SALM 36 - Lai (Hakha) Common Language Bible 2006

Minung Sualning David Hla

¹ Sualnak nih miṭhalo cu a lungchung thukpi ah bia a chimh i Pathian kha a hlawt i a ṭih lo.

² Amah le amah sang tuk i aa ruah caah cun Pathian nih ka sualnak kha a hmu lai lo i sual a ka phaw lai lo tiah a ruah.

³ A kaa chuak bia cu bia ṭha lo le lih lawng an si i mifim si i thil ṭha tuah kha a ngol cang.

⁴ Ihkhun cung i a zau lio hmanh ah thil ṭha lo lawng kha a tuak, a tuahmi kha thil ṭha a um lo i thil ṭha lo kha a hua hna lo.

Pathian Ṭhatnak

⁵ Bawipa, a fekmi na dawtnak cu van a tawng i zumhawktlak na sinak cu van a phan.

⁶ Na dinnak cu tlang nganpi bantukin a fek i na biakhiahnak cu rilipi bantukin a thuk. Bawipa, nangmah nih minung le saram cu na zohkhenh hna.

⁷ Maw Pathian, zeitluk in dah na dawtnak hi a sun! Na thla tangah mi nih dornak an hmuh.

⁸ Na inn in a chuakmi rawl kha duhdim tein an ei i na ṭhatnak tiva chung khan ti na pek hna.

⁹ Nang cu nunnak vialte hram na si; nangmah ceunak thawngin kannih nih ceunak kha kan hmuh.

¹⁰ Nangmah an hngalmi kha daw zungzal ko hna law a dingmi cungah khan ṭhatnak tuah zungzal ko.

¹¹ Miruamkai nih khan ka tu hna hlah seh, miṭhalo nih khan ka zamter hna hlah seh.

¹² Miṭhalo an rilhnak kha zohhmanh! Khika ah khin an ril, an tho kho ti lo.