Yohane 8 - Lufingano Lupya

Umung'inetu yeibatike muwugoni

¹ [Neke Yesu abite kukidunda icha imiseituni.

² Pamilawu hilo pekuche ahele kangi mu tembeli. Swe avanu mbevali vibita kulumwene, ndawe ivanga ateng'emalige ivanga ukuvigisa.

³ Avigisi va indagilo na Avafalisayo vamuletye umung'inetu yealibatike muwugoni, nu kumuvika pagatinagati pavanu.

⁴ Neke vamulongele, “Mwigisi! Umung'inetu uyu ibatike pake muwugoni.

⁵ Ino mundagilo sa Musa atulaje ukuvakinya na maganga avindawe iva. Ino veve witigila ndawuli?”

⁶ Nawo valongige ulo we vakumugela sambi vave na ululongwa lwa ukumutosekesa. Neke Yesu agondime akwandika pasi na ichala chakwe.

⁷ Nawo pevagina ukumuwusa imite nu kuvalongela, “Umunu umugaya inzanangifu mwanyenye yeatalage ukumukinya ni liganga.”

⁸ Swe igondama kangi akwandika pasi na ichala chakwe.

⁹ Nawo pevapulike isi, ndawe vahegige yumwi yumwi ukuvangila avagogolo, mbaka pevisila mbevali swe isigala Yesu na umung'inetu yeeimile pagatinagati iyena.

¹⁰ Yesu ave akwima amuwusise atigile, “Ng'inetu valikwi avanu vala? Asukuli yeakuhigite ulwa wimwananzi?” Swe akumulongela asukuli na yumwi Mulugu.

¹¹ Neke Yesu amulongele, “Nayi nene singukuhiga. Wibitilage; neke uluhuma lino ulapiga inzanangifu kangi.”]

Yesu lwe lung'ali lwa ing'i

¹² Ndawe Yesu avalongelige itigila, “Nene ye nene nde lung'ali lwa ing'i. Umwene yeakufwata nene sagenda mulwisa nda ava na ulung'ali lwa uwumi.”

¹³ Swe Avafalisayo vakumulongela, “Veve ukwiyolelela wiyena uwolelesi wako si wanachene.”

¹⁴ Yesu apitwe na kuvalongela, “Nene naluve wengwiyolelela ndiyena uwolelesi wangu we wanachene pakuva ngukukagula kwendahumile na kwendibita. Neke nyenye simukukukagula kwendahumile nambi kwendibita.

¹⁵ Nyenye mwamwihiga mukwimila amahosa ga avanu pemwihiga, neke nene sindihigagi munu.

¹⁶ Nambi ndihiga, ndihigilaga munachene, pakuva nene sindiyena nda ndilipamwi na Dada yeanumite nene.

¹⁷ Kangi nzandike mululagilo lwenyu ulwa uwolelesi wa avanu avavili wawiva wanachene.

¹⁸ Nene ye nene yengwiyolelela ndiyena nave Dada yeanumite akunzolelela.”

¹⁹ Ndawe vamuwusige, “Umwene Udado alikwi?” Yesu avapitwe, “Nene simunzeli nambi nayi Dada simumuseli muke muve munzele nene muke muva mumusele nayi Dada vangu.”

²⁰ Ing'ani iso alonzile peakwigisa mu tembeli, peali pakibogonyela pevavikige amagobole. Na siekwali munu yeamwibete pakuva ikivalilo chakwe sichekilafika.

kwendibita nene nyenye simusa nda

²¹ Kangi swe akuvalongela, “Nene ndihega, nanye musaka, nanye samufwa munzanangifu senyu. Nene kwendibita nyenye simuhwaniti muse.”

²² Swe Avayudaya vitigila, “Ndawuli iwulaga? Pe itigila: ‘Nene kwendibita nyenye simuhwaniti muse?’”

²³ Neke avalongele, “Nyenye mwahumile baha pasi nene ndahumite kuchanya. Nyenye mwiva mung'i iyi nene sindiva mung'i iyi.

²⁴ Nambi ndivalonje ulwa samufwa munzanangifu senyu; pesi mwifuuwa ulwa ‘Nene ye nene’ mufwa munzanangifu senyu.”

²⁵ Swe vakumutigila, “Winani veve?” Neke Yesu atigile, “Lula lwendavalonje uluhuma pamwandi!

²⁶ Ndinaso nzolofu isa ukuvalongela nu kuvahiga. Neke umwene yeanumite vanachene; nane sendapulike hela kulumwene siso senguyilongela ing'i.”

²⁷ Nawo Sivalukagwi ulwa avalongelige ulwa udade.

²⁸ Swe Yesu akuvalongela, “Mbaka pemumutumbike Umwana va Umunu ipo pesamung'agulila ukuta, ‘Nene ye nene’, na kangi ulwa singwivangila ukupiga nambi lukani muludali lwangu, pesi ulwa ndilonga sisila hela sendimwigise na Dada.

²⁹ Nave yeanumite alipamwi na nene; siakundeka ndiyena nda, pakuva nene ndipigaga mbepali sila isikumunogela.”

³⁰ Nave pealongige iso avanu wolofu vamufuuvitwe.

Inachene yivavika muwutemapenyu

³¹ Neke Yesu avalongele Avayudaya avevamufuuvitwe, “Nyenye Wone mwinatile ulukani lwangu muva nachene vanyigendo vangu.

