Yohane 5 - Lufingano Lupya

Ukuponia umunu yeepipi na ililamba

¹ Pesilutye iso Yesu ahele ku Yelusalemu ku luhekelelo ulwa Avayudaya.

² Ku Yelusalemu kuko pipi na mulyango gwa ing'olo, pepina lilamba lya lulenga ilitambulwa kwa kiebulaniya Betisasa, nalyo lina fikolo fihanu.

³ Mumo mwe avanyafitamwa wolofu vevavasise; avabofu, avatevafu, na vadedefu, [Vasindilige ululenga lutiigwe.

⁴ Pakuva kwekwina lusika avanyivaha pevasige nu kwingila mwilamba lila nu kulutiiga ululenga. Neke yeatasile ukwingila mululenga pelutiigitwe aponige uwutamwa mbewuli weeinawo.]

⁵ Na pala pepina umunu yeemutamwa myaka machumi gadatu na gimunana.

⁶ Yesu ave akumuwona uyu yeavasise, nave we akulukagula ukuta mutamwa filo fyolofu amulonje, “Wisaka ukupona?”

⁷ Umutamwa yula amupitwe, “Mulugu, nene ndimugaya munu uva kunoosa mwilamba ululenga pelwitiigwa, peyendisaka mbite uyungi yeiva atasile.”

⁸ Ndawe Yesu amulongelige, “Wime witwike ikivasikiso chako bitage.”

⁹ Lulusika lulo ave munofu swe akwitwika ikivasikiso chakwe nu kubitaga. Nacho ikimunyi icho che cha Sabato.

¹⁰ Pa ulo Avayudaya vamulonje yula yeaponesiwe, “Namunyi Sabato, kangi siluvaji kwa veve ukwitwika ikivasikiso.”

¹¹ Neke avapitule, “Umwene yeamonise ye mwene yeandonje: ‘Witwike ikivasikiso chako bitage.’”

¹² Swe vakumuwusa, “Yula yeakulonje witwike ubitage ye nani?”

¹³ Ino umunu yula yeaponesiwe salamuseli ye nani, pakuva Yesu ali ikwegite uluhuma pa vanu awolofu.

¹⁴ Peyesilutye iso, Yesu amufikite mu Tembeli, swe akumulongela, “Wikomalilage uve wimunofu; ulapiga inzanangifu kangi, longa lukugwile ululutye.”

¹⁵ Umunu yula swe akwibitilaga kono we akuvalongela Avayudaya ukuta yeamuponise ye Yesu.

¹⁶ Neke Avayudaya vavange ukumufwahisa Yesu, pakuva apigite iso pa Sabato.

¹⁷ Swe Yesu akuvalongela, “Dada vangu na yilino ipiga ifipigo nani ndipiga ifipigo.”

¹⁸ Ndawe Avayudaya vakalalilige visaka ukumuwulaga pakuva sieananzili yi Sabato hela nda, pamwi na ulo amutambulige Nguluvi Dade, swe iva akwipela ululumbo lutegane na Nguluvi.

Uludali lwa Umwana va Nguluvi

¹⁹ Neke Yesu pavapitule avalongele, “Nachene nguvalongela, Umwana siahwaniti apige lukani iyena; aipiga lula lweakuluwona udade ipiga, pakuva mbesili seaipiga sesene seaipiga Umwana.

²⁰ Pakuva Udade amwenda Umwana nave akumulagila mbesili seaipiga, na fipigo ifilutye kwa ifyo amulagila nyenye musasavala.

²¹ Ndawe Dada akuvasilibusa avafwe na ukuvapela uwumi, lwindahihyo na umwana akuvapela uwumi veiwenda.

²² Kangi Dada sihigagi munu. Umwana amupelye Umwana uluhigilo mbeluli,

²³ Sambi avanu mbevali vamulumbe Umwana ndawe lwe vakumulumba Dade. Yesiakumulumba Umwana sakumulumba Udade yeandetite.

²⁴ “Nachene nguvalongela umwene umunya kupulika ulukani lwangu na ukumufuuwa umunyakundeta ina uwumi wa mbepali. Na siingila mu luhigilo nda, iva alutye uluhuma kuvafwe nu kwingila ku wumi.

²⁵ Nachene nguvalongela, ikivalilo kikusa na yilino kifikite, avafwe pesavapulika iliswi lya Umwana va Nguluvi, na vala avalipulika vava wumi.

²⁶ Ndawe Dada lwe ina wumi mulumwene, lwindahihyo amupelye na yumwana nave avelage na uwumi mulumwene.

²⁷ Neke amupele na uludali lwa uluhigilo, pakuva Mwana va umunu.

²⁸ Mulasasavala ing'ani iso, pakuva ikivalilo kikusa che avanu mbevali avali mufyanga savapulika iliswi lyakwe,

²⁹ nawo vahuma: vala avapigite inofu ku lusilibulo lwa uwumi, na vala avapigite inzanangifu ku lusilibulo lwa uluhigilo ukuhigwa.

Awolelesi va Yesu

³⁰ “Nene sifulwiki ukupiga lukani muludali lwangu, mwendandipulikila mwendandihigila na uluhigilo lwangu lwa wugolofu nachene. Pakuva sindakwisakila lwendiwenda nene pesi lula lwe iwenda yeandetite.

³¹ Wone ndiyolelele yinene, uwolelesi wangu wuva si wa nachene.

³² Kwali yungi yeakunzolelela nene, nani ngulukagula ulwa uwolelesi wakwe weakunzolela wa nachene.

³³ Nyenye mwatumite avanu kwa Yohane nave olelelye mumwene.

³⁴ Neke nene singuwanukila uwolelesi wa avanu ndilonga isi sambi nyenye mupokwe.

³⁵ Umwene Yohane e lung'ali ulukwaka nu kung'alika, na nyenye kwa ulusika ludodo mwawendige ukukima mu lung'ali lwakwe.

³⁶ Neke uwolelesi wendinawo nene wilutila wula wa Yohane. Pakuva ndipiga ifipigo, fye akamelye Dada ndifipige, ifipigo fyefikunzolelela ulwa Dada anumite.

³⁷ Nave Dada, yeandete akunzolelela. Nyenye simulava mupulika iliswi lyakwe nangi, nambi uwusu wakwe simwe mulawuwona,

³⁸ nambi lukani lwakwe mwihela mugati umwenyu, pakuva nyenye simukumufuuwa umwene yeandetite.

³⁹ Muhele mwihungilila Uwandike pakuva, mwitigila wanda mwina wumi wa mbepali mugati mwayo; kumbi Uwandike uwukunzolelela nene!

⁴⁰ Muleema ukusa kwa nene sambi muve na uwumi.

⁴¹ “Nene singwanukila uwusumilwa wa avanu.

⁴² Neke nene ndivakagwe, ulwa mwivagaya wende wa Nguluvi mugati umwenyu.

⁴³ Nene nzusile mwitawa lya Dada vangu na nyenye simukunzanukila, manyi ase uyungi mwitawa lyakwe uyo mumumwanukila.

⁴⁴ Mufuuwa ndawuli nyenye yemukwiyanuka uwusumilwa yinyenye kwa yinyenye, na simwisaka uwusumilwa wula uwihuma kwa Nguluvi yeiyena?

⁴⁵ Mulatigila ulwa nene ndivatosa kwa Dada. Pwali yeakuvatosa ye Musa ye mukwihuvila.

⁴⁶ Pakuva muke mumufuuwe Musa ye andike ing'ani sangu, muke mufuuwa na nene.

⁴⁷ Ino pesimwifuuwa uwandike wakwe mufuuwa ndawuli ing'ani sangu?”