SALM 103 - Lai (Hakha) Common Language Bible 2006

Pathian Dawtnak David Hla

¹ Maw ka nunnak, Bawipa cu thangṭhat tuah! Ka sining vialte, a min thiang cu thangṭhat tuah u!

² Maw ka nunnak, Bawipa cu thangṭhat law zeitluk in dah zaangfahnak a ngeih kha philh hlah.

³ Ka sualnak vialte kha a ka ngaihthiam i ka zawtnak vialte kha a ka damter;

⁴ thlan chungin a ka khamh i dawtnak le zaangfahnak he thluachuah a ka pek;

⁵ ka nunnak cu thil ṭha in a khahter i cucaah ka no peng i mupi bantukin ka ṭhawng.

⁶ Hremnak a ingmi kha biaceih tikah Bawipa nih a ṭanh hna i an hmuh awk hnga a simi kha a pek hna.

⁷ Moses kha aa tinhmi cu a chimh i Israel mi kha thil lianngan a tuahmi cu a hmuhter hna.

⁸ Bawipa cu zaangfahnak le dawtnak in a khat, a thin a fual i a fekmi dawtnak in a khat.

⁹ Mawhchiat chih lengmang kha a hmang lo i thinhung zungzal in a um lo.

¹⁰ Hmuh awk kan i tlakning in dan a kan tat lo, kan sualnak le ṭhat lonak kan tuahmi ning zongin a kan lehrul lo.

¹¹ Van cu vawlei nakin a san deuh ngaingai bantukin a dawtnak cu amah a ṭihmi hna caah cun a ngan ve.

¹² Nichuahlei le nitlaklei an i hlat tluk khin kan sualnak cu kanmah he i hlat ah a kan ṭhialpiak.

¹³ Pale nih an fale an zaangfah hna bantuk khin Bawipa nih amah a ṭihmi cu a zaangfah hna.

¹⁴ Zei in dah ser kan si kha a hngalh i leidip men kan si kha a philh lo.

¹⁵ Minung cu a nunnak hi ram bantuk men a si ko; a hung ṭhang i ramlak pangpar bangin a hung par.

¹⁶ Cun thli a hung hrang ciammam i a lo ai, ahohmanh nih an hmu ṭhan ti lo.

¹⁷ Sihmanhsehlaw Bawipa nih amah a upatmi hna a dawtnak hna cu, zungzal in a hmun i a ṭhatnak nih chan vialte tiang a nguh,

¹⁸ a biakamnak a zulmi le a nawlbia a ngaimi hna cungah cun Bawipa ṭhatnak cu cu bantuk cun a si.

¹⁹ Bawipa nih a bawiṭhutdan cu vancung ah khin a hun; zeizong vialte cungah siangpahrang a si.

²⁰ Nannih a ṭhawng i a liannganmi vancungmi hna, Bawipa cu thangṭhat tuah u; a nawlbia kha a ngai i a chimmi a tuahmi vialte hna, Bawipa cu thangṭhat tuah u!

²¹ Vancung i a ummi ṭhawnnak vialte hna, Bawipa cu thangṭhat tuah u, a duhnak a tuahmi a sal vialte hna, Bawipa cu thangṭhat tuah u,

²² A sermi thil vialte hna, a pennak chung hmun zakip ah Bawipa cu thangṭhat tuah u! Maw ka nunnak, Bawipa cu thangṭhat tuah!