Yohane 4 - Lufingano Lupya

Yesu na umung'inetu Umusamaliya

¹ Avafalisayo vapulike ulwa Yesu iva na avanyigendo wolofu nukubatisa ukulutila Yohane. (

² Neke umwene Yesu siabatisigi pesi avanyigendo vakwe.)

³ Aveipulika iso ahesile ku Yudaya nu kubita kangi mbaka ku Galilaya.

⁴ Nave lwelumuvaje ukukola bahagati pa Samaliya.

⁵ Swe ifika mu Samaliya mu boma iyitambulwa Sikali pipi na umugunda gwa Yakobo gwe alamupelye umwanakwe, Yosefu.

⁶ Na ipo pepina kisima cha Yakobo, neke pakuva Yesu alafuluge nu lugendo lwakwe, ateng'eme palubali pa kisima na ikivalilo che cha mutanda pamunyi.

⁷ Swe akusa Umung'inetu yumwi Umusamaliya kukunega ululenga. Neke Yesu amutigile, “Mele ululenga nywe.” (

⁸ Pakuva avanyigendo vakwe vevahele kuboma mukugula ichakulya.)

⁹ Ndawe Umung'inetu Umusamaliya amulongelige, “Luve ndawuli veve ve Muyudaya; ukusuka nene nde mung'inetu nde Musamaliya?” (Pakuva Avayudaya sivahangigi ifinu fyawo na Avasamaliya ndawe ifinegelo fya ululenga.)

¹⁰ Yesu swe akumulongela, “Nda uke uve ukulukagula ikipelwa cha Nguluvi nave ye nani yakukulongela: ‘Mele ululenga nywe,’ uke ukumusuka umwene na ake akupela ululenga ulunya wumi.”

¹¹ Umung'inetu neke amulongele, “Mulugu wimugaya kinu chakunegela na ikisima kitaali, lino uluwona kwi ululenga ulunya wumi?

¹² Mbi veve wimuvina ukulutila ukukwetu Yakobo yeatupelye ikisima iki, neke na yumwene anywe ululenga lwa kiki na avanakwe na ifikwamilwa fyakwe?”

¹³ Yesu amutige, “Yeyeanywesaga ululenga ulu akeluka kangi.

¹⁴ Neke yeyeanywesaga ululenga lwe ndimupela nene sisaakeluka kangi nda. Pakuva ululenga lwe ndimupela luva mufwilo gwa lulenga mugati mwakwe ulwileta uwumi wa mbepali.”

¹⁵ Umung'inetu yula neke amulongele, “Mulugu, mele ululenga ulo sambi ndemwe ukukeluka kangi ndemwe ukusa ipa kukunega.”

¹⁶ Yesu pamupitule, “Bite, ukamukemele uvako wuse nave ipa.”

¹⁷ Umung'inetu yula neke amupitule, “Ndimugaya munu.” Neke Yesu amulongele, “Ulonje mumwene wimugaya munu.

¹⁸ Pakuva ukave na vagosi vahanu nave ye winave lino simugosi vako, ipo ulonje mumwene.”

¹⁹ Umung'inetu yula amulonje, “Mulugu, ndiwona veve wimuvisi.

²⁰ Avakukwetu vifunyige mukidunda iki, na nyenye mwitigilaga ulwa uko ku Yelusalemu pepono pepatuvaje ukwifunya.”

²¹ Yesu pamulongele, “Yuva ufuuwage ikivalilo kikusa chesisamwifunya kwa Dada mukidunda iki nambi ku Yelusalemu.

²² Nyenye mwikwifunyaga kwa chesimukiseli, hwehwe twakwifunya kwa che tukisele pakuva uwupoki wihuma kwa Avayudaya.

²³ Neke ikivalilo kikusa na yilino kifikite kwa avanyakwifunya nachene vifunya kwa Dada mu Muhe na mu wanachene. Pakuva Dada akuvasaka avanu avakumusunyalila ndahihyo.

²⁴ Nguluvi Muhe, na avanyakwifunya kulu mwene luvaje ukwifunya mu Muhe na muwanachene.”

²⁵ Umung'inetu swe akumulongela, “Ngulukagula ulwa akusa Mesiya yeitambulwa Kilisito nave peasile umwene atulagila ing'ani mbesili.”

²⁶ Swe Yesu akumulongela, “Nene yendilongana na veve ye nene.”

²⁷ Ulusika ulo avanyigendo va Yesu vave vipiluka, neke vasasavale ulwa pevawene ulwa Yesu ilongana na umung'inetu. Neke sikwali yeatige kulu mung'inetu: “Wisaka kiki?” Nambi kumuwusa Yesu, “Ulwa mbi ndawuli wilongana na umung'inetu?”

