Yohane 12 - Lufingano Lupya

Yesu ihululisiwa amafuta ku Betaniya

¹ Lwave filo fimutanda wesiyilafika i Pasaka Yesu afikite ku Betaniya kweikalige Lasalo yula yamusilibwise uluhuma mufwa.

² Ndawe vamugelanikisige kuko ikilyo cha pamihye nave Malita avapigilige; nayi Lasalo e yumwi va vavala avali vateng'eme Ukulya ikilyo.

³ Neke Maliya ategwe isupa iyilipinga ku lita yimwi ya amafuta amanofu ga nalido iyigusiwaga amagobole molofu, swe akumuhululisisa Yesu amagulu na ukumupuguha na ifwili sakwe swe mukaye mwinung'ilila wunofu.

⁴ Ndawe Yuda Isikalyote uyumwi va avanyigendo vakwe yula yeamupitwike atige,

⁵ “Mbi ndawuli amafuta agindawe iga sigagusiswi magobole dinali magana gadatu sambi vapelwe avamikaa?”

⁶ Nave alonzile iso si kwa lusungu ku vamikaa nda, alongelige uwuhiisi weeinawo pakuva yeali mulolesi va ibogolo ya magobole, nave ahiisige ifyemofili.

⁷ Neke Yesu atigile, “Mulamufwahisa umung'inetu uyu! Mumulekage angelanikise cheinacho, ukwimila ikimunyi cha ukutagwa kwangu muchanga.

⁸ Pakuva avamikaa mulipamwi nawo mbepali neke nene simbapamwi na nyenye mbepali.”

Ikigaho icha ukumuwulaga Lasalo

⁹ Swe avanu awolofu mu Yudaya vapulike ulwa Yesu ali kuko. Siwita vasakige ukumuwona Yesu hela pesi ukuta vasakige ukumuwona na yi Lasalo, yula ye Yesu alaamusilibwe uluhuma kuvafwe.

¹⁰ Ndawe avavina va avatambisi vagahige ukumuwulaga na yi Lasalo,

¹¹ ukwimila uwolelesi wa Lasalo Avayudaya wolofu vavagaluche vavabesise avavina vawo va kumufuuwa Yesu.

Yesu akwingila mu Yelusalemu kwa luheyo

¹² Pa ikimunyi icha kavili avanu wolofu vevasile ku Pasaka vevapulike ukuta Yesu akusa ku Yelusalemu.

¹³ Swe vitegula amatagala ga imikosi vihuma kukumutang'anila kono we viheya vitigila, “Hosana! Ye mufunyilile yakusa mwitawa lya Mutwa, mufunyilile Umutema va Isilaeli.”

¹⁴ Nave Yesu ave iletelwa ichana cha idogovi swe ihova ndawe we lwe lwandike.

¹⁵ “Ulogopa, ve mwanahinza va ku Sayuni! Lavage, Umutema vako akusa ahofile ichana cha idogovi.”

¹⁶ Ulusika lulo, avanyigendo vakwe sivasikaguligi ing'ani iso, neke Yesu peinje mundolo sakwe pepene peviwike ulwa andikilwe iso na ulwa vamupije siso.

¹⁷ Avanu avepamwi na Yesu peamukemelye Lasalo uluhuma muchanga na ukumusilibula uluhuma kuvafwe wolelelye lwe valuwene.

¹⁸ Palulo amalugu ga vanu vahele kukumutang'anila pakuva ve vapulike ukuta Yesu yapigite ikilagilo icho.

¹⁹ Neke Avafalisayo vilonganze vavene vitigila, “Nye mukuluwona? Ukuta situhwana ukupiga kinu! Mulavage ing'i mbeyili yikumuninila yumwene!”

²⁰ Pepina Avagiliki avamwi mwilugu lya avanu avevahele mukwifunya pa ikimunyi cha uluhekelelo ulo.

²¹ Iwo vahele kwa Filipo (munya ku Betisaida ya ku Galilaya) neke vamusuke vitigila, “Mulugu, hwehwe twisaka ukumuwona Yesu.”

²² Filipo swe ibita akumulongela Andeleya, neke avavili iwo Filipo na Andeleya, swe mbevali vibita vakumulongela Yesu.

²³ Nave Yesu avapitwe, “Ikivalilo kifikite icha Umwana va Umunu ukwanukila indolo!

²⁴ Nachene nene nguvalongela nyenye, ulupeke lwa ingano pesilugwi paluganga lufwe lwakwikala ndahihyo lwiyena, neke pelufwe lwalwiveleka hilo.

²⁵ Umwene yakuwuwenda uwunu wakwe awuyasa, yakuwuvipila uwunu wakwe mung'i umu awupoka mbaka kuwumi wa mbepali.

