SALM 33 - Lai (Hakha) Common Language Bible 2006

Thangṭhatnak Hla

¹ Miding vialte hna, Bawipa nih a tuahmi thil ruangah i lawm tuah u; amah a nawl a zulmi vialte hna, amah cu thangṭhat tuah u.

² Tingtang in Bawipa cu thangṭhat tuah u, hri hra ngeimi tingtang in thangṭhat u.

³ Hla thar in thangṭhat u, dawh ngaiin hri hra tingtang cu tum u law fak piin hla sa u.

⁴ Bawipa bia cu biatak an si, a ṭuanmi rian cu zumhawktlak an si dih.

⁵ Bawipa nih dinnak le ṭhatnak cu a duh; vawlei cu a fekmi a dawtnak in a khat.

⁶ Bawipa nih a nawlbia in van khi a ser hna, ni le thlapa le arfi khi a bia in a ser hna.

⁷ Rili vialte kha hmunkhat ah a pumh hna; a thukmi rilipi cu thil khonnak inn chungah a khumh hna.

⁸ Vawlei vialte, Bawipa cu ṭih tuah; vawleicung mi vialte hna, Bawipa cu ṭih tuah u.

⁹ Bia a chim i vawlei cu a hung um, nawl a pek i zeizong vialte an hung chuak.

¹⁰ Miphun dang nih tuah an i timhmi kha Bawipa nih pakpalawng ah a canter i tling kho loin a umter hna.

¹¹ Sihmanhsehlaw amah khuakhanmi cu zungzal in a hmun i amah timhmi cu zungzal in a fek.

¹² An Pathian ah Bawipa a simi miphun cu lunglawmmi miphun an si, Bawipa nih a mi ah a thimmi hna cu lunglawmmi an si.

¹³ Bawipa nih vancung khin a run kan zoh i minung vialte hi a kan hmuh dih.

¹⁴ A uknak hmun khin a run kan zoh i vawleicung mi vialte hi a kan hmuh dih.

¹⁵ Kan ruahnak vialte hi amah sermi an si dih i kan tuahmi vialte cu a hngalh dih.

¹⁶ Siangpahrang nih a ral a tei hna cu ralkapbu ṭhawngmi a ngeih caah a si lo ralkap nih a ral a tei cu a thazang a ṭhawn caah a si lo.

¹⁷ Ral teinak caah ral tuknak rang hi san an tlai lo. a nganmi an ṭhawnnak nih a khamh kho hna lo.

¹⁸ Bawipa nih amah a ṭihmi cu a zohkhenh hna i a fekmi a dawtnak aa bochanmi cu him tein a umter hna.

¹⁹ Thihnak chungin a khamh hna i mangṭam tlun caan ah a nunter hna.

²⁰ Bawipa cu kan i bochan, amah cu a kan bawmtu le kan phaw a si.

²¹ Amah thawngin kan lung aa lawm i a min thiang cu kan i bochan.

²² Maw Bawipa, nangmah cu kan in bochan caah, a fekmi na dawtnak cu kan sinah um ko seh.