SALM 26 - Lai (Hakha) Common Language Bible 2006

Miṭha Thlacamnak David Hla

¹ Bawipa, nangmah kha ka lung a dih-umnak in kan bochan i a dingmi thil kha ka tuah caah, misual lo ka sinak kha ka thanhpiak tuah.

² Ka hneksak law ka hlathlai cikcek tuah, Maw Bawipa, ka lung duhnak le ruahnak hi zoh tuah hna.

³ A fekmi na dawtnak nih lam a ka hmuhsak i zumhawktlak na sinak nih a ka hruai zungzal.

⁴ Hlen hmangmi kha ka kom hna lo i mihrokhrawl zong kha ka kom hna lo.

⁵ Miṭhalo bu kha ka huat hna i ṭhat lonak a tuahmi kha ka hrial hna.

⁶ Maw Bawipa, ka sual lo langhnak caah ka kha kaa ṭawl i nangmah biak awkah na biakṭheng velchum ah kaa chawk.

⁷ Lunglawmhnak hla kha ka sa i khuaruahhar thil na tuahmi vialte kha ka chim hna.

⁸ Bawipa, na umnak inn kha ka tlaihchan i na sunparnak a umnak hmun kha ka duh.

⁹ Misual hna sinah ka thah chih hlah, lainawngmi hna sinah ka hlonh chih hlah —

¹⁰ annih cu ṭhat lonak kha zungzal in a tuah i nawhthuh pek aa tim zungzalmi an si.

¹¹ Kei tu cu ahmaanmi thil kha ka tuah; ka zaangfah law ka khamh tuah.

¹² Him tein hmun rawn ah ka dir i zapi pumhnak ah Bawipa cu ka thangṭhat!