SALM 43 - Lai (Hakha) Common Language Bible 2006

Sal I A Tangmi Thlacamnak

¹ Pathian, ka sual lo kha ka thanhpiak law Pathian zei i a rel lomi hna lakah hin ka bia ka chimpi tuah; lihchim hmangmi le miṭhalo hna kut chung hin ka chuah tuah.

² Nangmah cu a ka hupphengtu Pathian na si; zeicahdah na ka kaltak? Ka ral nih an ka hremnak hi zeicahdah ka in zungzal ko lai?

³ Na ceunak le na biatak cu run thlah hna law, ka hruai hna seh na tlang thiang Zion ah cun ka kalpi ṭhan hna seh law na umnak na biakinn ah cun ka hruai hna seh.

⁴ Cun Pathian, nangmah nih lunglawmhnak le thanuamnak na ka pek caah, na biakṭheng ah cun ka hung kal lai; ka tingtang cu kaa tum lai i nangmah thangṭhatnak cu hla in ka sa lai, Maw Pathian, ka Pathian.

⁵ Zeicahdah ka ngaih a chiat? Zeicahdah ka lungre a theih? Pathian cu kaa bochan ṭhan lai i ka Khamhtu le ka Pathian cu ka thangṭhat ṭhan lai.