Yohane 7 - Lufingano Lupya

Yesu na avanyalukolo vakwe

¹ Na pelulutye ulu Yesu agendige mu Galilaya. Siawendigi ukugenda mu Yudaya, wimila Avayudaya avasakige ukumuwulaga.

² Uluhekelelo lwa Avayudaya, uluhekelelo lwa ifitinga yelweluhegelye.

³ Ndawe avanyalukolo vakwe Yesu vamulongelige, “Hege ipa bite ku Yudaya, sambi avanyigendo vako nawo valave ifipigo fyako fyewipiga.

⁴ Pakuva asukuli umunu yeipigaga lukani mu kinyele kono weisaka akagulanike. Pakuva wipiga isi apo wiyelelulage mung'i.” (

⁵ Pakuva na vavanyalukolo vakwe sivamufuuvigwi!)

⁶ Neke Yesu avalongele, “Ulusika lwangu silulafika nda, neke ulusika lwenyu lulipwali mbepali.

⁷ Avanu avamung'i sivavavipila nyenye, pesi vakumbipila nene, pakuva nene nguwolelela ulwa ifipigo fyawo ifyanangifu.

⁸ Mubitage yinyenye ku luhekelelo. Nene sindibita ku luhekelelo ulu, pakuva ulusika lwangu ulukwilaniche silulafika.”

⁹ Nave ave akuvalongela isi asigee mu Galilaya.

Yesu ibita kukimunyi ikikomi icha ifitinga.

¹⁰ Neke avanyalukolo vakwe peyevahele ku luhekelelo, nave Yesu pepene peahele, kinyele kinyata.

¹¹ Ndawe avavina va Avayudaya vamolelige mu luhekelelo: swe vitigila “Alikwi?”

¹² Swe kwiva na lwing'ulanzo mumukong'ano. Pepene avamwi vamutige Yesu, “Munu munofu.” neke avangi vatigile “Nda! Uyo ake iyasa avanu.”

¹³ Nambi ndahihyo alasukuli umunu yealongige pawelu ing'ani sa Yesu, pakuva vawogopige Avayudaya.

¹⁴ Mugatinagati mufilyo ifya uluhekelelo, Yesu iinje mutembeli ivanga ukwigisa.

¹⁵ Ndawe avavina va Avayudaya vasasavalige wevitigila, “Mbi uyu asikagwe ndawuli isi mbesili nave wesiimbiti?”

¹⁶ Ipo Yesu avapitwe itigila, “Inzigiso isi sisangu nene sa umwene yeandetite.

¹⁷ Wone umunu iwenda ukupiga seiwenda Nguluvi uyo yealukagula ukuta inzigiso sangu sihumile kwa Nguluvi na wone apangi ngwivangila mululagi lwangu hela.

¹⁸ Umunu yeilonga ing'ani sa ukwivangila mululagi lwakwe hela uyo isakaga ululumbo lwakwe yumwene, neke yula yeaisakaga ululumbo lwa yula yeamuletite, uyo yevanachene na mulumwene mugaya ng'ani isa uwubangabanga.

¹⁹ Ndawuli Musa siavapelii indagilo? Ino asukuli nambi yumwi mwanyenye yeakwinatila indagilo. Mbino pandawuli mwisaka ukumbulaga?”

²⁰ Neke vamalugu vapitule, “Be! napo wina lisoka! Yenani yeisaka ukukuwulaga?”

²¹ Swe Yesu akuvapitula nu kuvalongela, “Nene ndapigite kipigo kimwi hela nyenye mbemuli mwasasave.

²² Musa avapelye ukuwoolwa ino sikuta umusimu ugo gwahumile kwa Musa pesi ulwa gwahumile kwa avanyakataali. Lino nyenye mwiwoolaga umunu na mukimunyi cha isabato.

²³ Wone umunu aiwoolwa sambi indagilo sa Musa silemwe ukudenywa mbino ndawuli mukumbipila pakuva ndimuponise umunu mukimunyi cha isabato?

²⁴ Lino mulahiga ulukani ukwimila isiwoneka mwivala hela muhigage we mukwinatila uwugolofu.”

Ngali uyu ye Mesiya?

²⁵ Avamwi va avanu va mu Yelusalemu vapwepige vitigila, “Uyu si yuyu yevakumulela sambi vamuwulage?

²⁶ Mulavage! lino alibaha akuvakenyela pelu hela na asupali umunu yeakumulonza lukani. Ngali luhwanite avalongola yevamukagwe nachene ulwa uyu, ye Mesiya?

²⁷ Neke Mesiya peakusa asupali yealakukagula kweihuma, neke hwehwe tukukagwe kweahumile umunu uyu!”

