ZEKHARIAH 5 - Lai (Hakha) Common Language Bible 2006

A Zuangmi Cazual

¹ Cunglei kha ka hun zoh ṭhan i a zuangmi cazual kha ka hmuh.

² “Zeidah na hmuh,” tiah a ka hal i, “A zuangmi cazual, dong kul a sau i dong hra a kaumi,” tiah ka leh.

³ “Mah hihi ram pumpi a cultu chiatserhnak a si; khattelei kam i ṭialmi hin mifir vialte kha hloh dih an si lai i khattelei kam i aa ṭialmi hin lih in chiat a sermi vialte kha hloh dih an si lai.

⁴ Ralkapbu Bawipa nih, ‘Ka thlah cang i mifir hna inn kip ah le ka min in lih in chiat a sermi vialte hna inn kip ah a lut lai, khi inn chungah a um lai i a thing he a lung he a hrawh dih hna lai,’ a ti,” tiah a ti.

Bawm Chung Minu

⁵ Bia a ka ruahtu vancungmi cu a hung chuak i a ka thawh i, “A hung chuakmi thil khi hei zohhmanh,” tiah a ti.

⁶ Zeidah a si? tiah ka hal i, “Bawm nganpi,” a ti; A sullam cu, ram chung dihlak sualnak, ti a si.

⁷ Bawm cu suan i sermi chin a ngei i ka zoh ko lioah cun a chin cu an hun i a chungah cun minu pakhat kha a ṭhu ko.

⁸ Cun vancungmi nih cun aa thawh i, “Hi nu sullam cu ṭhat lonak a si,” a ti i minu cu bawm chungah khan a vun nam chih i suan tlap cu bawmka ah khan a chinh.

⁹ Cun khua ka hei zoh ṭhan i nu pahnih an ra chuak i khulrang in an zuan kha ka hmuh, vaca bantukin thla an ngei i bawm kha van le vawlei karah an zuanpi.

¹⁰ Bia a ka ruahtu vanmi kha, khuazei ah dah bawm cu an kalpi lai, tiah ka hal i,

¹¹ “Shinar ram ah an kalpi i cuka ah cun a caah inn pakhat an sak lai i cu inn cu lim a si tikah a chungah cun bawm cu an chiah lai i an biak lai,” tiah a ka leh.