te antunan tagala na moien.

¹⁴ A matsi hahikapien i tar, bus halehana ba naiam a markato te hatsunono menari u kesa.

¹⁵ Alia e ranga gia turu katuun u atei, hakats haniga naiam a ka te ranga negu lia.

¹⁶ Uain u göagono te ue rara bara te haniga uara tere Sunahan te gono ranou ra turu rahatsing tere Kristo, na beret te pose rara bate noe ren e gono has ranou ra turu tuenrei tere Kristo.

¹⁷ Ara e nou hoboto ria tara töa beret teka, na ka teka e haharuei nena ara u katuun u parpara e katoeiera a töa hun katuun.

¹⁸ Alimiou go hakats naiam te markato uaier u Jiu. U katuun te nouer a manka te haats ba ner, nori e hamaner e Sunahan te hatsunone ren turu haats.

¹⁹ Alia ema peigi u kesa e manana. Na lia ema pei hasegi a kannou te hala naria turu kesa a ka a kapan.

²⁰ E möa! Alia e poegu a manka te haatse ria tara makumun haats turu tematan e haats uaier turu liliahanei u omi. Nori ema haats uari tere Sunahan. Na lia ema ngilegi tego hatsunono uaiam limiou turu liliahanei u omi.

²¹ Alimiou ema tatei ua mia tara kap tara Tsunono na kap has turu liliahanei u omi, na limiou ema tatei nou mia tara kannou tara Tsunono bate nou has mia tara kannou te hatsunono rari u liliahanei u omi.

²² E hana! Ara ema tula menari a Tsunono tegona hiomor uaien? Ara e tagala bala naren?

²³ “A mamanaka e nigana tegi kato menaien,” kaba ema para nei a ka te tatei hitaguhuna. “A mamanaka e nigana tegi kato menaien,” kaba ema para nei a ka te tatei taguhu rena u katuun.

²⁴ Möa tu hakats sil peiseiam a niniganiga i tamilimiou, hakats sil haseiam a niniganiga tara palair u katuun.

²⁵ Alimiou e tatei nouemiou a haruete te hahol naria tara töana batema rangrangata namien.

²⁶ U Buku u Göagono e poeiena, “A Tsunono te teiena a han i puta na mamanaka te kana i puta.”

²⁷ Temi rangata sile na lö a katuun tema hamane nei e Kristo tegona nou gono menaien lö balö te lam, noui a saha ka te hanoue neien lö. Möa tu rangata sei ni.

^28-29 Kaba te poeiena a katuun, “A kannou teka i haats ba naia turu kesa,” ba lö tema noue mien. Alö toum e poeiem e nigana, kaba nonei a katuun te hateienou lö ena namots poeiena alö e kato homim. Alö goma noueien ba nonei tema hakats homi nanoi lö. Kaba lö e mar hakats toum uamou teka, “E hana balia te kukutegou u ngil tara taina katuun tego agono menai lia a kannou, te peinen, a kannou a omi?”

³⁰ Te haniga sile gula lia a kannou tere Sunahan, e hana ba taina katuun te poeiena, e omina te nou mena gilia a kannou te haniga sile gula lia tere Sunahan?

³¹ Tara pöata te nou mia limiou na te ua mia limiou, na tara mamanaka hoboto te katoe milimiou, alimiou go katoe men tara markato te solosei menari e Sunahan.

³² Alimiou go hakats raiam u Jiu na u katuun tema Jiu ri na u katuun has tere Kristo, ba limiou tema kato homi mia i mataren.

³³ Nonei teka te torohanan markato has uagou lia. Tara mamanaka te katoe gulia, alia e torohanan kato haniga gia i matar u katuun hoboto. Alia ema hakats nagi a ka te niga peisana i tar. E möa. Alia e hakats has negu a ka te nigana i taren. Alia e kato silegu nori egi haniga be Sunahan te lu pouts ranen.