SALM 55 - Lai (Hakha) Common Language Bible 2006

Leirawi Hmangmi Ruang Thlacamnak David Hla

¹ Maw Pathian, ka thlacamnak cu ka ngaihpiak law kan nawlnak cu ka hlonhpiak hlah.

² Ka bia kha ka ngaihpiak law ka let tuah; lungrethei in ka baa tuk hringhran cang.

³ Ka ral nih an ka tlerhnak le miṭhalo nih an ka hremnak nih ka lungre an ka theihter. Ka cungah harnak an tlunter; ka cungah an thin a hung i an ka huat.

⁴ Ka lung cu ṭihnak in a khat, an ka thah sual lai ti kha ka phang tuk.

⁵ Ka ṭih tuk ah a ther in ka ther i ka luthlung in ka kechik tiang ka ther dih.

⁶ “Ṭhuro bangin thla cu ngei ning law ka zuang hnga i ka vaa din hnga!

⁷ Lamhlapi ah khin ka zuang hnga i ramlak ah inn ka vaa sak hnga.

⁸ Thlichia le ruahpi chung hin dornak hmun kha khulrang in ka hmuh ko hnga,” ka ti.

⁹ Bawipa, annih cu hrawk hna law an biachimmi cu tuainak ah canter; khuapi chungah ka hmuhmi thil cu zaang-ennak le i tuainak a si.

¹⁰ Chunzan in khuapi cu a kulhnak hau cungin an chawhhnawh lengmang; harnak le thil ṭhalo tuahnak in a khat.

¹¹ A kenkip ah rawhnak a um, a chung lam hna cu pakhat le pakhat i hremnak le hlennak in a khat.

¹² A ka nihsawhtu hi ka ral si seh law cu, ka in khawh ko hnga, ka cung i tluang a khawng lentu hi a ka dohtu kha si seh law cu, a ka hmuh khawh lonak hmun ah ka thuhtak diam ko hnga;

¹³ sihmanhsehlaw hi bantukin ka cungah rian a ṭuantu cu ka hawi, ka rianṭuan hawi le keimah he aa naih ngaimi ka hawikom na si tikah hin a fak tuk hringhran in ka thei.

¹⁴ Pakhat le pakhat bia ṭhaṭha kha kan rak i ruah i hawi zapi he hmunkhat ah biakinn ah kan rak kal ṭi tawn.

¹⁵ Ka ral hna cungah cun thihnak kha khulrang in tlung seh law mithi khua ah khan a nung in vung kal hna seh. An inn chung le an lung chungah ṭhat lonak a um.

¹⁶ Sihmanhsehlaw Bawipa Pathian cu ka bawm tuah tiah ka auh i a ka khamh lai.

¹⁷ Ka ainak le ka hramnak cu zing siseh, chun ah siseh, zan ah siseh, amah sinah an kai zungzal ko i ka aw cu a ka theihpiak ṭheo lai.

¹⁸ Ka ral tampi hna he kan i tuknak hmun in him tein a ka kirpi ṭhan ko lai.

¹⁹ Zungzal in uktu a simi Pathian nih ka bia cu a ka theihpiak lai i annih cu a sunghter hna lai; annih nih amah cu an ṭih lo caah an tuah khawhmi zeihmanh a um lai lo.

²⁰ Hlanlio ka hawi nih khan a hawi lila cu a tuk hna; a biakam cu a zul lo.

²¹ A chimmi bia cu thawhpat nakin a nal deuh sihmanhsehlaw a lung chungah cun huatnak a um; a bia cu chiti bantukin a nem, sihmanhsehlaw nam bantukin mi a chun.

²² Na thilri cu Bawipa sinah ṭhum ta law amah nih an bawmh lai; miṭha cu zeitikhmanh ah a sunghter bal lai lo.

²³ Sihmanhsehlaw Bawipa, nangmah nih lainawng mi hna le lihchim mi hna cu vawlei tang khor thukpi ah khin an chan ṭim hlanah na thlak hna lai. Kei tu nih cun nangmah kha kan bochan lai.