Yohane 14 - Lufingano Lupya

Yesu ye Ng'asi yu kubitila kwa Nguluvi

¹ Yesu avalonje, “Mulahuguvala munumbula senyu. Mumufuuwagwe Nguluvi, mufuuwagwe nayi nene.

² Mukaye ya Dada vangu muna wikalo wolofu; manyi silwindahihyo singe ndivalongela, pakuva ndibita kukuvagelanikisa uwikalo.

³ Nene penyele kukuvagelanikisa wikalo nzusa kangi kukuvanukila mwingile ukwangu sambi pendi pwali nene nayi nyenye muvelage baho.

⁴ Nani kwesogwe ing'asi muyisele.”

⁵ Tomasi neke amulongele, “Mutwa, hwehwe tuyikagula ndawuli ing'asi?”

⁶ Yesu amupitwe, “Nene ye ng'asi, inachene na uwumi, sikwali umunu yeabita kwa Dada pesiakweti kwa nene.”

⁷ Wone muke, “Mukung'agule nene muke mukumukagula nayi dada. Na uluhuma lino mumukagwe, kangi yemumuwene.”

⁸ Filipo amutige, “Mutwa, tulagile Dada, lutukwila.”

⁹ Yesu apitwe, “Nene mbe pamwi na nyenye filo mbefili ifi veve sukung'agula Filipo? Yeambwene nene amuwene Dada. Ino veve wilonga ndawuli pewitigila, ‘Tulagile dada?’

¹⁰ Siwifuuwa ulwa ndilimugati mwa dada na Dada alimugati mwa nene? Ing'ani iso senguvalongela nene singwilongela hela nda, Dada yeakwikala mugati mwa nene aipiga ifipigo fyakwe.

¹¹ Mufuuwage ulwa nene ndilimugati mwa dada nayi dada alimugati mwa nene. Pesimwifuuwa ulo apo mufuuwe ukwimila ifyene ifipigo fyendipiga.

¹² Nachene nguvalongela, umwene yeakufuuwa nene na ifipigo fyendipiga nene nave apiga, kangi apiga ifipigo ifikomi, ukulutila ifyo, pakuva nene sogwe kwa Dada.

¹³ Nyenye pemusukite ulweluva mwitawa lyangu, ulo miga sambi Dada ave na indolo mugati mwa Umwana.

¹⁴ Wone musuke lulweluva mwitawa lyangu, nene miga.

Uluhuviso lwa Umuhe Umwelu

¹⁵ “Wone munzende, mwinatila indagilo sangu.

¹⁶ Nani ndimusuka Dada, nave avapela Umutanzi yungi yeikala na nyenye mbepali.

¹⁷ Ye Muhe, vanachene yesianukilwa na avanu va ing'i, pakuva sivakumuwona nambi ukumukagula. Neke nyenye mukumukagula, pakuva akwikala kwa nyenye nave ava mugati mwa nyenye.

¹⁸ “Sindivaleka nyenye mwivakiva nzusa kwa nyenye.

¹⁹ Lusige lusika ludodo avanu va ing'i sivambona kangi, neke nyenye mukumbona pakuva nene ndimumi nayi nyenye muva mwiwumi.

²⁰ Ikimunyi icho, samulukagula ulwa nene ndili mugati mwadada vangu, nyenye mugati mwa nene, nayi nene mugati mwanyenye.

²¹ Umwene yeakwanukila indagilo sangu na ukusinatila uyo yeava akunzenda, nave yeakunzenda endwa na Bada vangu nayi nene ndimwenda na ukwiyelelula kulumwene!”

²² Yuda (siyula Yuda Isikalyote nda) amulonje, “Mutwa luhwana ndawuli ulwa ukwiyelelula kwa hwehwe nasi kwa avanu va mung'i nda?”

²³ Yesu amupitwe ukuta, “Umunu yeanzendite inatila ulukani lwangu na Dada vangu amwenda, nahwe tusa kulumwene neke tuva tuhamye kulumwene.

²⁴ Umunu yesiakunzenda uyo siakwinatila ing'ani sangu. Na ulukani lwemwipulika silwangu nda ulo lwa Dada yeandetite.

²⁵ “Iso sesene sengavalongelige pengikalige kwa nyenye

²⁶ neke uyo Umutanzi, uyo Umuhe Umwelu, ye Dada amuleta mwitawa lyangu, avigisa mbesili na ukuviwusa mbesili sendendivalonje.

²⁷ “Uwikalakunoga wangu nguvalekela; uwikalakunoga wangu nguvapela; sindawe ing'i lweyitawulaga. Mulahuguvala mumitima jenyu kangi mulava na muhwehwe.

²⁸ Mukapulike ulwa nene ngavalonje ukutigila: ‘Ngwibitilaga, kangi nzusa kwa nyenye.’ Ndamuke muve mukunzenda muke muhekelela pakuva ndibita kwa Dada. Pakuva Dada ye muvina ukundutila nene.

²⁹ Nayilino ndivalonje wesilulava, sambi peyelufikite mufuuwe.

³⁰ Nene sindonga na nyenye kangi ing'ani nzolofu, pakuva akusa umuvina va ing'i iyi, neke umwene mugaya ludali kwa nene;

³¹ Neke ing'i yivaje ukulukagula ukuta nene ndimwenda Dada, na ukuta ndandipiga lweandagise Dada. Muhege, twibitilage!