Yohane 10 - Lufingano Lupya

Ikiganiso icha umukwamili ng'olo umunofu

¹ Yesu avatige, “Nachene nguvalongela nyenye; umwene yesigendela mukikolo peakwingila mwigagala ilya ing'olo igendela apangi uyo muhiisi kangi muposi.

² Neke yeakwingila mukikolo uyo yemukwamili ing'olo,

³ Umulolesi va ikikolo akumudindulila uyo na ing'olo sakumupulika iliswi lyakwe, nave akusikemala ing'olo amatawa gaso peilalusa yimwi yimwi sihume kwivala.

⁴ Nave pealalwe, akusilongolela kuwutalo, naso ing'olo sakumufwata, pakuva silisele iliswi lyakwe.

⁵ Na ing'olo iso, sisihwaniti ukumufwata umugenzi, simukimbila pakuva sisimuseli umugenzi iliswi lyakwe.”

⁶ Yesu avalonje ikiganiso iki neke avene valemwe ukukikagula icheavalongelige.

Yesu yemunyakukwamila umunofu

⁷ Nambi Yesu awilye kangi akuvatigila, “Nachene nene nguvalongela nene ye nene ndikikolo cha ing'olo.

⁸ Na mbevali vevalongwe ukusa, nene lwende ngali sindilasa, iwo ve vahisi na avaposi, nawo na sing'olo sisavapuliki.

⁹ Nene ye nene ndikikolo, umunu yeakwingila mwa nene, apokwa, ingila nu ukuhumanisa, nave awuwona uwukwamililo.

¹⁰ Umuhiisi sakusagi chaka, pesi ulwa akusaga sambi ahiise nu kuwulaga nu kuwulagila ng'ani. Nene ndasile, nyenye muve nu wumi, uwumi uwukwilaniche.

¹¹ “Nene ye nene nde mukwamila ing'olo umunofu. Umukwamila ing'olo umunofu akwitawula uwumi wakwe uwimila ing'olo sakwe.

¹² Umunu ye ihombwa amagobole, nave si mukwamila ing'olo nda kangi na sing'olo si fikwamilwa fyakwe, pembe awone ingwami yikusa, akusileka ing'olo ikimbila. Nayo ingwami yikwibata nu kusitagalisa.

¹³ Umunu ye ihombwa amagobole aikimbila pakuva umwene va amahombo na situgagi ulwa ing'olo.

¹⁴ Nene ye nene umukwamila ng'olo umunofu. Avangu ndivakagwe, nawo avangu vakung'agula nene,

¹⁵ ndawe dada lweakung'agula nene nane lwendimukagwe Dada. Nane nguwutawula uwumi wangu ukwimila ing'olo.

¹⁶ Posili ing'olo sangu isingi sesisupali mwigagala ili, lumbaje naso ndisilete; naso simulika liswi lyangu. Kuva na kipinga kimwi na umukwamili ng'olo yumwi.

¹⁷ “Nambi Dada anzenda pakuva nditawula uwumi wangu, sambi kangi ndiwutegule.

¹⁸ Sikwali umunu yeanzanuka uwumi wangu; pesi ulwa nguwutawula yinene hela. Uludali lwa ukutawula ndinalo, na uludali lwa ukuwutegulila kangi na lulo ndinalo. Na Dada ulo lweandaje mige.”

¹⁹ Swe kwave na kusutana kangi mu Vayudaya uwimila ing'ani isi.

²⁰ Awolofu vawo vatige, “Ina lisoka; kangi mugulufu! Mbi veki ukumupulikisa?”

²¹ Neke avangi vatigilage, “Ing'ani iso sa munu umunya lisoka, Mbi lisoka lihwanite liponie avanu avabofu valave?”

Yesu ibihilwa na Avayudaya

²² Ino uko ku Yelusalemu kwekwina uluhekelelo ulwa ukuyifunyilila itembeli. Lwe lusika lwa ikitungwi.

²³ Nave Yesu agendige mutembeli mu bwalo ya Solomoni.

²⁴ Ndawe Avayudaya vamupilimige neke vamuwuse, “Mbaka panili peutufwahisa? Mwene veve wi Kilisito. Siutulongele wima hela?”

²⁵ Yesu avapitwe ukutigila ndavalonje, “Neke nyenye mulemwe ukufuuwa. Ifipigo ifi fyendipiga mwitawa lya Dada vangu fyefyene ifikunzolelela.

²⁶ Ino nyenye simwifuuwa, pakuva musumuli mukipinga cha ing'olo sangu.

²⁷ Ing'olo sangu sasipulika iliswi lyangu; na ndisikagwe, na sasikuninila.

²⁸ Ndangusipela uwumi wa mbepali, na sisasiyaga nda. Na sikwali umunu yeahwanite asaanuke mwiwoko lyangu.

²⁹ Dada vangu yeamelye iso muvina ukulutila mbevali na sikwali munu yeahwanite ukusaanuka mwiwoko lya Dada.

³⁰ Dada na nene tulilumwi.”

³¹ Neke kangi Avayudaya vasave amaganga sambi vamukinye.

³² Neke Yesu avatige, “Ifipigo ifinofu fyolofu ndivalaje ifihuma kwa Dada, ino kipigo ikindawuli mwa ifyo ikileka mung'inye na amaganga?”

³³ Avayudaya vamupitwe, “Situkukukinya na amaganga wimila ifipigo ifinofu nda, tukukuvala uwulonga fivi! Pakuva veve wimunu hela, ino wawigela wivike wi Nguluvi.”

³⁴ Neke Yesu apitwe, “Si lwandikwi mundagilo senyu ulwa nene nige, ‘Nyenye mwivanguluvi?’

³⁵ Nguluvi avatige vanguluvi vala avapelitwe ulukani lwakwe, nahwe tukulukagula ulwa Uwandike Uwelu wilongela mumwene.

³⁶ Yula ye Dada amofwige na ukumutuma mung'i, nyenye mukumutigila: ‘Mulonga fivi,’ ngali pakuva lulu lwe nige: ‘Nene ndimwana va Nguluvi?’

³⁷ Pe sindipiga fipigo fya Dada vangu apo mutane ukufuuwa.

³⁸ Neke ulwene namuve simukufuuwa apo mufuuwe fifipigo ifyo fyendipiga sambi mulukagule ulwa Dada alimugati mwa nene nani ndilimugati mwa Dada.”

³⁹ Ndawe vagelige kangi ukumwibata swe isupatuka mumawoko gawo!

⁴⁰ Swe akwibitilaga kangi kumwambu ya umukoga gwa Yolodani mbaka apono peabatisige Yohane ndawe ikalige kuko.

⁴¹ Na avanu awolofu vamufwatite, “Nachene Yohane siapigiti nambi kilagilo nda. Neke mbesili sealonzile Yohane isa uyu salisanachene.”

⁴² Neke uko vamufuuwe vanu wolofu.