Yohane 11 - Lufingano Lupya

Ifwa ya Lasalo

¹ Ino Umunu uyumwi e mutamwa ilitawa lyakwe Lasalo uva ku Betaniya, (munya boma yimwi na Maliya na umame Malita.

² Ye Maliya yula yamubakite Umutwa amafuta amanofu na ukumupuguha amagulu gakwe na ifwili sakwe, uyo e muhase va Lasalo yeali mutamwa.)

³ Swe avahase vituma umulomo kwa Yesu vitigila, “Mutwa umunyawiyendi vako mutamwa!”

⁴ Nave Yesu peapulike atige, “Uwutamwa uwu si wafwa nda; luve de sambi wulete indolo sa Nguluvi na indolo sa umwana va Nguluvi siwonekele mumo.”

⁵ Neke Yesu alamwenda Malita, na umwanakwave na yumwene Lasalo.

⁶ Ave ipulika ulwa Lasalo mutamwa ave peikala bahala peepwali filo fivili kangi.

⁷ Neke peavalongele avanyigendo vakwe, “Tubitage kangi ku Yudaya!”

⁸ Avanyigendo neke vamulongele “Labi! isusi hela, Avayudaya vakasakige ukukukinya na amaganga, nave peusogwe kuko?”

⁹ Yesu apitwe, “Mbi ifivalilo fya pamunyi sifinyichumi na fivili? Umunu peigenda pamunyi siakwikuvala, iwona uwelu wa ing'i iyi.

¹⁰ Neke wone agende pakilo ikuvala, pakuva uwelu wusumuli mulumwene.”

¹¹ Ave pe alonzile iso avalonje, “Umunyawiyendi vetu Lasalo agonelye ino ndibita ngamulamuse.”

¹² Neke Avanyigendo vamutigile, “Mutwa wone we agonelye hela, apona.”

¹³ Avene vahosige ulwa alongelige ulwa ukugonelela itulo, kumbi Yesu alongige ulwa ifwa ya Lasalo.

¹⁴ Sweno Yesu pe avalongele wima ukuta, “Lasalo afwe;

¹⁵ Nani ndihekelela wimila nyenye ukuta singekuko sambi mufuuwe. Apo tukabitage kulumwene.”

¹⁶ Ndawe Tomasi (Yeakemeligwe munyawendani) avalongelige avanyigendo avayagwe, “Tubitage nayihwehwe tukafwilase pamwi na yumwene!”

Yesu ye lusilibuko na uwumi

¹⁷ Yesu peyeafikite, afisile yeafwe na mutage filo wita nda fitayi de yefilutye.

¹⁸ I Betaniya ye wipi wa kilomita sidatu de ukubita ku Yelusalemu.

¹⁹ Na avanu wolofu va Avayudaya vevasile kwa Malita na Maliya kukuhungila ikivembo cha ifwa ya umuhasa vawo.

²⁰ Malita aveipulika ulwa Yesu akusa, ahele ukumutang'anila; na Maliya alasige pakaye.

²¹ Ndawe Malita amulongelige Yesu itigila, “Mutwa uke uvelage wipwali ipa umuhasa vangu sike afwa nda!

²² Neke nayilino ngulukagula ulwa checheumusuka Nguluvi, Nguluvi akupela.”

²³ Swe akumulongela, “Umuhaso asilibuka.”

²⁴ Neke Malita amulongele, “Ngulukagula ukuta saasilibuka palusilibuko ulwa kimunyi cha uwusililo ing'i.”

²⁵ Ndawe Yesu amutigilige, “Nene ye nene lusilibuko na uwumi. Umwene yeakufuuwa nene na afwe ava pe anana

²⁶ na yeinana nu kufuuwa sisaafwa kitasila. Ndawuli wifuuwa ulu?”

²⁷ Swe Malita akumulongela, “Ena Mutwa! Nene fuuvitwe ukuta veve ye Kilisito ve Mwana va Nguluvi, yeakusa mung'i.”

Yesu ivemba

²⁸ Nave ave ilonga iso ahele kukumukemela Maliya palubali neke atigile, “Umwigisi pwali akukukemela.”

²⁹ Nave ave ipulika ahesile kinyaganisa ibita kwa Yesu.

³⁰ Na Yesu siealafika mukijiji, epe alibahala peamutang'anie Malita.

³¹ Swe vala Avayudaya ave mukaye pamwi na Maliya vakumusikimika pevamuwene imihegele peihuma, vamufwatite kono wevitigila wanda asogwe akavembele pachanga.

