SALM 125 - Lai (Hakha) Common Language Bible 2006

Pathian Mi Hna Himnak Kainak Hla

¹ Bawipa aa bochanmi cu Zion Tlang bantuk an si; Zion Tlang, hninh khawh zong a si lo i ṭhial khawh zong a si lomi bantuk an si.

² Tlang nih Jerusalem khua kha an kulh bangin, Bawipa nih a mi cu a kulh hna, atu thawk in zungzal tiang a kulh hna.

³ Pathian mi hna ram cu miṭhalo nih an uk zungzal lai lo, an uk ahcun, Pathian mi hna hrimhrim hmanh nih khan, ṭhat lonak an tuah sual hnga.

⁴ Bawipa, ṭhatnak a tuahmi hna cungah ṭhatnak tuah ve ko, na nawl a ngaimi hna cungah ṭhatnak tuah ko.

⁵ Sihmanhsehlaw anmah lam, lam ṭhalo a zulmi hna cu, miṭhalo dan na tat hna tikah khan, dantat ve ko hna. Israel cungah daihnak um ko seh.