PHUNGCHIMTU 5 - Lai (Hakha) Common Language Bible 2006

Ruah Set Loin Biakamnak Ser Hlah

¹ Biaknak inn na kal ah hin i ralring. Cu ka i na va kal tikah zeidah kaa cawn khawh lai ti kha ruat deuh, cucu ahmaanmi thil le ahmaan lo mithil a thleidang kho lomi mihrut hna nih an pekchanhmi raithawinak nakin a ṭha deuh.

² Bia na chim hlanah i ruat hmasa, cun Pathian sinah hnawnam in biakamnak ser hlah. Pathian cu vancung ah a um i nang cu vawlei ah na um, cucaah a herhmi hlei in zeihmanh va chim hlah.

³ Na lungre a theih deuh paoh ah mang chia na manh deuh ko lai, cu bantukin tam deuh bia na chim paoh ah hruhnak bia kha tam deuh na chim sual ko lai.

⁴ Cucaah Pathian sin i bia kamnak na tuah tikah khulrang in cucu zul ko. Pathian nih mihrut cu zeihmanh ah a herh hna lo. Ka tuah lai tiah naa kammi kha va tuah ko.

⁵ Bia i kam ṭung i tuah lo nakcun rak i kam lo lawlaw kha a ṭha deuh.

⁶ Nangmah bia lila kha sualnak chung i an luhpitu siter hlah, Pathian tlangbawi cu, khakha ka ti duhmi a si lo, tiah chimh awk herh in um hlah, zeicah Pathian cu na cungah a thin na hunter lai? Zeicahdah na rak tuahmi cu na hrawhter lai?

⁷ Mang cu manh len ko, cun na tuahmi rian zong cu pakpalawng si koin na chimmi bia cu tam ko hna hmanh seh law Pathian cu na ṭih ṭhiamṭhiam awk a si.

Nunnak Hi Pakpalawng Men A Si Ko

⁸ Acozah pakhatkhat nih misifak kha an hrem hna i dinnak le an hmuh awk a simi kha an pe hna lo, ti na hmuh tikah na khuaruahhar hlah; bawi paohpaoh cu an cung i a ummi bawi cio nih khan an huhphenh hna i cu hna zong cu anmah nakin a sang chin deuhmi bawi nih khan an huhphenh chin ve hna.

⁹ Ram pakhatkhat nih a herh tawnmi cu lo thlawhnak lei i lungthin a ngeimi siangpahrang a si.

¹⁰ Tangka duhmi na si ahcun, zeitikhmanh ah kaa za cang na ti kho bal lai lo; rum a duhmi na si ahcun, na duhmi vialte kha cu na hmu kho bal lai lo. Pakpalawng a si ko.

¹¹ Na rum deuh paoh ah na cawm awk kha an tam chin lengmang ko lai i naa miakmi cu ka rum ti naa hngalh lawng kha a si ko lai.

¹² Rian hrang a ṭuanmi cu ei awk a zaa a ngeih caan a um lai, a ngeih lo caan zong a um lai, sihmanhsehlaw zan tal ah ṭha tein aa hngilh; sihmanhsehlaw mirum cu tampi a ngei ko nain a lungretheihnak nih khan hngilh lo in a umter.

¹³ Mah hihi thil ṭhalo ngai a si, sihmanhsehlaw vawlei cungah hin ka hmuh cangmi a si: mi nih hin an tangka hi an herh caan caah an khon tawn,

¹⁴ cun zei maw tiin rian pakhatkhat ah an hloh dih sual i an fale roh awk kha zeihmanh a tang lo.

¹⁵ Hi vawlei hi kan hung luh bantukte khan kan chuahtak ṭhan lai — zeihmanh lo tein. Zeicahtiah kan tuahmi vialte hi pakhat hmanh kan i kalpi khawh ding a um lo.

¹⁶ Mah hihi thil ṭhalo ngai a si ko, kan ratning te khan kan kal ṭhan ko. Rian heh tiah kan ṭuan, thlitu tlaih kha kan i zuam, sihmanhsehlaw zeidah kan hmuh?

¹⁷ Muihnak chung le ngaihchiatnak chungah hin lungrethei le thinhung le ngandam loin kan nun a herh ko.

¹⁸ Hihi ka va hmuhmi thil a si. Mi nih hin a ṭha bik a tuah khawhmi cu ei i din i Pathian nih nunnak tawite a pekmi chung i a rianṭuanmi chungin a hmuhmi kha i nuamhpi hi a si ko; cucu minung kan covo cu a si ko.

¹⁹ Pathian nih mi pakhat khat cu rumnak le thilri a pek i cucu a nuamhpiter hna ahcun, Pathian sinah aa lawmh awk a si ko i a ṭuanmi cu aa nuamhpi awk a si ko. Cucu Pathian laksawng pei a si cu.

²⁰ Pathian nih lunglawm tein umnak nawl kha a pek caah a nunnak zeitluk in dah a tawi kha cu, a lungre aa theihpi lai lo.