²⁸ Ndawe Yesu ihugige pakulonga kono we akwigisa, mu Tembeli itigila, “Nene munzele na kwendihuma mukukukagula nambi ndahihyo sindasili kwa uwunu wangu pesi umunyakunuma nene ye va nachene nanye simumuseli nda.

²⁹ Nene ndimusele pakuva nyumite kulumwene nave ye munyakunuma.”

³⁰ Swe avanu vasakige ukumwibata, nambi ndahihyo siekwali umunu yeigelye ukugolola iliwoko lyakwe kulumwene amwibate, pakuva ikivalilo chakwe sichekilafika.

³¹ na avanu wolofu mumukong'ano vamufuuvitwe vitigila, “Pesaasile Kilisito saapiga filagilo fyolofu ukulutila fye apigite uyu?”

Avanyigalu vitumwa vakamwibate Yesu

³² Avafalisayo swe vipulika avanyamukong'ano pevipwepa ing'ani sa Yesu. Swe, avene na avatambisi avavina vatumite avanyigalu vakamwibate Yesu.

³³ Ndawe Yesu atigilige, “Ndilipamwi na nyenye lusika ludodo, pambele pe ndibitilaga kwa yeandetite.

³⁴ Mulasaka neke sisamumbona nene, na pala pendipwali nyenye sisamusa.”

³⁵ Ndawe avalongola va Avayudaya vilonganzige vatigilage, “Uyu abita kwi kwesitumuwona? Ngalihosa ukubita ku Vayudaya avayaje ku Vagiliki nu kuvigisa Avagiliki?

³⁶ Lukani luki ulo lweilonga: ‘Musaka neke simumbona na pala pemba ndipwali nyenye simuhwaniti muse?’”

Imikoga ija ululenga ulunyawumi

³⁷ Na ikimunyi icha uwusililo, ikimunyi ikikomi cha uluhekelelo, ikimunyi ikitambule swe Yesu imite akwihuga iliswi itigila, “Umunu umunyang'elu asage kwa nene anywe.

³⁸ Yeakufuuwa nene, ndawe uwandike wewatige: ‘Imikoga ja ululenga ulunyawumi, ginyilima ukuhuma mulumwene!’” (

³⁹ Na ulukani ulo alongelige ulwa Umuhe, ukutigila vala vevakumufuuwa savamwanukila pambele pakuva Muhe sielasa na Yesu siealingila mundolo sakwe.)

Ulwilekano lwa avanu ukwimila Yesu

⁴⁰ Avanu avamwi avapulike ing'ani iso vatige, “Uyu nachene muvisi!”

⁴¹ Avamwi vatige, “Uyu ye Kilisito!” Neke avangi swe vatigile, “Mbi luhwanite nachene Kilisito ahume ku Galilaya?

⁴² Mbi uwandike Uwelu wilonga ndawuli? Witigila, ‘Kilisito ahuma mumbegalo ya Daudi va ku Betelehemu, muboma ya Daudi!’”

⁴³ Sweno, piva na ulwilekano muvanu ukwimila umwene Yesu.

⁴⁴ Avangi vasakige ukumwibata Yesu, neke na baho siepwali umunu yeigelye ukugolola liwoko amwibata.

Avavina va Avayudaya vagaya lufuuwo

⁴⁵ Avanyigalu vapilwike, ku vavina va avatambisi na Avafalisayo vevavatige, “Mbi ndawuli simumuletiti?”

⁴⁶ Avanyigalu vala vapitwe, “Asukuli umunu umulonga hilo ndawe umunu uyu!”

⁴⁷ “Neke Avafalisayo vavapitule nayi nyenye ye musanzilwe ndahihyo?

⁴⁸ Yenani muvavina na avanyalulagi na Avafalisayo yeakumufuuwa?

⁴⁹ Neke ililugu ili, lyesilikulukagula ululagilo sa Musa likotwike!”

⁵⁰ Uyumwi va Avafalisayo itambulwa Nikodemu, umunu yeahele akamuwone Yesu pamwandi. Umwene avatige,

⁵¹ “Ndawuli ngali ndagilo setu sakumuhiga umunu wesalapulikiswa tandi, nambi ukulukagula lweiva apigite?”

⁵² Nawo swe vakumupitula vakumutigila, “Ngali nayuveve uhumite ku Galilaya? Apo kasake ulave muwandike uwelu nave wilavila ulwa, Mu Galilaya sahwaniti ukuhuma umuvisi nangi!” [

⁵³ Sweno, ndawe mbevali vatagalilige, munu na kwakwe.]