Yohane 2 - Lufingano Lupya

Uluwungo ulwa ku Kana

¹ Ikimunyi cha wudatu kwekwina luwungo ku Kana ya ku Galilaya. Na uyuve va Yesu epwali,

² Nave Yesu emulaalike kuluwungo pamwinga na vanyigendo vakwe.

³ Pepave na uwukefu wa idifayi uyuve va Yesu amulonje, “Vagaya difayi!”

⁴ Neke Yesu amupitule, “Yuva, lemwe ukundongela icha kupiga. Ikivalilo changu sikilafika.”

⁵ Uyuve neke avalongele avakami, “Checheavalongela, mpigage.”

⁶ Avayudaya vana musimu gwa ukukalava. Wimila ulo vevavisile fisilo fimutanda fya maganga uwukomi wafyo wendige wutegule mateneka gahanu kwa kisilo kimwi.

⁷ Yesu avalonje avakami, “Mumemye ifisilo ululenga.” swe vimemya mbaka mumugoo,

⁸ neke avatigile, “Ino munege mumusindikile umuvina va uluwungo.”

⁹ Nave umuvina va uluwungo ave igesa ulo ululenga kumbi yelwelupitwike ukuva difayi. Umwene salukagwi kwelweluhumite, neke vala avakami avevanesile ululenga vevalukagwe. Umuvina va uluwungo amukemelye umunyaluwungo,

¹⁰ neke amulongele, “Avanu mbevali vavigelanisa tandi idifayi inofu, neke avanu peyevanywe hilo, pepene pevavileta inyufu. Veve uvikite idifai inofu mbaka lino!”

¹¹ Iki che kilagilo cha umuvango cheapigite Yesu ku Kana ya ku Galilaya, pala elelwe uwunyandolo wakwe na avanyigendo vakwe vamufuuvitwe.

¹² Nape silutye iso Yesu asulunwike ku Kapelenaumu umwene, uyuve, na avanakwave na avanyigendo vakwe nu kwikala uko filo fikefu.

Yesu ibita mu Tembeli

¹³ Na i Pasaka ya Avayudaya yeyihegelye, nave Yesu agang'amwike mbaka ku Yelusalemu.

¹⁴ Swe iwona avanu mu tembeli avagusige isenga na ing'olo na ingunda na avanyakufunza amagobole vateng'eme pa mesa sawo.

¹⁵ Ndawe Yesu asaavige umulegesi umunyamifwa nu kuvadaga mbevali pamwi ni ng'olo ni senga, uluhuma mu Tembeli nu kwita amagobole ga avanyakufunza nu kudulika imesa sawo.

¹⁶ Neke pavalongele vala avanyakugusa ingunda, “Muhese isi. Mulapitula ikaye ya Dada vangu yive ya wusulusi!”

¹⁷ Avanyigendo vakwe swe vakwiwuka ukuta Uwandike Uwelu witigila, “Uwende wa ikaye yako veve Nguluvi wumbulaga.”

¹⁸ Swe Avayudaya vakumupitula vitigila, “Utulagila ikilagilo ikindawuli ulwa wimulagile ukupiga isi?”

¹⁹ Neke Yesu apitule atigile, “Mudenye i tembeli iyi, nani nzenga kangi mufilo fidatu.”

²⁰ Ndawe Avayudaya vatigilige, “I tembeli iyi yasengitwe musika gwa myaka machumi gatayi na gimutanda. Mbi luhwana ndawuli veve usenge mufilo fidatu?”

²¹ Kumbi umwene alongige ulwa i tembeli ya umuvili ugwakwe.

²² Lwave peyeasilibwike kuvafwe, avanyigendo vakwe viwike ukuta alalonzile ndahihi, swe vifuuwa Uwandike Uwelu na ulukani lwealonzile Yesu.

Yesu asisele inumbula sa avanu mbevali

²³ Nape Yesu ali ku Yelusalemu ku luhekelelo lwa i Pasaka, avanu wolofu vamufuuvitwe umwene pevafiwene ifilagilo fyeapigite.

²⁴ Neke Yesu avabedale, pakuva umwene alavasele avene mbevali.

²⁵ Ino siawendigi munu amulongele ulwa avene, pakuva yumwene alasisele isili mugati mwa avanu.