SALM 22 - Lai (Hakha) Common Language Bible 2006

Lungfah Ainak le Thangṭhatnak Hla David Hla

¹ Ka Pathian, ka Pathian, zeicahdah na ka hlawt? Ka bawm ko sawh, tiah fak piin ka au, sihmanhsehlaw bawmhnak cu a ra hlei lo.

² Chun ah nangmah cu kan auh, maw ka Pathian, sihmanhsehlaw na ka let lo; zan zongah kan auh, sihmanhsehlaw dinh ka hmu kho hlei lo.

³ Sihmanhsehlaw nangmah cu Israel Mi Thiang, Israel mi nih an thangṭhatmi na si i na bawiṭhutdan cungah khan na ṭhu.

⁴ Kan pupa nih an in bochan, nangmah cu an in bochan i na khamh hna.

⁵ Nangmah kha an in auh i ṭih awk chungin an luat, nangmah kha an in bochan i na khel hna lo.

⁶ Sihmanhsehlaw kei cu minung ka si ti lo, cangcel ka si ko cang; mi vialte nih an ka serhsat i an ka nihsawh.

⁷ A ka hmumi paoh nih capo ah an ka saih, an lei an ka chakhnawh i an lu an ka thinhnawh.

⁸ An i thawh i, “Bawipa naa bochan ṭung, zeicahdah an khamh kun lo? Bawipa nih an dawt ahcun, zeicahdah an bawmh kun lo?” an ti.

⁹ Him tein a ka chuahtertu cu nangmah na si i bawhte ka si lioah ṭha tein a ka zohkhenhtu cu nangmah na si.

¹⁰ Ka chuah ri in nangmah cu kan bochan zungzal i ka chuah ri in ka Pathian na si zungzal ko.

¹¹ Hung ka hlaat sawh hlah! Harnak nih a ka naih i a ka bawmtu ahohmanh an um lo.

¹² Ka ral nih cawtum bantukin an ka kulh, Bashan ram cawtum ṭihnung pipi bantuk nih khan an ka kulh.

¹³ Chiandeih bantukin an kaa an ka anhnawh, an awn i an kaa balh hiamhuam in an i an.

¹⁴ Ka thazang a dih cang, vawlei i thletmi ti bantukin a dih cang. Ka ruh vialte kha ka hliahhlok in an pong dih, ka lung cu ka chungah a timi khuailul bantuk a si.

¹⁵ Ka hrom cu leidip ro in a ro, ka lei cu ka dang cunglei ah aa beh. Leidip lak i hung thi dingah na ka kaltak.

¹⁶ Miṭhalo bu nih an ka kulh, uico run bantukin an ka zuanhnawh; ka kut le ka ke ah an ka seh.

¹⁷ Ka ruh vialte an lang dih. Ka ral nih khan an ka zoh i an di a riam;

¹⁸ ka hnipuan kha an i phaw i ka puan caah khan voihfung an zuh.

¹⁹ Ka hlaat sawh hlah, maw Bawipa! Khulrang in ra law ka bawm tuah, maw ka Khamhtu!

²⁰ Vainam chungin ka khamh law kha uico hna sin khan ka nunnak cu khamh ko,

²¹ Kha chiandeih hna sin khan ka khamh ko; kha cawtum hrang hna hmaiah khan kei cu zeihmanh a tuah khomi ka si lo.

²² Na tuahmi kha ka mi cu ka chimh hna lai, an i pumhnak ah kan thangṭhat lai.

²³ Annih cu ka thawh hna lai i, “Bawipa sal hna, Bawipa cu thangṭhat tuah u! Jakob tefa hna, amah cu upat tuah u. Israel mi hna, amah cu bia tuah u.

²⁴ Sifakmi kha anih nih cun a hrelh hna lo i an nganfahnak kha zeirello in a um lo; annih kha a hlaat hna lo i bawmhnak hal in an aunak kha a leh hna,” ka ti lai.

²⁵ Aa pummi dihlak hmaiah, nangmah cu na tuahmi ruangah kan thangṭhat lai; nangmah nawl zulmi an dihlak hmaiah kaa kammi raithawinak kha kan pekchanh lai.

²⁶ Sifakmi nih an duh zat in an ei lai, Bawipa sinah a rami nih Bawipa cu an thangṭhat lai. Zungzal in thluachuak in um ko hna seh.

²⁷ Miphun vialte nih Bawipa cu an hngalh camcin lai, vawleicung khuazakip in amah leiah an i mer lai; miphun zakip nih an biak lai.

²⁸ Bawipa cu siangpahrang a si i amah nih miphun vialte cu a uk hna.

²⁹ Miporhlaw vialte kha a hmaiah an kun lai, a thi khomi minung, a thi ding a si komi vialte hna kha a hmaiah an kun lai.

³⁰ Hmailei chan mi nih a rian an ṭuan lai; a ra lai ding chan sinah Bawipa kong cu mi nih an chim lai.

³¹ A chuak rih lomi minung kha, “Bawipa nih mi a khamh hna,” tiah an chimh hna lai.