SALM 65 - Lai (Hakha) Common Language Bible 2006

Lawmhnak le Thangṭhatnak David Hla

¹ Maw Pathian, nang cu kan thlacamnak a kan lettu na si caah

² Zion ah kan in thangṭhat lai i na sinah bia kan i kammi kha kan in pek lai.

³ Mi vialte nih an sualnak cu na hmaiah an phuan lai: kan sualnak cu kan caah a rit tuk hringhran, nangmah lawnglawng nih na kan thianhpiak khawh.

⁴ Nangmah nih na thimmi hna cu an lung aa lawm, na hmunthiang ah na umtermi hna mi lunglawm an si! Na inn chung i a ummi thil ṭha cu kan khim lai i a thiangmi na biakinn chung thil ṭha cu kan i zaa lai.

⁵ Maw Pathian, kan Khamhtu, thla kan cam tikah na kan leh i khuaruahhar thil na tuahmi in na kan khamh. Vawleicung mi vialte le a hla bik rili ral i a ummi hmanh nih an in bochan.

⁶ Na ṭhawnnak in tlang pipi hna cu an umnak hmun ah khan na umter hna i a ṭhawngmi na lianhngannak cu na langhter.

⁷ Rili thawng cu na daihter i tilet thawng cu na nemter; mi au thawng cu na daihter.

⁸ Thil lianngan na tuahmi hna ruangah vawlei cu a dihlak in a thin a phang. Vanhramdeng in vanhramdeng tiang na tuahmi thil kha mi nih an thangṭhat i an lawmh.

⁹ Ram cu na dawt caah a cungah ruah na surter; na rumter i a vawlei na ṭhatter. A chung i na umtermi tiva cu an kao bal lo, cu tiva hna nih cun rawl a phunphun an chuahter — cucu nangmah tuahmi a si.

¹⁰ An thuanmi lo cu ruah ti na pek i ciap tein ruah nih cun a surh; vawlei cu na nemter i thlaikho kha na ṭhanter hna.

¹¹ Na ṭhatnak nih kum ṭha a vuiter. Na kalnak paoh ah rawl tampi a um.

¹² Saṭil tlonnak hmun cu saṭil run in an khat i tlangpang hna cu lawmhnak in an khat.

¹³ Ram hnonak hmun cu tuu in an khat i nelrawn cu facang in an khat; lunglawmhnak in an au i hla an sa.