SALM 76 - Lai (Hakha) Common Language Bible 2006

Teitu Pathian Asaf Hla

¹ Pathian cu Judah ram chungah an hngalh ngaingai i Israel ram ah a min a thang.

² A umnak inn cu Jerusalem ah khan a si i Zion Tlang cungah khan khua a sa.

³ Cuka ah cun ral pawl an cantiang kha a khiah dih hna i an phaw le an nam zong kha a hrawh dih hna — an hriamnam vialte kha a hrawh dih.

⁴ Zeitluk in dah na sunparnak cu a lianhngan, maw Pathian! Na ral na tei hnanak tlang in na ra kir tikah khan, zeitluk in dah na rumra kha a ngan!

⁵ An ralkap ralṭha pawl cu an hranchaw kha na chuh hna i atu cu thihnak hngilh in an i hngilh cang; an hriamnam a run hmangtu dingah a tangmi pakhat hmanh an um lo.

⁶ Na ṭhih hna tikah maw Jakob Pathian, an rangtum vialte le an rangcung ralkap vialte cu an ril dih!

⁷ Sihmanhsehlaw nangmah cu mi nih an in ṭih hringhran ko! Na thin a hun ahcun ahodah na hmaiah a dir ngam lai?

^8-9 Vawleicung i hremnak a ingmi vialte hna khamh awkah; nangmah nih na biakhiahnak cu thanh awk i na thawh tikah, na biakhiahnak cu vancung khin na run langhter i vawlei cu a thin a phang i dai tein a um.

¹⁰ Minung thinhunnak nih cun nangmah thangṭhatnak tu kha a karhter chin lehlam; ral chungin a nung in a tangmi hna nih na puai kha an tuah hna lai.

¹¹ Kan in pek lai tiah nan i kammi kha Bawipa nan Pathian cu pe u; kan pawngkam i a ummi miphun hna, Bawipa cu laksawng ra pe u. Pathian nih minung cu amah ṭih dingin a ser hna,

¹² a ruam a kaimi bawi kha a ṭhumh hna i siangpahrang nganngan kha therphang lengmang in a umter hna.