Yohane 3 - Lufingano Lupya

Yesu na Nikodemu

¹ Epwali umunu uyumwi umufalisayo ilitawa lyakwe e Nikodemu umulongola va Avayudaya.

² Uyo amusye Yesu pakilo nu kumutigila, “Labi tukulukagula ulwa wi mwigisi uhumile kwa Nguluvi. Pakuva sikwali umunu yeahwanite ukupiga ifilagilo ifyo fyewipiga veve pesi Nguluvi alipamwi na Umwene.”

³ Neke Yesu amupitule atigile, “Nachene nene ngukulongela: umunu pesiegilwi ulwa kavili sisauhanga ukuwuwona uwutwa wa Nguluvi.”

⁴ “Neke Nikodemu amutigile lwiima ndawuli ukwegalwa kangi umunu umugogolo? Ahwanite ingile mwileme lya uyuve neke egalwe ulwa kavili?”

⁵ Yesu pamupitule, “Nachene ngukulongela umunu pesiegilwi kwa lulenga nu Muhe sahwana ukwingila kuwutwa wa Nguluvi.

⁶ Ichegilwe kwa umuvili, cha muvili, na ichegilwe nu Muhe, cha Muhe.

⁷ Ulasasavala pakuva ngulonje ulwa luvaje ukwegalwa ulwa kavili.

⁸ Ing'ala yayipugila kwekweyiwenda; na umubumo gwayo wawipulika neke sulukagula na kwe yibita. Ndahihyo na kwa munu umwegale nu Umuhe.”

⁹ Neke Nikodemu apitule atigile, “Sivagila ndawuli ing'ani isi?”

¹⁰ Yesu amupitule atigile, “Be veve wi Mwigisi va Isilaeli ing'ani isi susiseli?

¹¹ Nachene ngukulongela ukuta lula lwetulusele twatwilonga na lula lwetuluwene twatukolelela na uwolelesi wetu simwakuwidikila.

¹² Neke ulwene pendivalonje isa mung'i simwifuuwa nda, mbi neke pendivalonje isa kuchanya mufuuwa?

¹³ Kangi sikwali umunu yealahele kuchanya pesi Umwana va Umunu, yeasile uluhuma kuchanya.

¹⁴ “Ndawe Musa lwe atumbike inzoka ya ichuma mwibiki ku balali, lwindahihyo Umwana va Umunu avaje ukukang'ulwa,

¹⁵ sambi umunu yeyeavesaga yeifuuwa ave na uwumi wa mbepali mulumwene.

¹⁶ Pakuva Nguluvi ayiyendite ing'i nambi amutawe Umwana yeiyena, sambi yeakumufuuwa alemwe ukuyaga pesi ulwa ave na uwumi wa mbepali.

¹⁷ Pakuva Nguluvi samutumiti Umwanakwe mung'i ayihige; atumitwe aipoke ing'i.

¹⁸ “Yakumufuuwa umwana sisaahigwa yesiakumufuuwa yahigitwe pakuva sakamufuuvitwi Umwana yeiyena va Nguluvi.

¹⁹ Na ulu lwe luhigilo ukuta ulung'ali lwasile mung'i neke avanu vende ulwisa valeke ulung'ali pakuva ifipigo fyawo fyanangifu.

²⁰ Pakuva Umunu yeyeavesaga yeipiga imbi akuluvipila ulung'ali kangi siasa ku lung'ali ifipigo fyakwe filonga fikenyelwe.

²¹ Neke yeaipiga isa nachene akusa ku lung'ali sambi ifipigo fyakwe fiwoneke pawelu ulwa fipigitwe muchoga pa Nguluvi.”

Yesu na Yohane umubatisi

²² Peye silutye iso, Yesu na avanyigendo vakwe, vahele mbaka ku ing'i ya mu Yudaya na ukwikala nawo kuko pamwi kono ibatisa avanu.

²³ Nave Yohane abatisige ku Ainoni, pipi na ku Salimu, pakuva uko kwekwina lulenga lolofu na avanu vamubitye nu kubatisiwa. (

²⁴ Pakuva Yohane siealadindilwa mundinde.)

²⁵ Swe lwivanga ulubesa lwa musimu gwa ukofuga na avanyigendo va Yohane na Umuyudaya uyumwi.

²⁶ Neke avanyigendo iwo vabite kwa Yohane nu kumulongela, “Labi, umwene yeakelumwi na veve kumwambu ya ku kumukoga gwa ku Yolodani, umwene yukamolelelye lavage lino nave ibatisa na avanu mbevali vakumufwata!”

²⁷ Neke Yohane avapitule atigile, “Sahwaniti munu ukwanukila kinu pesiapelitwi na Nguluvi.”

²⁸ Yinyenye munzolelye ulwa ndalonzile, “Nene sindi Kilisito nda, ndimulongola hela!”

²⁹ Umugosi va umwalule ye munyamudala neke umunyawiyendi va umunya mudala yeakwima nu kumupulikisa ayihekelela hilo pakumupulika umunya mudala peilonga. Lwindahiyo nayinene ndihekelela wuli pe uluhekelelo lwangu lwikwilanikila.

³⁰ Luvaje umwene alutilikile ululumbo, nane ng'epe.

Yeakusa uluhuma kuchanya

³¹ “Umwene yeakusa uluhuma kuchanya uyo ye muvina kwa mbevali umwene uva mung'i umwaluko gwakwe gwa mung'i, nave ayilonga ing'ani sa mung'i nachene umwene yakusa uluhuma kuchanya uyo ye muvina kwa mbevali.

³² Sila sasiwene nu kupulika sesene seakolelela na asukuli yeakwidikila uwolelesi wakwe.

³³ Umwene yawidiche uwolelesi wakwe ayisigihila wuwo ulwa Nguluvi va nachene.

³⁴ Pakuva umwene yeatumitwe na Nguluvi ailonga ing'ani sa Nguluvi pakuva Nguluvi akumupela umunu uyo Umuhe gwakwe wugaya kigelo?

³⁵ Udade akumwenda Umwana nave amupelye mbefili mumawoko gakwe.

³⁶ Yakumufuuwa umwana ina uwumi wa mbepali, yesiakumufuuwa Umwana sisaahanga uwumi wa mbepali pakuva ililakali lya Nguluvi limusigalila.”