PHUNGCHIMTU 7 - Lai (Hakha) Common Language Bible 2006

¹ Min ṭha hi a sungmi zihmui nakin a ṭha deuh; thih ni hi hrin ni nakin a ṭha deuh.

² Mithi ṭahnak inn i va kal khi rawl danghnak inn i va kal nakin a ṭha deuh; zeicahtiah thihnak nih a kan hngah cio ko ti hi minung nih kan hngalh zungzal awk a si.

³ Ngaihchiat hi lunglawmh nakin a ṭha deuh, zeicahtiah ngaihchiatnak nih cun na hmai cu a ngaih a chiatter ko nain na hngalhnak kha a haarter lai.

⁴ Mifim mi lungthin cu ngaihchiatnak inn ah a um, sihmanhsehlaw mihrut mi hna lungthin cu puai tuahnak inn ah a um.

⁵ Mihrut mi nih na thangṭhatnak hlasak in an sak nakin, mifim mi nih an in sik kha a ṭha deuh.

⁶ Mihrut cu an nih ah khin, hlingkung mei chung i a puah ṭhukmak bantuk khi a si, sullam zeihmanh a ngei lo.

⁷ Mifim mi nih midang pakhatkhat a hlen hna ahcun, mihrut bantukin rian a ṭuan a si. Nawhthuh nih lungthin a ṭhutter.

⁸ Thil donghnak hi a hramthawknak nakin a ṭha deuh; lung a saumi hi aa porhlawmi nakin a ṭha deuh.

⁹ Na thin i sum khawh kha i zuam, lungchung in mi uam peng hi hruh a si.

¹⁰ “Zeicahdah hlan lioah khan atu nak hin thil kha a rak ṭhat deuh?” ti hlah, cucu fimnak biahalnak a si lo.

¹¹ Fimnak hi a sungmi ro a si, a nungmi hna caah laksawng ṭha a si;

¹² Zeicahtiah fimnak nih cun tangka tlukin lung hnangamnak a pek khawh i hngalhnak nih ṭhatnak a pek khawhmi cu hihi a si: hngalhnak a ngeimi nih cun fimnak a hmuh i fimnak nih cun him tein a umter.

¹³ Pathian rianṭuanmi hi va ruat tuah, a kawiter cangmi cu aho nih dah a dinter khawh lai?

¹⁴ Ṭhat ni ah i lawm law harnak na ton ni ah hihi va ruat tuah: Pathian nih lunglawmhnak zong cu a umter i harnak zong cu a umter, hmailei ah zeidah a um lai ti bel, ahohmanh nih an hngal lo.

¹⁵ Ka nun chung hi pakpalawng a si ko, sihmanhsehlaw hi chungah hin zeizong vialte ka hmuh dih; pakhat cu a ding ko nain a thi i pakhat tu cu a ṭhalo ko nain a chan a sau.

¹⁶ Cucaah a ṭhat zong ṭha tuk hlah, a fim zong fim tuk hlah, zeicahdah nangmah le nangmah cu naa thah lai?

¹⁷ Asinain ṭhat lo zong ṭha lo tuk fawn hlah, a hruh zong hrut tuk fawn hlah, zeicahdah na caan a tlin hlanah na thih lai?

¹⁸ Mah hihi naa tlaih ahcun a ṭha, cun mah cucu thlah ti hlah; Pathian a ṭihmi na si ahcun thlua na chuak kho lai.

¹⁹ Uktu pahra nih khua pakhat caah ṭhatnak an tuahmi nakin fimnak nih minung pakhat caah a tuahmi cu a tam deuh.

²⁰ Ṭhatnak a tuah zungzal i a sual bal lomi miding pakhat hmanh vawlei cungah hin an um hrimhrim lo.

²¹ Mi nih an chimmi paoh kha biapi in va la hlah, na sinum nih chiat an serh kha na theih sual lai,

²² nangmah hrim zong nih midang kha chiat voi tampi na serh hna cu na hngalh ko.

²³ Mah hi thil vialte hna hneksaknak caah hin ka fimnak kha ka hman. Fim hrimhrim kaa tim; sihmanhsehlaw cucu ka ti khawh leng a si.

²⁴ Zeitindah mi nih nunnak hi zeidah a si tiah an tuak khawh lai? Kan caah a thuk tuk, hngalhawk a har tuk.

²⁵ Sihmanhsehlaw hngalhnak le cawnnak ah khan ka pum kaa pe; fimnak kha hmuh awkah kaa zuam i ka biahalnak lehnak kha ka kawl; cun hruhnak a ṭhat loning le a hruhning kha hngalh awk kaa zuam.

²⁶ Thih nakin a kha deuhmi thil ka hmuhmi cu a lungthin rap le sur a si i a kut cu hreng a simi minu kha a si; Pathian duhnak a tuahmi cu amah sin cun an luat, sihmanhsehlaw misual cu a tlaih hna.

²⁷ Zohhmanh mah hihi ka hmuhmi cu a si, tiah Phungchimtu nih a ti, biahalnak lehnak ka kawlmi kha tlawmpal tete in ka hmuh lengmang.

²⁸ A dang lehnak zong kha ka kawl, sihmanhsehlaw ka hmu hna lo. Pa thong khat chungah hin a fimmi pakhat cu a um ko lai, sihmanhsehlaw nu fim ti hi cu a um bal lomi thil a si.

²⁹ Ka va hngalhmi cu mah vial hi a si ko: Pathian nih hin cun minung hi tliang tein a kan ser ko, sihmanhsehlaw kanmah le kanmah nih hin hnawk ngaiin kan i ser.