SALM 91 - Lai (Hakha) Common Language Bible 2006

A Kan Hupphengtu Pathian

¹ Himnak hmuh duh ah Cung Nung Bik kha a fuhmi le Lianngan Bik huhphenhnak chung ah aa dormi nih cun,

² “Bawipa, nangmah cu a ka chanhtu le a ka hupphengtu na si! Nangmah cu ka Pathian na si; nangmah cu kan bochan,” an ti lai.

³ Hmuh lomi thil ṭihnung vialte le thihnak zawtnak vialte chungin him tein an huhphenh hrimhrim lai.

⁴ A thla in an huh lai i him tein na um lai; zumhawktlak a sinak nih khan an huhphenh lai i him tein an umter lai.

⁵ Zan i a chuakmi ṭihnung kha na ṭih hna lai lo, chun ah ruahpak loin a chuakmi cantiang zong kha na ṭih lai lo;

⁶ mui lak i a ummi rai zong kha na ṭih lai lo i chun ceu i mi a that cuahmahmi ngal-eu zong kha na ṭih lai lo.

⁷ Na pawng ah mi thong khat an thi ko lai, na velchum ah thong hra zong an thi ko lai, sihmanhsehlaw nang cu zeihmanh nih an tawng lai lo.

⁸ Miṭhalo cu zeitindah dantatnak a in kha na zoh lai i na hmuh lai.

⁹ Bawipa cu chanhtu ah naa ser i Cungnung Bik cu hupphengtu ah naa ser caah

¹⁰ harnak zeihmanh nih an tlunhnawh kho lai lo i vanchiatnak zeihmanh na inn a phan lai lo.

¹¹ Na kalnak kip i nangmah zohkhenhtu dingah Pathian nih a vancungmi kha a chiah hna lai.

¹² An kut in an in dawmh lai i lung ah na ke kha naa khawng lai lo.

¹³ Chiandeih le rul kha na lamh hna lai, chiandeih ṭih nungnung le rul sivai ṭhawngṭhawng kha na lamh chih len hna lai.

¹⁴ Pathian nih, “A ka dawmi cu ka khamh hna lai i a ka hngalmi cu ka huhphenh hna lai.

¹⁵ An ka auh tikah ka leh hna lai i harnak an in tikah ka umpi hna lai. Ka chuah hna lai i ka upat hna lai.

¹⁶ Laksawng ah nun sau ka pek hna lai i ka khamh hrimhrim hna lai,” a ti.