Yohane 1 - Lufingano Lupya

Lukani lwave munu

¹ Pamuvango kwekwina lukani, nave lukani e na Nguluvi, nave lukani e Nguluvi.

² Uluhuma pamuvango lukani e ali na Nguluvi.

³ Mbefili fyagafilwe ukukola mwa yuyo; eave si yuyo chekiva kisukuli chechekigawa.

⁴ Mugati mulumwene mwe mowoli uwumi na uwumi wula we lung'ali lwa avanu.

⁵ Na ulung'ali lwing'alika mulwisa na ulwisa, lwalemilwe ukusimya.

⁶ Pepina munu umutume uluhuma kwa Nguluvi ilitawa lyakwe Yohane,

⁷ uyo aasile mwewolelesi sambi olelele ulwa ulung'ali lula. Neke mbevali sambi vafuuwe ukukola kulumwene.

⁸ Uyo sie lung'ali lula nda aasile olelele hela ulwa ulung'ali.

⁹ Ulung'ali lwa nachene ulwing'alikila yeyeavesaga lukusa mung'i.

¹⁰ Lukani emwali mung'i, nave ing'i we yagafilwe ukukola kulumwene ing'i siyamukagwi.

¹¹ Aasile ukwawo, neke avanu vakwe sivamwanuchi.

¹² Neke vala mbevali avamwanuche neke vamufuuwe avapelye uludali lwa ukuva vana va Nguluvi.

¹³ Vevegilwe kwa uludali lwa Nguluvi na si kwa uludali lwa munu nambi ing'asi isa uwunu.

¹⁴ Nave Lukani ave munu swe akwikala kwa hwehwe amemile uwuwuya na uwanachene, nahwe swe tukuwuwona uwunyandolo wakwe, uwunyandolo ndawe wa Umwana yeiyena yeihuma kwa Dada.

¹⁵ Yohane avalonje avanu ing'ani sakwe itigila, “Uyu ye mwene yengalongige ing'ani sakwe penditigila: ‘Pakuva uyu yeeikwali nene pesindilawoneka.’”

¹⁶ Ukuhuma mumikwilanikile jakwe hwehwe mbetuli twanuche uwufunyilile wa uwuwuya wolofu.

¹⁷ Pakuva ululagilo lwasile ukukola mwa Musa, uwuwuya na uwanachene fyasile ukukola mwa Yesu Kilisito.

¹⁸ Asukuli umunu yealamuwene Nguluvi ulusika mbeluli. Umwana yeiyena yeategine na Nguluvi, yealipamwi na Dada, uyo yeamuwuyipe Nguluvi akagulanike.

Uwolelesi wa Yohane Umubatisi

¹⁹ Yohane olelelye pa Avatambisi na Avalevi avevatumitwe na Avayudaya ukuhuma ku Yelusalemu vamuwuse ulwa, “Veve wi nani?”

²⁰ Nave alonzile wima hela sahwi akikana ulwa, “Nene sindi Mesiya.”

²¹ Neke pevemuwuse, “Ino winani? Veve wi Eliya?” Neke atigile, “Nene nda?” Veve ye muvisi yula neke atigile, “Nda!”

²² swe vitigila, “Mbi ino winani? Tukavalongele vala avatutumite veve ukwitigila winani?”

²³ Swe itigila, “Nene ndiliswi lya umunu yeikoola mubalali mugololage ing'asi ya Umutwa, ‘Ndawe lwe alonzile umuvisi Yesaya.’”

²⁴ Na vala avali vatume vevahumite ku Avafalisayo,

²⁵ neke vamuwuse vakumutigila, “Mbi ino ndawuli wibatisa wone veve si wi Kilisito nambi Eliya nambi umuvisi yula?”

²⁶ Neke Yohane avapitule, “Nene ndibatisa kwa lulenga pagati pa nyenye imile umwene yesimukumukagula nyenye.

²⁷ Ye mwene yula yeakusa mu mbele mwa nene yesinywanite ukuhogosa inzisi sa indatu sakwe.”

²⁸ Iso sapigike ku Betaniya mu mwambu ya umukoga gwa ku Yolodani, kweeikwali Yohane peibatisa.

