Yohane 16 - Lufingano Lupya

¹ “Ing'ani iso mbesili ndivalonje sambi mulemwe ukululeka ulufuuwo lwenyu.

² Vavahesa mumasinagogi. Kangi ikivalilo kikusa pe umunu yeyeavesaga akuvawulaga atigila ngumutambikila Nguluvi.

³ Na iso vavapigila pakuva sivamukagwi Dada na nene.

⁴ Neke ndivalonje iso, sambi ikivalilo pechusile mwiwukage ulwa nene ndavalonje. “Sindavalonji iso uluhuma pamuvango pakuva ngepamwi na nyenye.

Ifipigo fya Umuhe Umwelu

⁵ Neke lino nene ngwibitilaga kulumwene yeandetite sipwali mwanyenye yeambusa: ‘Wibita kwi?’

⁶ Pakuva ndivalonje iso inumbula senyu sihuguve.

⁷ Neke nene nguvalongela ulwa nachene: lunoje nyenye, nene nyege pakuva nene pesinyesili uyo umutanzi siasa kwa nyenye neke nene penyesile ndimuleta kwa nyenye.

⁸ Nave peasile ayidadisa ing'i ulwa inzanangifu, uwugolofu na uluhigilo.

⁹ Ulwa inzanangifu, pakuva sivakufuuwa nene;

¹⁰ ulwa uwugolofu pakuva nene gwibitilaga kwa Dada na sisamumbona kangi;

¹¹ ulwa ukuhigwa pakuva yula umuvina va mung'i iyi yeahigitwe.

¹² “Napendinaso nzolofu isa ukuvalongela, ino ulwalino simuhwaniti mwikangase.

¹³ Neke umwene peasile uyo Muhe va nachene avalongosa mu wanachene mbewuli, pakuva sisaalonga isakwe hela nda, saalonga mbesili seapulika na isikusa, saavapavila inzeli yakwe.

¹⁴ Umwene amela indolo nene pakuva ategula mung'ani sangu nu kuvapavila inzeli.

¹⁵ Na mbesili seinaso Dada sangu nene; nambi nige ategula mung'ani sangu na ukuvapavila inzeli.

Uwuhuguvafu na uluhekelelo

¹⁶ “Lusige lusika ludodo nayinyenye simumbona, kangi lusige lusika ludodo mumbona!”

¹⁷ Swe avanyigendo avamwi vilonganzise vitigila, “Lukani luki ulu lweakutulongela: ‘lusige lusika ludodo nayinyenye simumbona, na kangi lusige lusika ludodo nyenye mumbona’ na ngwibitilaga kwa Dada?’

¹⁸ Ndawe vatigilige, Lukani luki ulo lweilonga: ‘Lusige lusika ludodo?’ Situkulukagula lweilonga.”

¹⁹ Yesu alukagwe ulwa visaka vamuwuse, swe akuvalongela, “Ngali lulu lwemukwiwusa ulwa nige: ‘Lusige lusika ludodo nayinyenye simumbona; kangi lusige lusika ludodo nyenye mumbona?’

²⁰ Nachene nguvalongela, nyenye samuvemba nu kuhuguvala neke ing'i sayihekelela, samuhuguvala, neke uwuhuguvafu wenyu sawupituka wuve luhekelelo.

²¹ Ulusika lwe umung'inetu akwegala ayiva ahuguve pakuva ikivalilo cha ukwivikula chakiva kifikite, neke peyeeje umwana siakwiwuka kangi uwuvafi uwo ukwimila uluhekelelo ukuta umunu yawonike mung'i.

²² Lino nyenye pede mwina wuhuguvafu. Neke nene ndivawona kangi na luhekelelo lwenyu sipwali yeavapoka.

²³ Kangi ikimunyi kila sisamumbusa lukani nda, nachene nguvalongela pemumusukite Dada kichekivesaga avapela mwitawa lyangu.

²⁴ Na yilino simulasuka kinu mwitawa lyangu; Musukage nayinyenye mupelwa sambi uluhekelelo lwenyu lukwilanikile.

Ndivesise ava mung'i

²⁵ “Iso ndonzile na nyenye kwa nzivililo. Ikivalilo chusa pesisandonga na nyenye kwa nzivililo, neke ulwa Dada ndivalongela wima hela.

²⁶ Na ikimunyi icho samusuka mwitawa lyangu na singuvalongela ulwa nene ndivasukila kwa Dada;

²⁷ pakuva yumwene Dada avenda wimila nyenye ukunzenda nene, na ukufuuwa ulwa nene ndahumite kwa Nguluvi.

²⁸ Ndahumile kwa Dada nane nzusile mung'i kangi nguyileka ing'i na ukubita kwa Dada.”

²⁹ Neke avanyigendo vakwe vatigile, “Lavage! lino wilonga wima hela sipeulonga kwa nzivililo nda.

³⁰ Lino tulukagwe ulwa veve usisele mbesili na kugaya munu yeakuwusa lukani ino twifuuwa ulwa wahumite kwa Nguluvi.”

³¹ Yesu avapitwe, “Ino mwifuuwa?

³² Mulavage ikivalilo kikusa, na yilino yechusile pesamutagalila munu na pakwe na ukundeka nene ndiyena. Neke ulwene nene sindiyena nda, pakuva Dada alipamwi na nene.

³³ Iso ndivalonje sambi muve na uwikalakunoga mugati mwa nene. Mung'i umu muva na lugudo ino mulogopa! Nene ndiyidwesise ing'i!”