Yohane 9 - Lufingano Lupya

Umubofu ilava

¹ Yesu pealutilige amuwene umunu umubofu uluhuma pakwegalwa.

² Avanyigendo vakwe vamuwusise, “Labi! Yenani yeapigite inzanangifu sunge uyu egalwe mubofu yumwene apangi avegasi vakwe?”

³ Neke Yesu avapitule, “Nambi uyu siapigiti nzanangifu, nambi avegasi vakwe. Lwave de sambi uludali lwa Nguluvi lwelelulwe lwipiga ikipigo mulumwene.

⁴ Lutuvaje ukupiga ifipigo fyakwe umwene yeandetite wepe munyi pakuva ikilo kikusa pe umunu sahwaniti ukupiga ikipigo.

⁵ Ulusika lwengali mung'i, nene ndilung'ali lwa mung'i.”

⁶ Peyealonzile iso, afunyite amati pasi swe iwuyapa lidope ndawe amubakige umubofu mumiho

⁷ neke amulongele, “Bite ukakalave kwilamba ilya ku Siloamu.” (ilitawa kwekutigila, “Yeatumitwe.”). Ndawe abitige kukukalava, ipiluka we ilava.

⁸ Swe, avanyafivawo vakwe na vala vevamuwonige mumikaa akwisukilisa vatige, “Mbi uyu si yuyula yeake mumikaa yeakateng'emalige akwisukilisa?”

⁹ Avamwi vatige, “Yumwene!” Avangi vatige, “Nda, neke ulwene vihwana nave!” Neke umwene yee mubofu atigile, “Yunene!”

¹⁰ Swe vakumuwusa, “Mbi luve kinyandawuli sunge amiho gako galave?”

¹¹ Ndawe avapitulige, “Umunu yula yeitambulwa Yesu akawuyepe ilidope, swe akumbaka mumiho na ukunigila: ‘Bite ukakalave kwilamba lya ku Siloamu.’ Swe ndawe ndabitige ukukalava swe ndilava.”

¹² Avene swe vitigila umwene, “Alikwi?” Ndawe atigilige, “Haha! Manyi nene sindina nzeli!”.

Avafalisayo visaka valukagule weimise Yesu ukumuponia

¹³ Sweno ndawe vamusindikige umunu yula yeemubofu Avafalisayo.

¹⁴ Nacho che ikimunyi cha isabato, Yesu peawuyepe ilidope nu kuwuponia uwubofu.

¹⁵ Ndawe Avafalisayo vamuwusige kangi umunu uyo ulwa, “Lukave kinyandawuli sunge ulave?” Neke avalongele, “Akambakite ilidope swe nzamwilava.”

¹⁶ Avamwi va Avafalisayo vatige, “Umunu uyo sahumiti kwa Nguluvi, pakuva siakwinatila ululagilo lwa isabato.” Avangi vitigile, “Luhwana ndawuli umunu umunyanzanangifu ukupiga ifilagilo ndawe ifi?” Swe visutana vavene ng'ani.

¹⁷ Ndawe vamuwusige kangi yula yeemubofu, “Pakuva yakuponise amiho lino veve ukumutigila ndawuli?” Swe umwene akuvatigila uyu, “Muvisi.”

¹⁸ Neke avavina va Avayudaya sivafuuvitwi ukuta umunu uyo ali mubofu pamwandi na ulwa ino ilava, mbaka pevavakemelye avegasi vakwe,

¹⁹ swe vakuvawusa avegasi iwo, “Ngali uyu ye mwanenyu? Ye nyenye mwitigila egilwe mubofu? Mbino alafile kinyandawuli?”

²⁰ Avegasi vakwe vavapitule ukutigila, “Ena tukulukagula ulwa uyu ye mwanetu, ulwa egilwe mubofu.

²¹ Neke ulwa alafile kinyandawuli, ulo hwehwe situluseli, kangi na yula yeamuponise alave situmuseli. Mumuwusage yumwene pakuva uyo munu muvina ilongela.”

²² Avegasi vakwe valonzile ndahihyo pakuva vali na muhwehwe vawogopige avavina va Avayudaya ulwa yeveviyidikise ukuta umunu yeamwidikila Yesu ulwa ye Kilisito uyo adagwa ahege mu sinagogi.

²³ Nambi lwelwene ulwalesile avegasi vatigile, “Umwene munu muvina mumuwuse!”

²⁴ Swe vakumukemela kangi uyo yeemubofu vakumutigila, “Longele mumwene we ukumogopa Nguluvi! Hwehwe twitigila ukuta umunu uyu munyanzanangifu.”

²⁵ Umunu yula apitwe akuvatigila, “Wone umwene munyanzanangifu nene singulukagula. Neke ulwene kinu kimwi chengukikagula ukuta, “Nge ndimubofu lino ndilava.”

²⁶ Swe vakumuwusa, “Akakupije kiki? Akapigite kinyandawuli sunge ulave?”

²⁷ Umunu uyo avapitwe, “Yendivalonje nanye simwiwenda ukupulika; mbi ndawuli pemumbusaga mupulike kangi? Ngali nanye mukwenda muve vanyigendo vakwe?”

²⁸ Neke avene vaginage ukumuliga vitigila, “Veve ye wimunyigendo vakwe; hwehwe twivanyigendo va Musa.

²⁹ Hwehwe tukulukagula ulwa Nguluvi, alonzile na Musa, neke umunu uyu situkumukagula kweihuma!”

³⁰ Nave ndawe avapitulige, “Ulukani ulu lwa king'ulo! Nyenye simukukagula kweihuma neke ulwene nene amonise amiho ndilava.

³¹ Tukulukagula ukuta Nguluvi sakuvapulika avanu avanyanzanangifu, akumupulika hela umunu munyachoga na kukwisa isa uwende wakwe.

³² Uluhuma pamuvango silwelulapulisa ulwa umunu amuponise alave umubofu uluhuma pakwegalwa.

³³ Wone umunu uyo ake sahumiti kwa Nguluvi, sakeahwana ukupiga kinu!”

³⁴ Neke avene vapitule, “Neke veve, yewegalilwe munzanangifu. Uhwana ndawuli ukutwigisa hwehwe?” Swe ndawe vamudagige ahume mu sinagogi.

Uwubofu wa munumbula

³⁵ Yesu peapulike ulwa yevevamudasile mu sinagogi, nave ave akumuwona amutige, “Ngali Veve ukumufuuwa umwana va umunu?”

³⁶ Umunu uyo amutige, “Mulugu ndongele umwene ye nani, sambi ndimufuuwe!”

³⁷ Yesu amulongele umunu uyo, “Ye umuwene, na uyo yeilongana na veve lino ye mwene.”

³⁸ Swe umunu uyo atige, “Ndifuuwa Mutwa!” Swe akumusunyalila Yesu.

³⁹ Yesu swe itigila, “Nene ngasile mung'i umu kwa luhigilo, vesivilava sambi valave na avilava vabofule.”

⁴⁰ Avamwi va Avafalisayo avepamwi nave swe vapulike iso, vakumuwusa, “Ngali nayi hwehwe nahwe twivabofu?”

⁴¹ Nave Yesu avatigile, “Wone muvelage mwivabofu, simuke muva mwivananzi. Neke lino nyenye mwakwitigila: ‘Hwehwe twilava’, na ulo lwelwene ulwilagila ulwa pemwivananzi na kulino.”