SALM 30 - Lai (Hakha) Common Language Bible 2006

Lawmhnak Thlacam

¹ Maw Bawipa, nangmah nih na ka khamh i ka ral kha ka cungah diriam in na umter hna lo caah kan thangṭhat.

² Bawipa, ka Pathian, nangmah sinah bawmhnak hal in ka au i na ka damter.

³ Mithikhua in na ka kirter ṭhan. Khor Thukpi chung i a vung kalmi hna sinah kaa tel ve nain, ka nunnak cu na ka pek ṭhan.

⁴ Nannih a mithiang hna, Bawipa cu thangṭhat u; A Thiangmi Pathian nih a tuahmi kha philh hlah u law amah kha lawm u.

⁵ A thinhun cu caan tawite chung lawng a si; a ṭhatnak tu nih cun chantlung a nguh. Zan ah mitthli tlaknak um hmanh seh law zinglei ah cun lawmhnak a ra ṭhan ve.

⁶ Him tein ka um kha ka hngalh i “Ahohmanh nih an ka tei bal lai lo,” ka ti.

⁷ Bawipa, ka cungah na ṭha ko; tlang cungah a ummi ralhruang a him bantukin him tein na ka umter. Sihmanhsehlaw na ka thuhtak tikah ṭihnak in ka khat.

⁸ Bawipa, nangmah cu kan auh, a bawm ko sawh, tiah kan nawl.

⁹ Ka thihnak cun zei ṭhatnak dah a chuak lai? Thlan i ka va kalnak cun zei miaknak dah a chuak lai? Mithi nih an in thangṭhat khawh maw? A dong lomi na ṭhatnak cu an chim khawh maw?

¹⁰ Maw Bawipa, Ka bia cu ka theihpiak law ka zaangfah tuah! Bawipa, ka bawm tuah!

¹¹ Ka ngaihchiatnak cu lunglawmh lamnak ah na ka thlenpiak cang, ka mithi ngaihnak puan cu na ka lakpiak i lunglawmhnak puan kha na ka pek.

¹² Cucaah dai tein ka um lai lo; nangmah cu kan thangṭhat ko lai. Bawipa, nangmah cu ka Pathian na si, a zungzal in kan thangṭhat lai.