³² Maliya ave ifika pala peepwali Yesu, nu kumuwona agwe pamagulu gakwe neke amulongele, “Mutwa, Uke uve wipwali ipa umuhasavangu sike afwa nda!”

³³ Yesu pamuwene ivemba, na vala Avayudaya avevamufwatite nawo vivemba; ahuguve hilo na ukukelagila munumbula.

³⁴ Swe itigila, “Mukamutasile kwi?” Ndawe vamulongelige, “Mutwa wuse ulave!”

³⁵ Yesu swe ivemba inzihosi.

³⁶ Ndawe Avayudaya vatigilige, “Mulavage lwealamwendite!”

³⁷ Neke avamwi vatigile, “Ndawuli uyu ye amuponise amiho yula, akalemilwe ukutanila Lasalo alemwe ukufwa?”

Yesu akumusilibula Lasalo

³⁸ Neke Yesu kono weahuguve munumbula afikite pachanga. Ichanga nacho che lipalika iligeleke iliganga pamulyango.

³⁹ Neke Yesu atigile, “Muhese iliganga” Malita, umuhase va uyo yealafwe amulonje, “Mutwa ino inung'a pakuva ave mufimba filo fitayi!”

⁴⁰ Neke Yesu peamulongele, “Singengulonje ukuta wone ufuuwe usiwona indolo sa Nguluvi?”

⁴¹ Swe vihesa iliganga lila. Yesu swe ilava kuchanya swe itigila, “Dada ngukulumba pakuva umulike.

⁴² Nani ndendilusele ulwa veve wakumulika mbepali, ndilonga ulu wimila umukong'ano gwa vanu ugu gwe gusile, vafuuwe ulwa ye veve ye wandetite.”

⁴³ Nave ave ilonga iso ihugite ikemela kwa liswi likomi, “Lasalo! hume kwivala!”

⁴⁴ Yula yealafwe ahumite kwivala mupilingise isanda mumagulu na mumawoko, na uwusu wugubike ikitema, nave Yesu swe akuvalongela, “Mumupilingule mukamuleke ibitilage.”

Ikigaho icha ukumuwulaga Yesu

⁴⁵ Avanu wolofu mu Vayudaya avevasile kwa Maliya na kusiwona sila seapigite Yesu vafuuvitwe.

⁴⁶ Neke avamwi vahele ku Vafalisayo nu kuvalongela seapigite Yesu.

⁴⁷ Ndawe Avafalisayo na avatambisi avavina vakong'anige vitigila, “Tugitage ndawuli? Pakuva umunu uyu ipiga ifilagilo fyolofu.

⁴⁸ Wone tumuleke, avanu mbevali vamufuuwa, na Avalumi vasa vatupoka ing'i yetu na ukwananga i tembeli ya Nguluvi!”

⁴⁹ Neke umunu uyumwi, mwa avene Kayafa yeali mutambisi muvina umwaka gula avalonje, “Nyenye simuluseli nambi lukani!

⁵⁰ Simwihosa ulwa luvaje umunu uyumwi afwe wimila avanu, sindawe ukuyasa avanu mbevali mung'i?”

⁵¹ Na ulukani ulo siilonji hela muluhala lwakwe, alonzile pakuva ali mutambisi muvina umwaka gula, avilige ukuta Yesu afwa wimila avanu va ing'i yawo,

⁵² kangi si ukwimila avanu va ing'i yawo hela, pesi ulwa peahwana ukuvakong'asa avana va Nguluvi avatagalye sambi vave valilumwi.

⁵³ Na Uluhuma kikimunyi kikila, avavina va Avayudaya vasakige ing'asi yevamuwulagila Yesu.

⁵⁴ Nambi Yesu siavi peagendela pawelu mu Vayudaya. Nave ahesile kuko ahele mbaka apono ape pipi na ibalali, ulutanana ulwatambuligwe Efulaimu, na kuko ikalite na avanyigendo vakwe.

⁵⁵ Na uluhekelelo lwa i pasaka ya Avayudaya lweluhegelye, na avanu wolofu vabitige ku Yelusalemu veswe inzanangifu sawo i pasaka pesiyilafika.

⁵⁶ Swe avene vavanzile ukumolela Yesu, vave vikong'ana mu tembeli viwusise we vavene ng'ani, “Mwiwona ndawuli? Mwitigila siasa lwa i Pasaka?”

⁵⁷ Avatambisi avavina na Avafalisayo vevalaje ulwa wone munu amuwone apono alongage sambi vamwibate.