SALM 17 - Lai (Hakha) Common Language Bible 2006

A Sual Lomi Thlacamnak

¹ Maw Bawipa, kan nawlnak a dingmi hi ngai tuah, nangmah bawmh hal in ka aunak hi ka theihpiak tuah. Ka chungah hlennak zeihmanh a um lo caah ka thlacamnak cu ka theihpiak ko.

² Ahmaanmi thil kha nangmah nih na hngalh caah keimah lei ṭanh in bia na ceih lai.

³ Ka lung cu na hngalh, zan ah ka sinah na ra. Ṭha tein na ka hneksak cikcek i ka chungah duhnak ṭhalo zeihmanh a um lo kha na hmuh.

⁴ Midang bantukin ṭhat lonak bia zeihmanh ka chim lo, na nawl kha ka zulh i puarhrannak lam kha ka zul lo.

⁵ Na lam kha ka zulh zungzal i zeitikhmanh ah ka pialtak bal lo.

⁶ Maw Pathian, na sinah thla ka cam i na ka leh: cucaah atu zongah hin keimah leiah i mer law ka bia cu ka ngaihpiak ko.

⁷ Maw Khamhtu Bawi, na dawtnak khuaruahhar cu langhter ko; na kiang kan um ahcun kan ral hna kut chungin kan him.

^8-9 A ka dohtu miṭhalo hna sin hin Na mitfang bantukin ka veng law Na thlazung in ka hup tuah. Huatnak in a khatmi ka ral nih khan an ka dum,

¹⁰ zaangfahnak zeihmanh an ngei lo i

¹¹ kaa mernak lei paoh ah khan an rak um dih, keimah thluk khawhnak ding caan ṭha kha an bawh.

¹² Chiandeih bantuk an si i thleh dih le baoh dih kha an ka duh, an i thuhnak hmun in chiandeih no bantukin an ka bawh.

¹³ Maw Bawipa, ra law ka ral hi do hna law tei hna! Miṭhalo hna kut chung hin na vainam in ka chanh tuah,

¹⁴ na ṭhawnnak in an kut chungin ka khamh tuah, hi vawlei cung nun chung i an duhmi thil vialte tling tein a ngei khomi hna kut chung hin ka khamh tuah. An caah na khonmi dantatnak kha an cungah tlunter law an tefa hna ca zongah i za seh law an tefa hna tefa chin hna ca zongah i za rih seh.

¹⁵ Kei tu nih cun ka sual lo caah na hmai kha ka hmuh lai i cun ka hun i hlauh tikah nangmah ka sin i na um caah lunglawmhnak in ka khat lai.