1 Jon 4 - U Bulunagana U Niga

A ka te manana na ka te gamona

¹ A man hahikapien, alimiou goma hengoemi u raranga turu katuun hoboto te poeier nori e ka mer u Namnamei tere Sunahan. Alimiou go tara haniga ramen tego haranga meraien e Sunahan. Taraha, a parpara koru a propet a gamogamo te ka ria tara mamana han hoboto.

² Nonei teka temar tara marei menari u Namnamei tere Sunahan: u katuun te poeier e Iesu Kristo e butun Katunuma, e Sunahan te haranga ranen.

³ Na u katuun te holis ner te butun katuun uama e Iesu, ema Sunahan nei te haranga ranen. A katuun te korupakö nena e Kristo te habutena u mar ranga teka. Alimiou u hengo mam naiam tega butu uu raranga teka, na nonei e butu hakapaia turu katunura i puta.

⁴ A man hahikapien i tar, alimiou a galapien tere Sunahan na limiou e tagala bala ramiou u propet u gamogamo teka. Taraha, u Namnamei te kana i tamilimiou e pan bala nena u liliahanei te karia turu katunura i puta tema katuun uari tere Sunahan.

⁵ Nori u katunura i puta na u ranga i taren u rarangana i puta, na u katunura i puta e hahengo has uaier i taren.

⁶ Kaba ara u katuun tere Sunahan. Na u katuun te atei siler e Sunahan nori e hahengo rima i tarara. Na a katuun tema pien uanei tere Sunahan ema hahengo neia i tarara. Nonei teka temar atei sil menaroira u Namnamei u mana na u namnamei u gamo.

E Sunahan a mouna u ngilngil hamana

⁷ A matsi hahikapien, aragi ngil korui a tana katuun, taraha u ngilngil hamana e la nama tere Sunahan. Na katuun te ngil hamanena a tana katuun e pala uana tere Sunahan, bate atei silena e Sunahan.

⁸ A katuun tema ngilenei a tana katuun ema atei sil hasenei e Sunahan, taraha e Sunahan a mouna u ngilngil u mana.

⁹ E Sunahan e ngil koru raioura me haröto nena te taatagi koru meraien ra tara pöata te hala namen a töa koru a Pien Tson i tanen i puta. Nonei e la silema tegi lu menai ra a nitöatöa i tanen.

¹⁰ A mouna u ngilngil hamana e mar butu uu teka: ara tima ngil mame ii e Sunahan. E möa. E Sunahan te ngil mam raioura ba nonei e taatagi ranoura me hala nenama a Pien Tson i tanen, tegomi lupouts meraien ra tara man markato a man omi i tarara.

¹¹ A matsi hahikapien, temar ngil koru meraira e Sunahan, nonei tegi mar ngil koru has menaira a tana katuun.

¹² Emoa ta töa ta katuun tego tara noabi e Sunahan. Kaba te ngil korue rara a tana katuun, be Sunahan te kana i tarara. Ba u ngilngil i tanen te butu haniga nitöa noa i tarara.

¹³ Nonei teka temar atei sil menaroira te ka uana e Sunahan i tarara, na te ka has uarara i tanen, taraha nonei e hala raira u Namnamei i tanen.

¹⁴ Na ra i tara hakapa, e Tamarara e hala sile mei a Pien Tson i tanen tegomi haka haniga meraien u katunura i puta. Alam e hatei hamana koru namen.

¹⁵ U katuun te poeier e Iesu a Pien Tson tere Sunahan, nori e pala uaier tere Sunahan na e Sunahan e pala has uana i taren.

¹⁶ Ara e atei sil talera, na e hamanera u ngilngil tere Sunahan i tarara. E Sunahan a mouna u ngilngil hamana. Na u katuun te ngil nitöa raier a palair u katuun e pala uaier tere Sunahan na e Sunahan e pala has uana i taren.

¹⁷ Tema matout reiara romana tara pöata te butuna u kout tere Sunahan, ba ra te atei silerou u ngilngil i tarara e butu haniga nitöana. Taraha, a nikaka i tarara i puta teka e markato has uana tara nikaka tere Iesu.

¹⁸ A katuun te ngil korueiena a tana katuun ema antunan matout nei. Na katuun te ngil korueiena e Sunahan ema matoute neien. Taraha, a katuun te matoutuna e hakats nena a nihahuna. Na katuun te matoutena a tana katuun, u ngilngil i tanen ema tangoho noa nei.

¹⁹ Ara e ngilera e Sunahan, taraha nonei te ngil mam raioura.

²⁰ Te rangana katuun bate poeiena, “Alia e ngil korueieg e Sunahan,” bate pakörena u toulanen tsi u hahinanen, nonei a katuun a gamogamo. Taraha, a katuun te tarena a man toulanen batema ngil raneien, nonei ema antunan ngil has nanei e Sunahan.

²¹ Na u raranga ti lueiara i tanen e kato uana teka: esi a katuun te ngilena e Sunahan ega ngil hasi a man hahatoulana i tanen.