²⁸ Swe umung'inetu yula akukileka ikisilo chakwe nu kubita ku boma kukuvalongela avanu.

²⁹ “Muse mulave umunu yeandonje ing'ani mbesili sengapigite! Nye! Napo uyu ava ye Kilisito Mesiya?”

³⁰ Neke avanu vahume muboma vabite kwa Yesu.

³¹ Ulusika ulo avanyigendo vamusukite vitigila, “Labi, lye.”

³² Neke avalongele, “Nene ndina ichakulya chesimukiseli nyenye.”

³³ Neke avanyigendo vakwe pevilonganze, “Ndawuli kuva kwina munu yeamuletye ichakulya?”

³⁴ Yesu neke pavalongele, “Ichakulya changu che iki mige cheinogelwa yeasindike ngasinde ikipigo chakwe.

³⁵ Nyenye simwamwitigila: ‘Pegike myesi gitayi ukubeta imbeto!’ Lavage nene nguvalongela mukang'ule amiho genyu mulave imigunda ulwa isanga yeyifikite ukubetwa.

³⁶ Nave umunyakubeta akwanukila amahombo nu kukong'asa amaveleko ga uwumi wa mbepali sambi umunyakuvyala na umunyakubeta vahekelele pamwi.

³⁷ Pakuva ululongwa ulo lwalwiva lwa nachene, ‘Uyumwi aivyala neke uyungi abete.’

³⁸ Nene ngavatumite mukabete imbeto yesimwagudi, avamwi vagudite nayi nyenye muhanzile uwinome wa ulugudo lwawo.”

³⁹ Na mu boma yila Avasamaliya wolofu vamufuuvitwe uluhuma mu lukani lwa umung'inetu yula yeolelye ulwa andonje: “Ng'ani mbesili sengapigite.”

⁴⁰ Vave Avasamaliya vakumubitila vamusukite ikale ukwawo, swe akwikala uko filo fivili.

⁴¹ Avanu wongeleche wolofu ukufuuwa uluhuma mulukani lwakwe.

⁴² Neke pevamulongele umung'inetu yula, “Ino twifuuwa, si kwa uwimila ulukani lwako nda. Pakuva twipuliche yihwehwe kangi tukulukagula ulwa nachene uyu ye mwene Umupoki va ing'i.”

Yesu akumuponia umwana va umuvina

⁴³ Peikalite ifilo ifivili Yesu ahesile pala nu kubita ku Galilaya.

⁴⁴ Pakuva yumwene Yesu ilonje ulwa, “Umuvisi mugaya lulumbo mung'i yakwe yumwene.”

⁴⁵ Ave ifika ku Galilaya, Avagalilaya vamwanuche. Pakuva vasiwene ing'ani mbesili seapigite ku Yelusalemu pa luhekelelo pakuva iwo nawo vevahele kuluhekelelo.

⁴⁶ Swe ifika kangi ku Kana ya ku Galilaya, kula kweeapitwe ululenga luve difayi. Na pala pepina umunu uyumwi umunzagila yeeina umwanakwe umutamwa uko ku Kapelenaumu.

⁴⁷ Uyo ave ipulika ulwa Yesu asile uluhuma ku Yudaya mbaka ku Galilaya amubitye nu kumusuka asulunuke kukumuponia umwanakwe, pakuva alatimbite.

⁴⁸ Swe Yesu akumulongela, “Pesimufiweni ifilagilo nu wuhulo sisamufuuwa nangi.”

⁴⁹ Umunzagila amulonje, “Mulugu tubite wesialafwa umwanangu.”

⁵⁰ Neke Yesu amulongele, “Bitage umwanako mumi.” Umunu yula afuuvitwe ulukani lula lwalongilwe na Yesu nave swe ibitaga.

⁵¹ Nave peabitige avakami vakwe vamutang'anie vitigila umwanakwe mumi.

⁵² Swe akuvawusa ikivalilo pavangige ukuva kiba nawo neke vamulongele, “Igolo, pa kivalilo cha mufung'ati pamunyi, imbungo yikamulesile.”

⁵³ Swe udade akwiwuka ulwa chekivalilo pakalongeligwe na Yesu: “Umwanako mumi.” Swe ifuuwa umwene na mbevali avamukaye yakwe.

⁵⁴ Icho che kilagilo cha kavili cheapigite Yesu peahumite ku Yudaya kufika ku Galilaya.