1 Jon 3 - U Bulunagana U Niga

A galapien tere Sunahan

¹ Tara, e Tamarara e Sunahan e ngil koru ranoura, bate ngö raneira a galapien i tanen. Na u mana koru, ara a galapien hamana koru tere Sunahan. U katunura i puta tema pala uari tere Sunahan ema atei sil has rarira, taraha nori ema atei sil haserien.

² A man hahikapien, ara a galapien hamanasa tala tere Sunahan. Nonei ema haröto noa raneira tegina markato uu ra romana. Kaba ara e atei silera a ka teka: pöata te butu halesala nama romana e Kristo bara te tare rou a peisanen bate here hase roien.

³ U katuun hoboto te hahanei siler e Kristo bate sasaalar, nori e markato hagogoso has uaier temar gogoso has uana e Kristo.

⁴ U katuun hoboto te kato homir e tori tsuga ner a Lo tere Sunahan, te markato has uana a markato a omi.

⁵ Alimiou e atei silemiou e Kristo e butu silema tegomi luba menai a man markato a man omi. Na nonei ema ka menei ta markato ta omi.

⁶ A katuun te ka gono mena e Kristo ema tatei kato nitöa nanei a markato a omi. Na katuun te kato nitöa nena a markato a omi ema atei sile neien, na ena mala tara hase neien.

⁷ A matsi galapien, te katsin gamo rana limiou ta katuun, alimiou goma hamane mien. A katuun te kato haniga nitöana, nonei a katuun a matskö, te markato has uana e Kristo.

⁸ A katuun te kato homi nitöana nonei a pien tere Satan, taraha e Satan e solon kato homi i mam noahas batemi antunana i romana. Na a Pien Tson tere Sunahan e butu silema tegomi kato hatia menaien a toukui tere Satan.

⁹ A katuun te pala uana tere Sunahan ema tatei kato homi nei, taraha a nitöatöa tere Sunahan e kana i tanen. Na katuun te tuhanama tere Sunahan ema antunan kato homi nei, taraha nonei a pien i tanen.

¹⁰ A ka teka e haröto nena a katuun te pien uana tere Sunahan na katuun te pala uana tere Satan: a katuun tema kato haniga nei ema pien uanei tere Sunahan. Na katuun tema ngile nei a hahatoulana i tanen ema pala has uanei tere Sunahan.

Aragi hiangilngil

¹¹ Nonei u raranga teka tu hengo mam naiam limiou: aragi ngili a tabina katuun.

¹² Ara gima here ii e Kein nonei e pala uu tere Satan, ba nonei e atung hamateiena e toulanen e Ebol. Nonei e atung meien a markato i tanen e omi ba markato tere Ebol te matsköna.

¹³ A man munmun toulana, ma asingoto nami tegi pakö merai limiou u katunura i puta.

¹⁴ Kaba ara e atei sil talera ara i laba nema a tou mate me aroho uarima tara nitöatöa. Taraha ara e ngil korueiera a man hahatoulana i tarara, a pal katuun te hamana ria tere Iesu. A katuun tema ngile nei e toulanen e ka noana tara tou mate. Nonei e ka halhal ba nena a nitöatöa tere Sunahan bate here nei a katuun a mate.

¹⁵ A katuun te paköeiena u toulanen e here nei a katuun a hihipuli. Na alimiou e atei silemiou a nitöatöa te ka nitöana ema ka neia tara katuun a hihipuli.

¹⁶ Ara e mar atei sil mena rei u ngilngil hamana teka: e Kristo ema peitsnai a nitöatöa i tanen, ba nonei e mate sil ranoura. Na ara gima peits has nai a nitöatöa i tarara, kaba aragi markato has uu iesana bara te mate sil hasera a man hahatoulana i tarara, a pala te hamana ria tere Iesu.

¹⁷ Kaba a katuun te ka mena a mamanaka bate atei sil hasena e toulanen e moana ta kannou ba nonei tema taatagi naneien, ga ime temar ngil mena neien e Sunahan? Ge möa tala.

¹⁸ A matsi galapien i tar, ara gima ranga tuun nai te ngil merarira u toularara. E möa. Aragi ngil hamana raien bate taguhu raren.

Ara gima matoute ii e Sunahan

¹⁹ Na te markato tala uarara teka, bara te atei silera ara u katunura turu ranga u mana. Kaba pöata te hakats tuun rara bate poeiera, “Alia e kato homigu,” aragi hakats kapiin a ka teka: e Sunahan e roron taatagi rena u katuun na nonei e atei silena a mamanaka hoboto.

²⁰ Te markato uarara teka ba torirara te tatei tagolala poutsuna i matana e Sunahan.

^21-22 A man hahikapien, tema kout raneira a torirara, ba ra tema matoutun tuol roi i matana e Sunahan bate luera a ka te singo sile rara. Taraha, ara e hengo hanigeiera u raranga i tanen bate katoera a manka te kato hasasaale nen.

²³ Na u raranga tere Sunahan teka: aragi hamanaia tere Iesu Kristo a Pien Tson i tanen ba ra te hiangilngilira, nonei teka u raranga tere Sunahan.

²⁴ A katuun te kukute hanigeiena u raranga tere Sunahan, nonei e ka gono menou e Sunahan, be Sunahan te ka has noa i tanen. U Namnamei u Göagono te halani e Sunahan, nonei te haröto renara e Sunahan e ka gono mera noura.