SALM 63 - Lai (Hakha) Common Language Bible 2006

Pathian Ka Ngai David Hla

¹ Maw Pathian, nangmah cu ka Pathian na si, nangmah cu kan ngai. Ka nunnak nih hin an hlam i ka thlarau nih tihal in an hal; vawlei ro nih ti a duh bantuk khin an duh.

² Hmunthiang ah cun in hmu ning law zeitluk in dah na lianhngan le na sunpar kha in hngal ning, ti ka duh.

³ A fekmi na dawtnak cu nunnak nakin a ṭha deuh, cucaah cun nangmah cu kan thangṭhat lai.

⁴ Ka nun chung paohpaoh cu kan lawmh lai; nangmah leiah ka kut ka hler lai i thla ka cam lai.

⁵ Ka nunnak cu rawldangh bantukin aa dang lai i a khim lai, cun nangmah thangṭhat lawmhnak hla kha ka sa lai.

⁶ Ihkhun cung i ka ih tikah nangmah cu kan thei, zan khuadei nangmah kha kan ruat,

⁷ zeicahtiah nangmah cu a kan bawmtu na si zungzal. Na thla tangah lawmhnak in hla ka sa.

⁸ Nangmah kha kan tlaihchan i na kut nih him tein an ka umter.

⁹ Keimah thah a ka zalmi kha mithi khua ah an kal lai;

¹⁰ raltuknak hmun ah khan an thi lai i an ruak cu cenghngia nih an ei hna lai.

¹¹ Pathian thawngin siangpahrang cu aa lawm lai; Pathian min in biakamnak a tuahmi vialte hna cu an i lawm lai, sihmanhsehlaw milihchim hna cu an kaa phih a si lai.