1 Jon 2 - U Bulunagana U Niga

E Iesu e ranga bera noura

¹ A matsi galapien koru i tar, alia e koloto menagi a man raranga teka i tamilimiou, taraha alia e ngilin taguhu ragou limiou ba limiou tema tatei kato homi mi. Kaba te kato homina a töa katuun, ara e kamera a katuun te matsköna, e Iesu Kristo te ranga bera noura tere Tamarara.

² Taraha, e Iesu te sakahis raioura tere Sunahan tara pöata te mateien. Nonei ema kato pepeisa beraira a ka teka. Kaba nonei e kato mei a ka teka tega taguhu meraien u katuun hoboto tara mamana han i puta.

³ Te hengo hanige riara u raranga tere Sunahan, ara e atei silera ara u katuun hamana i tanen.

⁴ Na te poeiena a katuun, “Alia e katuun hamana uagu tere Sunahan,” kaba nonei ema hengoe neien, nonei a katuun a gamogamo na u raranga u mana ema ka neia i torinen.

⁵ Kaba a katuun te hengo hanigeiena u raranga tere Sunahan, nonei a katuun te ngil hamana korueiena e Sunahan. Na katuun te ngilin atei sil korueiena tega ka haniga gono menaien e Sunahan, nonei e tatei hengoena u raranga i tanen.

⁶ Esi a katuun te poeiena nonei e ka gono mena e Sunahan, a katuun teka ega markato has uu te markato uu e Iesu.

U raranga u tsimus tere Sunahan

⁷ A man hahikapien, alia ema koloto nagi tu raranga tu tsimus i tamilimiou. E möa. Alia e koloto negu u rarangana i manasa tu hengo naiam limiou tara pöata tu hengo mam namia limiou e Iesu. U rarangana i manasa teka nonei u raranga tu hengo hakapa naiam limiou.

⁸ Kaba u raranga te koloto mena gilia i tamilimiou e tsimus hasina. Na u katuun i tari te markato uu e Iesu na te markato has uami limiou ba nori te atei siler te mana uana u raranga teka. Taraha, u kuhil e tia hamanasana ba u ualesala hamana te butuna.

⁹ A katuun te poeiena nonei e kana turu ualesala, kaba e paköeiena a hahatoulana i tanen, nonei e ka noa hasna turu kuhil.

¹⁰ A katuun te ngil hamana korueiena e toulanen e kana turu ualesala, na nonei e möa ta ka tega kato homieien.

¹¹ Kaba a katuun te paköeiena a hahatoulana i tanen e kana turu kuhil. Nonei e here nei a katuun te silana tara maroro a kuhil. Na nonei ema atei sile nei ime te la uanen, taraha u kuhil e hasaheiena a matanen.

¹² A matsi galapien alia e koloto uagu i tamilimiou, taraha e Iesu e luba hakapein a man markato a man omi i tamilimiou.

¹³ Na lia e koloto uagu i tamilimiou, a pal kapan, taraha alimiou e atei silemiou e Iesu te kaia i mam te habuteia e Sunahan u kolö na u puta. Na lia e koloto uagu i tamilimiou, a pal hitots, taraha alimiou u la salsaluhe hakapeiam e Satan.

¹⁴ Alia e koloto uagu i tamilimiou, a matsi galapien, taraha alimiou e atei silemiou e Tamarara. Na lia e koloto has uagu i tamilimiou, a pal kapan, taraha alimiou e atei silemiou e Iesu e kaia i mam te habuteia e Sunahan u kolö na u puta. Na lia e koloto has uagu i tamilimiou, a pal hitots, taraha alimiou e tagala miou na limiou e pile hakarapoto namiou u raranga tere Sunahan i torimilimiou, na limiou u la salsaluhe hakapeiam e Satan.

¹⁵ Alimiou goma ngilemi a markatona i puta. Na limiou goma ngil hasemi a manka te butu gono mena a markatona i puta. A katuun te ngileiena a markatona i puta ema ngile nei e Tamarara.

¹⁶ Nori u katuun teka te ngileier a markatona i puta: a katuun te matesilena a manka man omi, a katuun te ngil korueiena tega tara menaien a manka man omi, a katuun te saala koruena a peisanen. A man ngilngil hoboton töa teka e butu nama tara markatona i puta. E ma butu nameia tere Tamarara.

¹⁷ A markato na u ngilngil u omina i puta e tia hobotona romana, kaba a katuun te kukuteiena u ngilngil tere Sunahan e töatöa nitöana romana.

A katuun te korupakö nena e Kristo

¹⁸ A matsi galapien, nonei i romana a kapakapana pöata. Alimiou u hengo noahas neiam tega butu uama romana a ka te korupaköni e Kristo. Na u katuun u parpara te korupakö ner e Kristo i butu hakapa. A ka teka e haröto raneira a pöata i romana a kapakapana pöata.

¹⁹ U katuun teka i laba hakapa raioura, taraha nori ima katuun hamana uai tara hun katuun i tarara. Sanena nori ti katuun uu i tarara, nori sanena e ka haniga gono meraioura. Kaba pöata ti laba raienra, ba u katuun e atei sil taleier nori hoboton töa ema katuun uari tara hun katuun i tarara.

²⁰ Kaba limiou i lu hakapaneiam u Namnamei u Göagono tere Iesu Kristo, na limiou hoboto e kame miou a niatei.

²¹ Alia ema poeiegi alimiou ema atei silemi a manka te manana, ba lia te koloto uagu i tamilimiou. E möa. Alia e koloto uagu i tamilimiou taraha alimiou e atei silemiou a manka te manana, na limiou e atei sil hasemiou e möa ta töa ta ka ta gamo tega tatei butuma tara manka te manana.

²² Na a katuun te poeiena e Iesu ema Kristo nei te hopö kapiin e Sunahan, nonei a katuun a gamogamo koru. A katuun te tori tsuga nena e Tamarara na e Iesu a Pien Tson i tanen, nonei a katuun teka te korupakö nena e Kristo.

²³ A katuun te tori tsuga nena a Pien Tson tere Sunahan ema katuun uanei tere Tamarara. Kaba a katuun te hatei nena e Iesu nonei a Pien Tson tere Sunahan, nonei e pala uana tere Tamarara.

²⁴ Alimiou go pile hakarapoto naiam u raranga tu hengo mam naiam limiou. Na te ka noana u raranga tu hengo mam naiam limiou i torimilimiou, ba limiou te ka gono nitöa memou a Pien Tson tere Sunahan, na e Sunahan e Tamarara.

²⁵ Na nonei a ka te ranga hakapein e Kristo, tego hala rien ra, nonei a nitöatöa te ka nitöana.

²⁶ Alia e koloto megi a ka teka, taraha a palair u katuun ena mots gamo rariou limiou.

²⁷ Kaba u Namnamei u Göagono ti lu mameiam limiou tere Kristo, nonei e ka gono mera noulimiou. Na limiou goma tokumi te möa uana ta tson hihatuts i tamilimiou. Taraha, u Namnamei tere Sunahan e hatuts ranei limiou a mamanaka. Na manka te hihatuts nanen e manana. E möa tego gamouaien. Na limiou ego ka nitöa mia tere Kristo temar ranga uu Namnamei tere Sunahan.

²⁸ A matsi galapien, ka gono nitöa meiam e Kristo. Taraha, a pöata tena la namen romana, aragi tuol hakarapoto bara tema tatei matsingolo roi tena tuol roua ra i matanen.

²⁹ Na te atei silemia limiou e Iesu nonei a katuun a matskö, ga lö e atei sil talem a katuun te kato hanigana nonei a pien tere Sunahan.