Yohane 15 - Lufingano Lupya

Yesu ye Musabibu gwa nachene

¹ “Nene yenene nde musabibu gwa nachene, na Dada vangu ye mulimi.

² Lilyelivesaga litagala mugati mwa nene lyesiliveleka amakowo akulihesa, na lilyelivesaga ilitagala lyeliveleka amakovo aitotekela sambi liveleke amakowo molofu.

³ Nyenye yemuve mwivelu wimila mulukani lula lwendavalonje.

⁴ Mwikalage mugati mwanene, nane mugati mwanyenye. Ndawe ilitagala lwesilivelekagi liyena pesilili mugati mumusabibu lwindahihyo nayi nyenye pesimukwikala mugati mwa nene.

⁵ “Nene gwe musabibu, nyenye mwimatagala. Yakwikala mugati mwanene nane mugati mulumwene, uyo aiveleka amakowo molofu, pakuva pesi nene nyenye simuhwaniti ukupiga kinu.

⁶ Umunu yesiakwikala mugati mwa nene aitagwa kwivala ndawe ilitagala nu kukala. Ilitagala ilyo avanu vavikong'asa nu kusopa mumoto lipye.

⁷ Wone nyenye mwikale mugati mwanene na amaswi gangu pegikalite mugati mwanyenye musukage chechemwisaka nacho mupigilwa.

⁸ Palulo Dada vangu apelwa indolo wone muveleke amakowo molofu na muva vanyigendo vangu.

⁹ Ndawe Dada lweanzendite nene, nayinene lwendavendite nyenye mwikalage muwende wangu.

¹⁰ Wone mwinatile indagilo sangu munana mu wende wangu ndawe nene lwendinatye indagilo sa Dada vangu na ukunana mu wende wakwe.

¹¹ Ing'ani iso ndivalonje sambi uluhekelelo lwangu lukwilanikile.

¹² Ulu lwe lulagilo lwangu: “Mwiyendage, yinyenye kwa yinyenye ndawe nene lwendavendite nyenye.”

¹³ Asukuli umunyawende wolofu ukulutila uwu, wa umunu ukutawula uwumi wakwe wimila avanyawiyendi vakwe.

¹⁴ Nyenye mwivanyawiyendi vangu pe mwipiga senguvalagisa.

¹⁵ Sindivakemela nyenye ulwa muvakami nda, pakuva umukami saluseli lweipiga Umutwa vakwe. Ino nyenye ndivatige mwivanyawiyendi vangu, pakuva mbesili sengapulike kwa Dada vangu ndivalonje.

¹⁶ Si Nyenye nda yemwanyagwe nene, ali nene yendavahagwe nyenye neke ndivavike muveleke amaveleko, na amaveleko geganana sambi luve chechemusukaga kwa Dada mwitawa lyangu avapele.

¹⁷ Ululagilo lwangu lwe ulu, mwiyendage yinyenye kwa yinyenye.

Imbipi isa avanu ava mung'i

¹⁸ “Wone muwone avanyamung'i vakuvavipila, mulukagulage ulwa vali vambipye nene wesivalavavipila nyenye.

¹⁹ Muke muvelage mwiva mung'i, ing'i yikeyivenda ndamwivayo. Ino pakuva nyenye si mwivamung'i na nene ndavahagwe uluhuma mung'i nambi avamung'i vakuvavipila.

²⁰ Mwiwukage ulukani lula lwendendivalonje: umukami si muvina ukulutila Umutwa vakwe. Wone vambifise nene, vavavifya na yinyenye, wone vinatye ulukani lwangu vinatila na lulwenyu.

²¹ Ino isi mbesili vavapigila mwivalwa ilitawa lyangu, pakuva sivamuseli yeandetite.

²² Ngembe singasili na ukulongana nawo, sivakevava na nzanangifu, neke lino vagaya cha ukutyegela mu wananzi wawo.

²³ Umwene yeakumbipila nene iva akumuvipila nayi Dada vangu.

²⁴ Ngembe singapigiti pavene ifipigo fyesiealapiga umunu uyungi, sivake vava na inzanangifu. Neke lino vakaluwene swe vakutuvipila nene na Dada vangu.

²⁵ Sila inzandike mundagilo sawo sikwile; ‘Vambipye hela!’

²⁶ “Peasile uyo umutanzi, yendivaletela uluhuma kwa Dada, uyo Muhe va nachene yeihuma kwa Dada, anzolelela.

²⁷ Nayi nyenye mukolelela pakuva uluhuma pamuvango mukepamwi na nene.