²⁶ Umunu yeiwenda ukumigila nene aninilage, sambi na pala pemba ndipwali nene, baho peava pwali umukami vangu. Na yeyeavesaga munu yeakunigila nene, nave Dada vangu amupela ululumbo.

Yesu ilonga ulwa ifwa yakwe

²⁷ “Lino inumbula yangu yihuguve nane nigile ndawuli? Nigile: ‘Dada, umoke mu kivalilo iki?’ Neke ulo lwelwene lwendasye sambi ngendele mu kivalilo iki cha uluteseko.

²⁸ Dada ulipele indolo ilitawa lyako.” Ipo iliswi lyapulise uluhuma kuchanya, “Yendilipelye indolo na kangi ndilipela indolo.”

²⁹ Ndawe vamalugu avevimite pipi vapulikige iliswi ilyo neke avangi vatigile kwina limadadama avamwi vatige, “Munyivaha alonzile nave.”

³⁰ Neke Yesu apitule atigile, “Iliswi ili silyusili kwa nene nda, lyusile kwa nyenye.

³¹ Ino ikivalilo cha ukuhigwa ing'i iyi kifikite, na umutema va ing'i iyi atoosiwe kwivala.

³² Nane peng'ang'wilwe pachanya ya ing'i ndivakwegela mbevali kwa nene.” (

³³ Pealongige de alagilige ifwa iyindawuli yakusa afwile).

³⁴ Neke vamalugu vamupitule, “Hwehwe twilongelwa mu ndagilo ulwa Kilisito saanana kitasila. Ino lwiva ndawuli pewitigila lumuvaje Umwana va Umunu ukukang'ulwa? Uyu Umwana va Umunu ye nani?”

³⁵ Neke Yesu avalongele, “Ulung'ali pelwipwali na nyenye lusika ludodo. Mugendelage lulo pelwiva lwipwali, sambi ulwisa lulemwe ukuvatindasa, pakuva yeigendela mulwisa saakupakagula peisogola.

³⁶ Sweno, ulusika lwe ulung'ali lwipwali pepene pemufuuwagwe; sambi muve avana va ulung'ali.” Pealonzile iso, Yesu ibitye akwifiha pataali na avene.

Uwutafuuwa wa avanu

³⁷ Nambi Yesu alapigite ifilagilo ifi mbefili pa avene, avene sivamufuuvitwi.

³⁸ Sambi lukwile ulukani lula ulwealonzile umuvisi Yesaya: “Mutwa, ye nani yeafuuvitwe ulukani lwetu? Na uludali lwa Umutwa yenani umulagile?”

³⁹ Palulo sivahwaniti ukufuuwa. Nambi Yesaya alonzile kangi,

⁴⁰ “Nguluvi avabofwise amiho gawo, na agubiche uluhala lwawo; sambi valemwe ukulava, na miho gawo valemwe ukulukagula na uluhala lwawo na ukumitukila nene sambi ndivaponie.”

⁴¹ Ing'ani iso alonzile Yesaya pakuva awuwene uwunyandolo wa Yesu swe ilonga ing'ani sakwe.

⁴² Neke ulwene, vemovali na avavina wolofu va Avayudaya avamufuuvigwe ino pakuva vawogopige Avafalisayo vifihige valonga vahakwe musinagogi.

⁴³ Pakuva vawendige ukusumilwa na avanu valeke ukusumilwa na Nguluvi.

Ing'ani sa Yesu sihiga

⁴⁴ Swe Yesu akwihuga liswi itigila, “Yeakufuuwa nene sakufuuwa nene hela, ava akumufuuwa yeandetite nene.

⁴⁵ Umunu yeyeavesaga akumbona nene ava akumuwona yeandetite.

⁴⁶ Nene nzusile mung'i nda lung'ali, sambi yeyeavesaga akufuuwa nene alemwe ukusigalila mulwisa.

⁴⁷ Wone umunu apulike ing'ani sangu neke abedale nene sindimuhiga. Pakuva singasili mwe kuhiga ing'i ngasile mukuyipoka.

⁴⁸ Yeyeakumbihila nene yesiakwidikila ing'ani sangu inave yeamuhiga, ulukani ulo lwendonzile lwelwene lwelumuhiga pa kimunyi cha uwusililo.

⁴⁹ Ulu lwa nachene, pakuva sindilonga kwa kwiyendela hela nda, ye Dada yeanumile andaje isa ukulonga na wengitage pakulonga.

⁵⁰ Nane ngulukagula ulwa ululagi lwakwe we wumi wa mbepali. Ino sendilonga iso, sesene seandaje Dada ndongage.”