SALM 104 - Lai (Hakha) Common Language Bible 2006

Sertu Pathian Thangṭhatnak

¹ Maw ka nunnak, Bawipa cu thangṭhat tuah! Bawipa ka Pathian, zeitluk in dah na lianhngan! Sunparnak le lianhngannak in naa thuam i

² ceunak in naa tuam. Van khi puan thlam bantukin na samh hna i

³ cunglei i a ummi ti cungah khin na inn cu na sak. Khuadawm cu rangleng ah na hman hna i thlitu cu an thla cung cit awkah na hman hna.

⁴ Thlitu cu na lamkaltu ah na hman hna i nimtlau cu na sal ah na hman hna.

⁵ Vawlei cu a umnak hmun ah khan fek tein na bunh i ahohmanh nih an ṭhial kho lo.

⁶ Vawleicung cu rili in puan bangin na khuh i a tlang cu ti nih a khuh hna;

⁷ sihmanhsehlaw ti cu na sik hna tikah an le na au thawng kha an theih tikah an zam.

⁸ Tlang cung khan nelrawn ah an vung luang i an ca i na sermi hmun ah khan an um;

⁹ an lonh khawh lomi ramri kha na chiah i vawlei kha an khuh ṭhan kho ti lo.

¹⁰ Nelrawn ah cerh kha na putter hna i ti cu tlang le tlang karah an luang.

¹¹ Ramlak saram kha ti din awk an pek hna i ramlak laa nih khan an tihal riam in an din hna;

¹² an pawngkam thingkung cungah vate nih bu an i ser i hla an sa.

¹³ Vancung khin tlang cungah ruah na run surter i vawlei cu na thluachuahnak in a khat.

¹⁴ Saṭil caah ram na khohter, minung hman awk caah thing na khohter cucaah minung nih cun ti-rawl kha an cin khawh hna i

¹⁵ an lung a lawmhtertu dingah mitsur hang kha an chuahter; an tha an nuamtertu dingah oliv chiti kha an chuahter i thazang a petu dingah rawl an chuahter.

¹⁶ Lebanon Tlang sidar thingkung cu ruah tampi an hmu, annih cu Bawipa nih amah caah aa cinmi thingkung an si.

¹⁷ Cuka ah cun vate nih bu an i ser i vaca nih farkung ah bu an i ser ve.

¹⁸ Sathar kha tlang sang ah an um i sahniar cu lungpang ah an i thup.

¹⁹ Thla relnak ah thlapa na ser, ni nih khin tlak caan amah tein aa hngalh.

²⁰ Zan kha na ser i mui ah saram kha an chuak.

²¹ Chiandeih no kha rawl an kawlpah in an awn, Pathian nih a pekmi hna rawl kha an kawl.

²² Ni a chuah in an kir i an kua chungah khan an bawk.

²³ Cun mi cu an rianṭuan awkah an chuak i zanlei tiang an ṭuan.

²⁴ Bawipa, na sermi thil hi an tam hringhran ko! An dihlak in fimnak in na ser hna. Vawlei cu na sermi thil in a khat.

²⁵ A ngan ngaingai i a kau ngaingaimi rilipi kha na ser, a chungah thilnung a hme he a ngan he a rel rel cawk loin an um;

²⁶ a cungah sangphawlawng kha an kal i a chungah Leviathan rulpi kha lente aa celh, Leviathan cu rili chung rulpi nangmah nih na sermi kha a si.

²⁷ An herhmi an rawl hmuhnak ah, an dihlak in nangmah kha an in bochan.

²⁸ Nang nih na pek hna i an ei, rawl cu na pek hna i an khim,

²⁹ Naa mer tikah an awlok a chong, na thaw kha na tlaihkanh hna tikah an thi i an chuahkehnak vawlei ah khan an kir ṭhan.

³⁰ Sihmanhsehlaw thaw na pek hna tikah an nung; vawlei cu nunnak thar na pek.

³¹ Bawipa sunparnak cu zungzal in hmun ko seh, a sermi thil cungah Bawipa cu i lawm ko seh.

³² Vawlei kha a zoh tikah vawlei cu a ther in a ther, tlang kha a tawngh tikah meikhu kha a chuak.

³³ Ka nun chung vialte Bawipa cu hla in ka thangṭhat lai; ka nunnak a um chung ka Pathian thangṭhatnak hla cu ka sa lai.

³⁴ Pathian nih lunglawmhnak a ka pek zat in, ka thangṭhatnak hla nih amah cu a lunglawmhter ve seh.

³⁵ Misual mi cu vawleicung hin hloh si hna seh, miṭhalo cu um ti hna hlah seh. Ka nunnak, Bawipa cu thangṭhat ko! Bawipa cu thangṭhat ko!