1 Jon 5 - U Bulunagana U Niga

Ara e tagala bala nera a markatona i puta

¹ U katuun hoboto te hamaner e Iesu nonei a Mesaia te hopö kapiin e Sunahan, nori a galapien tere Sunahan. Na katuun te ngileiena e Tamarara e Sunahan, nonei e ngil haseiena a pien tere Sunahan.

² Ara e atei silera ara e ngil koru raiera a galapien tere Sunahan, tara pöata te ngil hase rara e Sunahan bate kukute hanigeiera u raranga i tanen.

³ Te ngil korue rara e Sunahan ba ra te kukute hanigeiera u raranga i tanen. Ba u raranga i tanen tema tatei hala raneira ta nitiama

⁴ Taraha, a galapien hoboto tere Sunahan e antunan tagala salsaluhe baner a markatona i puta. Na nitagala te tagala salsaluhe ba nena a markatona i puta nonei u nihamana i tarara.

⁵ A katuun te hamanena e Iesu nonei a Pien Tson tere Sunahan, nonei lasi a katuun te tagala saluhe banena a markatona i puta.

E Sunahan e hatei nena e Iesu Kristo

⁶ Nonei a katuun teka e Iesu Kristo, ti baptaise ii u ramun. Na u rahatsing i tanen e oloia tara tou mate i tanen. U ramun na u rahatsing i tanen has e hatei hamana nena nonei e Iesu a Pien Tson tere Sunahan. Nu Namnamei tere Sunahan has e hatei hamana nanen, taraha u Namnamei tere Sunahan e manana bate ranga hamanana.

⁷ Nori a topisa i habulungana hobotein u raranga i tanen,

⁸ u Namnamei, na u ramun, na u rahatsing i tanen. A topisa ka teka i haniga hoboto.

⁹ Ara e roron hamaneiera a ka te hatei ranei ra a katuun. Na ragi hamana hasi a ka te hatei ranei ra e Sunahan, taraha u raranga i tanen e mana koruna. Nonei e hatei nena a Pien Tson i tanen.

¹⁰ A katuun te hamanana tara Pien Tson tere Sunahan e atei haniga silena te mana uana u raranga teka. Kaba a katuun te hahamana nena e Sunahan nonei a katuun te poeiena, “E Sunahan a katuun a gamogamo.” Taraha, nonei e hahamana nena a ka te ranga benei e Sunahan a Pien Tson i tanen.

¹¹ Na nonei a ka teka te hatei raneira e Sunahan: e Sunahan e hala raira a nitöatöa te ka nitöana, na nitöatöa teka e kana tara Pien Tson i tanen.

¹² A katuun te ka gono mena a Pien Tson tere Sunahan nonei e ka has mena a nitöatöa teka. Na katuun tema ka gono menei a Pien Tson tere Sunahan nonei ema ka has menei a nitöatöa teka.

A nitöatöa te ka nitöana

¹³ Alia e koloto menagi a manka teka i tamilimiou u katuun te hamana mia tara Pien Tson tere Sunahan, taraha alia e ngilegu alimiou ego atei haniga sileiam te ka mena milimiou a nitöatöa te ka nitöana.

¹⁴ Ara egima matoute ii e Sunahan, taraha, tara pöata te singo sile riara ta ka i tanen nonei e hengo ranoura.

¹⁵ Ara e atei silera e Sunahan e hengo silena mamanaka te singo sile rara, na nonei e hala nanou a manka te singo sile rara.

¹⁶ Te tare mialö a töa katuun tara pala te hamana ria tere Iesu e kato homina ba limiou te singo silemen tere Sunahan, be Sunahan te hale noien a nitöatöa. Kaba te kato homi koru nen bate laba nena a nitöatöa tere Sunahan, alia ema ranga nagi alimiou ego singo sileiam a katuun teka tere Sunahan.

¹⁷ A mamana markato a omi hoboto e omina. Kaba palaina markato a omi ema tatei luba nanei a katuun a nitöatöa tere Sunahan.

¹⁸ Ara e atei silera a katuun te pien uana tere Sunahan ema tatei kato homi hiton nei, taraha a Pien Tson tere Sunahan e pepeito kap nitöa nanen, na e Satan ema antunan kato homi naneien.

¹⁹ Ara e atei silera ara galapien tere Sunahan na mamana han hoboto i puta e kana tara nipepeito tere Satan.

²⁰ Ara e atei silera a Pien Tson tere Sunahan e la silema i puta tegomi hala meraien ra a niatei tegi tatei atei sil menai ra e Sunahan hamana. Ara e ka gono mera e Sunahan hamana na e Iesu Kristo a Pien Tson i tanen. Nonei a Sunahan hamana teka, na a katuun te pala uana tara Pien Tson i tanen e ka mena a nitöatöa te ka nitöana.

²¹ A matsi galapien i tar, alimiou ego ka halehana ba naiam a man got gamogamo. Alia e Jon