Mwana ng'olo va Nguluvi

²⁹ Ikimunyi cha kavili Yohane amuwene Yesu akusa kulumwene, neke atigile, “Uyu ye mwanang'olo va Nguluvi, ihesa inzanangifu sa mung'i!

³⁰ Uyu ye mwene yengalongige ing'ani sakwe ulwa, ‘Yeakusa munu mu mbele mwa nene, yeandutye pakuva eikwali nene pesindilawoneka!’

³¹ Nene sindendimuseeli, ino ndasile mukubatisa nu lulenga sambi avanu va Isilaeli vamukagule.”

³² Kangi Yohane neke olelele itigila: “Ndamuwene umuhe akwika nda ngunda uluhuma kuchanya nave swe akwika pachanya palumwene.

³³ Nayinene sindendimuseeli neke umunyakusindika kukubatisa na ululenga uyo andonje: ‘Umwene yumuwona Umuhe akwika na ukwima pachanya uyo ye munyakubatisa nu Muhe Mwelu.’

³⁴ Nane ndafile kangi nzolelelye ulwa uyu ye Mwana va Nguluvi.”

Avanyigendo avakutala va Yesu

³⁵ Kangi ikimunyi icha kavili, Yohane eimite pamwi na avavili va avanyigendo vakwe.

³⁶ Amulavye Yesu pigenda neke atigile, “Uyu ye mwanang'olo va Nguluvi.”

³⁷ Avanyigendo avavili vala vapulike pilonga nu kumuninila Yesu.

³⁸ Yesu apitwike, nu kuvawona pevakumuninila neke avatigile, “Mwisaka kiki?” Swe avanyigendo vakumulongela, “Labi wakwikala kwi?” (Labi-kwe kutigila “Mwigisi”)

³⁹ Neke Yesu avalongele, “Muse nanye mupawona.” Swe avanyigendo vala vibita nu kupawona peakwikala ndawe vahwesige nave ikimunyi icho.

⁴⁰ Andeleya, umwanakwave va Simoni Petulo, eyumwi va vala avavili vevamupulike Yohane nu kumuninila Yesu.

⁴¹ Uyo amuwene tandi Simoni umame nu kumulongela, “Tumuwene Mesiya.” (kwekutigila Kilisito)

⁴² Neke peamusindike kwa Yesu. Nave Yesu neke amulavile Simoni atigile, “Veve wi Simoni Mwana va Yohane, nave ukemelwa Kefa.” (Kwekutigila Petulo, apangi, “Liganga”.)

Yesu akuvakemela Filipo na Nataneli

⁴³ Ikimunyi icha kavili Yesu asakige ukuhega abite ku Galilaya, Ndawe amuwonige Filipo. Neke Yesu amutigile, “Ninile.”

⁴⁴ Nave Filipo e munu va ku Betisaida, munyaboma ya kwa Andeleya na Petulo.

⁴⁵ Ndawe Filipo amuwonige Nataneli neke amulongele, “Tumuwene umwene yeandikilwe na Musa mundagilo na mu vavisi Yesu va ku Nasaleti Umwana va Yosefu.”

⁴⁶ Neke Natanaeli amutigile, “Yagu luhwanite, kihume kinu kinofu uluhuma ku Nasaleti?” Filipo amupitule, “Wuse wilavile.”

⁴⁷ Swe Yesu akumuwona Natanaeli akusa kulumwene ndawe amulongige, “Lavage! mu Isilaeli mugadaga mugati mulumwene mugaya gila nda.”

⁴⁸ Neke Natanaeli pamupitule, “Mbi veve ung'agwe ndawuli?” Yesu amupitule amutigile, “Wesialakukemela Filipo puke pasi pa musombe ngenguwene.”

⁴⁹ Nataneli pamutigile, “Labi, veve wi Mwana va Nguluvi. Ye veve ve Umutema va Isilaeli!”

⁵⁰ Neke Yesu apitule amutigile, “Pakuva ngulonje ulwa ngenguwene pasi pa musombe wifuuwa? Usiwona ing'ani ingomi isilutye mwa isi”

⁵¹ Neke Yesu pamulongele, “Nachene nguvalongela muwuwona uwulanga wudindwike na vanyivaha va Nguluvi vakwilila nu kwika muchanya mulu Mwana va Umunu.”