SALM 139 - Lai (Hakha) Common Language Bible 2006

Pathian Nih A Hngalh Dih

¹ Bawipa, na ka kawl dih hirhiar i na ka hngalh dih cikcek!

² Ka tuahmi vialte cu na hngalh dih, lamhlatpi khin ka ruahnak vialte cu na hngalh dih ko hna.

³ Rian ka ṭuan ah siseh, kaa dinh ah siseh, na ka hmuh, ka tuahmi vialte kha na hngalh dih.

⁴ Ka chim hlan in ka chim ding vialte kha na hngalh dih.

⁵ Ka hnulei le ka hmailei in na ka cawngh i ka cungah na kut na zar.

⁶ Na ka hngalhnak hi a thuk tuk hringhran, ka ruahnak nih a phak khawh leng a si.

⁷ Na thlarau sin hin khuazei ah dah ka zam khawh lai? Na hmaika hin khuazei ah dah kaa thuh khawh lai?

⁸ Vancung ah khin hung kai ning tiah, cuka ah cun na rak um ko lai, mithi khua ah khin vung it ning tiah, cuka zongah cun na rak um ṭhiamṭhiam ko lai.

⁹ Nichuahlei ha khin lo diam in hei zuang hnik ning law, asiloah nitlaklei a hlatnak bik hmun zongah khin hei um hnik ning law,

¹⁰ cuka zongah cun a ka hruaitu dingah nangmah na rak um ṭhiamṭhiam ko lai, a ka bawmtu dingah na rak um ṭhiamṭhiam ko lai.

¹¹ Muihnak kha, ka thup tuah, ka hei ti ko hnga, asiloah, ka velchum i ceunak kha, zan ah cang ka hei ti ko hnga,

¹² asinain cucu zeihmanh a ṭhahnem hlei hnga lo, zeicahtiah muihnak cu nang caah cun a mui lo i zan hmanh kha chun tlukin a ceu ko. Nang caah cun muihnak le ceunak cu zeihmanh an i dang lo.

¹³ Ka pum chung thil vialte hi nangmah sermi an si dih; ka nu pawchung i a ka semtertu cu nangmah na si.

¹⁴ Hi bantuk thil thuk le khuaruahharmi thil ruangah hin nangmah cu kan lawmh: keimah kong i khuaruahhar a simi thil le nangmah nih na tuahmi thil khuaruahhar a simi hna kong ah hin kan lawmh. Nangmah nih na ka hngalh dih cikcek ko;

¹⁵ Ka pum hi nang caah cun khuaruahhar awk a si lo, zeitindah a thli tein muisam ka hun ken le ka nu pawchung ah zeitindah ka hung ṭhan ti kha nang na caah cun khuaruahhar a si lo.

¹⁶ Ka chuah hlan in na rak ka hmuh diam cang. Ka ca i na sermi ni hna cu na cauk chungah an rak i khumh diam cang, hram an i thawk hlan hmanh khan an i ṭial diam cang.

¹⁷ Maw Pathian, na ruahnak cu ka caah zeitluk in dah hngalh a har, na ruahnak cu a tam tuk ah a dongh in a dong kho lo.

¹⁸ Rel tim hnik hna ning law thetse nak tam an si ṭung; an dihlak in rel dih dingah cun, nangmah chan can nun a hau hnga!

¹⁹ Maw Pathian, miṭhalo kha cu that ko hna, ti ka duh. Mipuarhrang pawl nih hin ka kaltak hna seh, ti ka duh hringhran ko.

²⁰ Nangmah kong ah thil ṭhalo lawng an chim i na min chiatnak lawng kha an chim lengmang.

²¹ Bawipa nangmah an huatu cu ka huat ve hna, nangmah an dohtu cu zei ah ka rel ve hna lo.

²² Huat taktak in ka huat hna i ka ral ah ka rel hna.

²³ Maw Pathian, ka pur cikcek law ka lungthin hi hngal ko; ka hneksak law ka ruahnak hi hmu ko.

²⁴ Ka chungah hlenthawinak a um sual hnga maw? a um sual ahcun ka hmuhpiak law zungzal hmunmi lam ah khan ka hruai ko.