SALM 148 - Lai (Hakha) Common Language Bible 2006

Van le Vawlei Hna Pathian Thangṭhat U

¹ Bawipa cu thangṭhat u! Cung sangpi i a ummi hna, Bawipa cu vancung khin run thangṭhat u!

² A vancungmi vialte hna, amah cu thangṭhat u, a vancung ralkap vialte hna, amah cu thangṭhat tuah u!

³ Ni le thla hna, amah cu thangṭhat u! A ceumi arfi hna, amah cu thangṭhat u!

⁴ Van sang bik hna, amah cu thangṭhat u, vancung i a ummi ti hna, amah cu thangṭhat u!

⁵ An dihlak in Bawipa min cu thangṭhat hna seh! Bia a chim i annih cu ser an si;

⁶ amah nawl pekmi thawngin annih cu an umnak hmun cio ah khan zungzal in an um i a nawl ngai loin an um lo.

⁷ Rili chung thil ṭihnung hna le rilipi thuk hna, Bawipa cu vawlei ah hin thangṭhat u!

⁸ Nimtlau le rial, hawhra le khuadawm, a nawl a ngaimi thlichia, nannih nih Bawipa cu thangṭhat ko u!

⁹ Fing le tlang hna, thingthei kung le tupi hna, amah cu thangṭhat u!

¹⁰ Saram vialte hna, inn zuat saṭil le ramlak saram hna, a paw in a lawnmi le vate vialte hna, nan dihlak in amah cu thangṭhat u.

¹¹ Siangpahrang vialte le mi vialte hna, uktu le bawi vialte hna, amah cu thangṭhat u!

¹² Tlangval le ngaknu hna, tar le no le ngakchia vialte hna, amah cu thangṭhat u!

¹³ An dihlak in Bawipa min cu thangṭhat hna seh! A min cu min dang vialte nakin a ngan deuh; a sunparnak nih van le vawlei a lonh hna.

¹⁴ A miphun kha miphun ṭhawng ah a ser hna, cucaah a mi vialte nih an thangṭhat, a dawt ngaingaimi Israel mi nih khan an thangṭhat. Bawipa cu thangṭhat u!