SALM 98 - Lai (Hakha) Common Language Bible 2006

Vawlei Uktu Pathian Thangṭhat U

¹ Bawipa cu hla thar in thangṭhat tuah u, khuaruahharmi thil kha a tuah hna! A ṭhawnnak le a thiangmi a thazang in ral kha a tei hna.

² Bawipa nih cun ral a tei hnanak thawng kha a thanh i a khamhnak ṭhawnnak kha miphun vialte a hngalhter hna.

³ Israel mi bia a kamhmi hna kha a zulh i an cungah a fekmi dawtnak a ngei i zumhawktlak in a um. Kan Pathian nih ral a teinak kha mi vialte nih khuazakip ah an hmuh.

⁴ Vawlei mi vialte hna, lunglawm in Bawipa cu hla in thangṭhat tuah u; lawmhnak hla in thangṭhat u law a au in au u!

⁵ Bawipa thangṭhatnak hla cu sa u, thangṭhatnak hla cu tingtang he ṭhuan hna u.

⁶ Muko le tuukawng ki tum hna u law Bawipa, siangpahrang hmaiah cun lunglawm in au u.

⁷ Rili le a chung i a ummi thilnung vialte hna, awn tuah u! Vawlei le a cung i a ummi thilnung vialte hna, hlasa tuah u!

⁸ Maw rilipi hna, nan kut beng tuah u; maw tlang hna, Bawipa hmaiah cun lunglawm in hlasa tuah u,

⁹ zeicahtiah amah cu vawlei uk awkah a ra cang. Vawleicung mi vialte cu dinnak le ruannak in a uk hna lai.