SALM 144 - Lai (Hakha) Common Language Bible 2006

Siangpahrang Nih Ral Teinak A Hmuh Caah Pathian Kha A Lawmh David Hla

¹ Bawipa, ka lungpi cu thangṭhat si ko seh! Amah nih raltuknak kha a ka cawnpiak i ka kutdong kha raldoh a thiamter hna.

² Amah cu a ka hupphengtu lungpi ka ralhruang a si, a fekmi ralvenbuk le himnak hmun a si, kaa bochanmi phaw a si. Miphun dang kha ka ke tangah amah nih a chiah hna.

³ Maw Bawipa, minung hi zeidah a si i a zawn na ruah? Minung fapa hi zeidah a si i biapi ah na rel?

⁴ Minung cu thaw bantuk men a si ko, a nun chung ni hna cu a liam zaumi thladem bantuk men an si ko.

⁵ Maw Bawipa, van kha run ṭhum hna law kan sinah rung ṭum tuah, tlang kha run tawng hna law meikhu chuah hna seh.

⁶ Nimtlau kha a kenkip ah lekter hna law na ral kha ṭhek dih hna; na thal in kap hna law zam dih hna seh!

⁷ Cunglei khan run ka banh law a thukmi ti chung hin ka chuah tuah; ramdangmi hna ṭhawnnak chung hin ka khamh tuah;

⁸ annih cu biatak a chim bal lomi, biatak ka chim lai tiah chiat i serh hnu hmanh ah lih a chim ṭhiamṭhiammi an si.

⁹ Maw Pathian, nangmah cu hla thar in kan thangṭhat lai, tingtang kha kaa tum lai i kan thangṭhat lai.

¹⁰ Siangpahrang cu teinak kha na pek hna i na sal David cu na khamh.

¹¹ A puarmi ka ral hna kut chung khan ka khamh ko, ramdangmi hna ṭhawnnak chung hin ka khamh tuah, annih cu biatak a chim bal lomi, biatak ka chim lai tiah chiat i serh hnu hmanh i lih a chim ṭhiamṭhiammi an si.

¹² Kan fapale hna cu an tlanval lioah, a ṭhawngmi thingkung bantuk si hna seh law, kan fanule hna cu bawi inn ṭamhnak tung bantuk si hna seh.

¹³ Kan rawl inn hna cu rawl a phunphun in khat hna seh, kan lo lak i a ummi tuu hna nih fa a thongthong in hring hna seh.

¹⁴ Kan caw nih fa tampi hring hna seh law a lotlaumi le a rawkmi pakhat hmanh um hna hlah seh. Kan khuachung lam ah lungfah ṭahnak thawng zeihmanh leng hlah seh.

¹⁵ Hi bantukin a ummi miphun cu aa lawmmi miphun an si; an Pathian ah Bawipa a simi hna cu, lunglawmmi an si.