³² Kangi muyikagula inachene, na ulwa nachene iyo yivavika muwutemapenyu.”

³³ Neke vamupitule, “Hwehwe twihuma mumbegalo ya Abulahamu, na sitwetulava vanyawingi ulusika lwelweluvesaga. Ino wilonga ndawuli ulwa, ‘Muva mwivatemapenyu.’”

³⁴ Yesu avapitwe, “Nachene nguvalongela, yeyeapigaga inzanangifu munyawingi va inzanangifu.

³⁵ Umunyawingi siakwikalagi mukaye mbepali, neke umwana uyo yakwikalaga mukaye mbepali.

³⁶ Ino wone umwana avavike mu wutemapenyu, ipo nachene muva mwivatemapenyu.

³⁷ Ngulukagula ukuta nyenye mwimbegalo ya Abulahamu. Neke ulwene, mwisaka ukumbulaga pakuva simukulwidikila ulukani lwangu.

³⁸ Nene ndilonga sendasiwene kwa Dada, neke nyenye mwipiga sila semwapulike ku Dadenyu.”

³⁹ Swe vakumupitula vitigila, “Hwehwe Udadetu ye Abulahamu!” Ndawe Yesu avalongelige, “Muke muve mwivana va Abulahamu, muke mupiga ifipigo fyeapigige Abulahamu.

⁴⁰ Ino nene nguvalongela inachene yandayipulike kwa Nguluvi, nambi ndahihyo mwisaka ukumbulaga. Abulahamu sapigiti ndahihyo.

⁴¹ Nyenye mwipigaga ifipigo fifila fyapigige udadenyu.” Pepene pevamulonje ulwa, “Hwehwe sitwivasavahele nda, hwehwe twina Dadetu yumwi swe, Nguluvi.”

⁴² Neke Yesu avalongele, “Wone ake ave Nguluvi ye Dadenyu muke munzenda nene, pakuva nene ndahumite kwa Nguluvi nane swe ngusa baha. Na sindiyusi kwa uludali lwangu, pesi lwa umwene yeandetite.

⁴³ Mbino ndawuli simukusikagula iso sendilonga? Ndita wanda pakuva simwamwiwenda ukulupulikisa ulukani lwangu.

⁴⁴ Nyenye mwivana va Udadenyu Setani, na uwudobokesi wa udadenyu, Wemuwenda ukupiga. Umwene muwulasi, kangi sakwimagi mu nachene pakuva inachene isumuli mulumwene. Na pealongaga uwudesi; akwilongela isakwe yumwene, ulo lweiwali pakuva mudesi, kangi Dade va uwudesi.

⁴⁵ Nane pakuva ndilonga ulwa nachene nanye nambi simukufuuwa nda.

⁴⁶ Ye nani mwa nyenye yeahwana ukundagila ulwa ndi munyanzanangifu? Lino wone ndilonga isa nachene, ndawuli simwifuuwa?

⁴⁷ Ye va Nguluvi aipulikisa ing'ani sa Nguluvi. Lino nyenye simwipulikisa pakuva nyenye si mwivanu va Nguluvi.”

Yesu epwali pe Abulahamu salawoneka.

⁴⁸ Avayudaya vamupitwe, “Mbi hwehwe sitwilongela mumwene nda, ulwa veve wi Musamaliya, na kangi wina lisoka?”

⁴⁹ Neke Yesu avapitulage, “Nene ndimugaya lisoka; nene ndina choga kwa Dada vangu, neke nyenye mwivagaya choga kwa nene.

⁵⁰ Nene singwisakila indolo yinene; pwali yumwi hela yeaisaka indolo iyo nave ye muhisi pevakwilamula

⁵¹ Nachene nene nguvalongela, umunu yeakwinatila ulukani lwangu sisaafwa kitasila!”

⁵² Swe Avayudaya vakumulongela, “Ino tulukagwe ulwa wina lisoka! Abulahamu afwe, na avavisi vafwe, veve ati witigila ‘umunu yeakwinatila ulukani lwangu sisaafwa kitasila!’

⁵³ Veve ngali wi muvina ukulutila udadetu Abulahamu yeafwe? Na avavisi vafwe, lino veve ukwivika winani?”

⁵⁴ Yesu avapitwe, “Wone ndipele yinene indolo iso sisiva kinu nda. Dada vangu ye nyenye mukumutigila ye Dadenyu, ye yuyo yeakumela indolo.

⁵⁵ Nyenye simulava mumukagula, ali nene yendimukagwe. Na wone, nigile sindimukagwi, ipo ndeta ndawe nyenye. Nene ndimukagwe na ulukani lwakwe nzinatye.

⁵⁶ Abulahamu, Udadenyu aheyite ulwa ikimunyi changu, nave akiwene nu kuhekelela.”

⁵⁷ Sweno, Avayudaya vakumutigila, “Veve sulafikila nambi myaka machumi gahanu, nave uve vamuwene Abulahamu?”

⁵⁸ Neke Yesu avapitulage, “Nachene nene nguvalongela, Abulahamu wesialavaawoneka, nene nde ndipwali.”

⁵⁹ Ipo ndawe vasavige amaganga sambi vamukinye, ndawe Yesu ifihige swe ihuma mu tembeli.