Yohane 13 - Lufingano Lupya

Yesu akuwofuga amagulu avanyigendo

¹ Che kimunyi kimwi ukufika uluhekelelo lwa i Pasaka. Yesu alukagwe ulwa ikivalilo chakwe yekifikite cha ukuhegela mung'i, nu kubita kulu Dade nave ali avendite avanu vakwe va mung'i avendite ulutalamu!

² Yesu na avanyigendo vakwe vave vikong'ana valye ikilyo cha pamihye. Nave Setani yealamupelye Yuda umwana va Simoni Isikalyote umutima gwa kumupituka Yesu.

³ Yesu alalukagwe ulwa udade amupelye uludali mbeluli mumawoko gakwe, na ulwa ahumite kwa Nguluvi nave ipiluka kwa Nguluvi.

⁴ Ahesile pawulilo, swe ivika palubali umugolole gwakwe neke ategule ikitema swe akwipinya.

⁵ Swe isuuka ululenga mufugo neke avange, ukuwofuga avanyigendo amagulu nu kuvapuguha na ikitema kila chaliipinyite.

⁶ Ave ifika kwa Simoni Petulo uyo amulonje, “Mutwa, veve sunzofuga amagulu nene?”

⁷ Neke Yesu amupitule, “Lwendipiga nene lino sulukagula, ulukagula pambele.”

⁸ Swe Petulo akumutigila, “Veve sunzofuga nene amagulu gangu nda!” Ndawe Yesu amulongelige, “Pesingofwigi siulilumwi na nene nda.”

⁹ Simoni Petulo neke atigile, “Mutwa apo siga magulu hela nda, luvelage na mawoko gangu na gu mutwe.”

¹⁰ Yesu amupitwe, “Umwene yeyakalive umuvili aakofuga ga magulu hela, pakuva yeesile umuvili mbeguli. Nyenye mbemuli mwesile neke si mbemuli.” (

¹¹ Pakuva alamusele umwene yeamupituka nambi alonzile, “Si mbemuli ye mwesile.”)

¹² Ave peye awofwige amagulu na ukutegula kangi umugolole gakwe na ukuteng'emala avalonje, “Ndawuli, mulukagwe ulo lwendivapije?

¹³ Nyenye mukung'emelaga Mwigisi na Mutwa, ipo mwilongelaga mumwene pakuva lwendiwali.

¹⁴ Wone nene ye ndi Mutwa na Mwigisi venyu ndiwofwige amagulu nyenye, luvavaje nanye ukwiyofuga amagulu yinyenye kwa yinyenye.

¹⁵ Pakuva ndivapelye icholelesi ndawe nene lwendivapije, nayinyenye mupigage ndahihyo.

¹⁶ Nachene nguvalongela nyenye, umukami si muvina ukulutila Umutwa vakwe na umwigendo si muvina ukulutila yeamuletite.

¹⁷ Pemusikagwe iso na ukupiga muva muvafunyilile.

¹⁸ “Ing'ani isi sindilonga ukwimila nyenye mbemuli, ndivasele vala ve ndavahagwe. Neke luvaje Uwandike wukwile uwitigila; ‘Umunu yetwalilise ikilyo changu amitwike.’

¹⁹ Uluhuma ino nguvalongela wesilulava, sambi peluwonike mufuuwe ulwa, Nene ye Nene.

²⁰ Nachene nguvalongela, umwene yeakumwanukila umunu yeyendimuletaga ava akunzanukila nene, nave yeakunzanukila nene ava akumwanukila umwene yeandetite.”

Yesu ivila ukupitukwa

²¹ Nave Yesu ave ilonga iso ahuguve munumbula, neke alonge kimalamangi atigile, “Nachene nguvalongela umuyenyu uyumwi amituka.”

²² Avanyigendo ndawe vilavilige kono wevisina ulwa yenani yakumulonga.

²³ Na epwali uyumwi va avanyigendo vakwe yealahegime pamambaga ya Yesu, yeali mwende va Yesu.

²⁴ Swe Simoni Petulo akumusinisa ni liwoko ulwa, “Muwuse yenani yeakumulonga.”

²⁵ Ndawe umunyigendo yealateng'eme pipi na Yesu amuwusige, “Mutwa, ye nani?”

²⁶ Neke Yesu apitule, “Ye yula yendimupela inonge isabise mu kinyandilo,” Ndawe asabisige inonge na ukumupela Yuda umwana va Simoni Isikalyote.

²⁷ Yuda ave anukile inonge, Setani amwinje. Neke Yesu peamulongele, “Sewisaka upige; wangufye upige!”

²⁸ Pepagaya na yumwi mwaavevateng'eme ukulya ikilyo yalukagwe mbi kiki ikilesile amulongele ndahihyo.

²⁹ Neke avanu vahosige ukuta pakuva Yuda yeali mulolesi va ibogolo ya magobole, Yesu amulongelige ulwa gule fyetwisaka ifya uluhelelo, apangi, ulwa avapele avamikaa kinu.

³⁰ Yuda peanuche inonge ahumite kwivala lulusika lulo. Kangi che kilo.

Ululagilo ulupya

³¹ Yuda ave ihuma Yesu atige, “Ino Umwana va Umunu apelitwe indolo; nave Nguluvi apelitwe indolo mulumwene.

³² Na wone indolo sa Nguluvi siwoneche mulumwene, sweno, nave Nguluvi asivika pawelu indolo sa Umwana mugati mulumwene, ena apiga ndahihyo na sahaava.

³³ “Nye vana nyenye pendilipamwi na nyenye, lusika ludodo. Nanye musaka, neke ndawe lwe ngavalonje avalongosi va Avayudaya, nguvalongela kangi, ‘Kula kwesogwe nyenye simuhwaniti ukusa!’.

³⁴ Ululagilo ulupya nguvapela mwiyendage, ndawe lwe ndavendite nyenye na yinyenye mwiyendage ndahihyo.

³⁵ Wone mwiyende yinyenye kwa yinyenye avanu mbevali pevalukagula mwivanyigendo vangu.”

Yesu ivila ukuta Petulo amubihila

³⁶ Ndawe Simoni Petulo amuwusige, “Mutwa wibita kwi?” Yesu amupitwe, “Kwendibita veve suhwaniti ukuninila lino neke ukwene uninila pambele.”

³⁷ Petulo neke amulongele, “Mutwa mbi ndawuli ulwalino sinywaniti ukuninila!” Nene nawula uwumi wangu wimila veve.

³⁸ Neke amupitule “Be, veve utawula uwumi wako ukwimila nene? Nachene ngukulongela inzogolo wesiyilavika uva umbihye kadatu!”