SALM 50 - Lai (Hakha) Common Language Bible 2006

Biaknak Taktak

¹ Lianngan Bik Pathian Bawipa nih bia a chim; vawlei cu a dihlak in nichuahlei in nitlaklei tiang a auh.

² Pathian cu Zion in ni bangin a rung tlang, dawhnak ah a tlingmi khua chung cun a rung tlang.

³ Kan Pathian cu a ra lio, sihmanhsehlaw dai tein a rat cu a si lai lo, a alh hluahmahmi mei a hmaiah khan a um i ṭih a nungmi thlichia nih a zual.

⁴ A mi kha bia a ceih hna i van le vawlei kha tehte ah a auh hna.

⁵ Aa thawh i, “Zumhawktlak a simi keimah sinah raithawinak in biakamnak a tuahmi ka mi hna kha ka sinah pum hna u,” a ti.

⁶ Van nih khin, “Pathian cu a ding, amah hrimhrim kha biaceihtu a si,” tiah an chim.

⁷ “Ka mi hna, ka bia ngai u law bia ka chim lai; Israel, nangmah cu fiang tein kan hngalhter lai. Pathian cu keimah hi ka si i keimah cu na Pathian ka si.

⁸ Nan ka pek zungzalmi raithawinak le khanghthawinak ruangah kan sik hna a si lo.

⁹ Nan lo chung nan cawtum hna le nan meheh run chung meheh hna kha ka herhmi an si lo,

¹⁰ zeicahtiah ramlak i a ummi saram vialte hi keimah ta an si dih i tlang thong khat cung i a tlongmi saṭil vialte khi keimah ta an si dih.

¹¹ Ramlak i a ummi va vialte cu keimah ta an si i lo lak i a ummi thilnung vialte zong keimah ta an si dih.

¹² “Ka rawl ṭam seh law kan chim hna lai lo, zeicahtiah vawlei le a cung i a ummi thil vialte cu keimah ta an si dih.

¹³ Cawtum sa cu ka ei hna maw? Meheh thi cu ka din maw?

¹⁴ Pathian sinah lawmhnak chim cu nan raithawinak si seh law Lianngan Bik cu kan in pek lai tiah nan i kammi pekchanh awk vialte kha pechan ko u.

¹⁵ Harnak a phak tikah ka au u, kan khamh hna lai i nan ka thangṭhat lai,” a ti.

¹⁶ Sihmanhsehlaw Pathian nih miṭhalo cu a thawh hna i, “Zeicahdah ka nawlbia cu nan ciah len ko? Zeicahdah ka biakamnak kong cu nan chim len ko?

¹⁷ Kan chimhhrin hna lai, ka ti tikah nan duh ṭung lo, ka nawlbia kha nan hlawt ko ṭung hna.

¹⁸ Mifir nan hmuh tikah a hawi ah nan i cang i vacung pa duhmi hna he nan i kom.

¹⁹ Ṭhat lonak bia chim kha nan i tim zungzal i lihchim kha a sum in nan i sum lo.

²⁰ Nanmah nan unau congoih kha nan i tim zungzal, midang sual kawl lawng kha nan duh.

²¹ Hi vialte hi nan tuah i keimah nih cun zeihmanh ka chim lo, cucaah nanmah bantuk ah nan ka ruah. Sihmanhsehlaw atu cu kan sik cang hna lai i thil kha fiang tein kan hngalhter cang hna lai.

²² “Zei i a ka rel lomi hna, hihi ngai tuah u, nan ngaih lo ahcun kan hrawh hna lai i ahohmanh nih an in khamh kho hna lai lo.

²³ Lawmhnak chim hi keimah upatnak thawinak cu a si, ka nawl a ngaimi cu ka khamh hrimhrim hna lai,” a ti.