NEHEMIAH 5 - Lai (Hakha) Common Language Bible 2006

A Miak Lak Kha An Hloh

¹ Cun mi zapi cu nu he pa he an unau Judah mi hna cungah khan fak piin an au an khuang.

² A cheu nih an i thawh i, “Kan fanule hna le kan fapale hna cu kan nunnak ca i rawl cawknak caah biahrennak ah kan hman cang hna,” an ti; a cheu nih,

³ “Kan lo hna le kan mitsur dum hna le kan inn hna cu mangṭam lio i rawl cawknak caah biakamnak caah kan hman cang hna,” an ti;

⁴ a cheu nih, “Siangpahrang sin pek awk ngunkhuai ca i tangka kan cawimi biahrennak caah kan lo le kan mitsur dum kha kan hman lengmang cang hna,” an ti.

⁵ Cun annih nih cun, “Sihmanhsehlaw kan pum herhbaunak cu midang hna herhbaunak bantuk a si ve ko i kan fale hna cu an fale tlukin a ṭhami an si ve ko nain, kannih tu nih cun kan fale hna cu sal i i can awkah kan hnek lengmang ko hna. Kan fanule a cheukhat hna lebang cu sal ah an cang taktak cang, asinain, zeihmanh kan tuah khawhmi a um lo, zeicahtiah kan lo hna le kan mitsur dum hna cu midang ta an si cang,” an ti.

⁶ Annih an aukhuannak le an chimmi bia hna cu ka theih tikah ka thin a hung ngaingai.

⁷ Keimah le keimah kha ṭha tein kaa ruat ciammam i tuavon pawl le bawi pawl kha ka mawhchiat hna i, “Nannih nih a miak nan ei, nan unau hna sin khan nan ei cio ko,” tiah ka ti hna. Cun annih cu pumhnak nganpi ka serpi hna i

⁸ ka thawh hna i, “Kannih nih kan celh khawh chungin miphun dang hna sinah zuarhmi kan unau hna cu kan cawk hna; sihmanhsehlaw nannih nih cun nan unau hna cu nan zuarh hna i kanmah nih kan cawk ṭhan hna a herh lai,” ka ti. Annih cu cipkhap ti loin an um i biachim awk pakhat hmanh an hngal lo.

⁹ Cucaah ka thawh hna i, “Nannih nih nan tuahmi hi a ṭhalo. Kannih kan ral miphun dang hna mit hmuh soisel awk um lo kan si nakhnga Pathian ṭih bu tein nan nun awk a si.

¹⁰ Keimah kong in ka chim a si ahcun, keimah le ka unau hna le ka tang i rian a ṭuanmi hna nih khan tangka le rawl kan cawih hna. Leiba ca i minung hren hi ngol u sih.

¹¹ Nihin hrimhrim ah hin an lo le an mitsur dum le an oliv dum le an inn le a miak nan lakmi le rawl le mitsur hang le chiti, annih sinin nan lakmi kha khirh hna u,” tiah ka ti.

¹² Cun annih nih, “Mah hihi kan khirh hna lai i an sinin zeihmanh kan la ti lai lo. Na chim bangin kan tuah lai,” an ti. Cun tlangbawi hna kha ka auh hna i an chim bangin tuah awkah chiat ka serter hna.

¹³ Ka puan zong kha ka thin i. “Hi biakamnak a tuah lomi paoh cu hi bantukin an inn cio le an rian cio in Pathian nih thing ko hna seh. Cu bang cun thin si ko hna seh law, lawngkarao in chiah si ko hna seh,” ka ti. Cun aa pummi vialte nih, “Amen,” an ti i Bawipa kha an thangṭhat. Cun mi nih bia an i kam bangkhan an tuah.

¹⁴ Cuhleiah Judah ram chung i an uktu bawi si awkah rian pek ka si thawk in, Artazaksis siangpahrang a sinak kum kulnak in kum sawm thum le kum hnihnak tiang, kum hleihnih chung, keimah nih siseh, ka unau hna nih siseh, uktu bawi ca rawl kha kan ei lo.

¹⁵ Keimah hlan i a rak ummi uktu bawi hna nih cun mi zapi cungah khan thilrit an chuan i annih sin cun ngun shekel sawm li hleiah rawl le mitsur hang kha an lak hna. An sinum hna hmanh nih mi zapi cu an lalhnawh hna. Sihmanhsehlaw kei nih cun Pathian ka ṭih caah cu bantuk cun ka tuah lo.

¹⁶ Hi kulhnak vampang remhnak rian ah hin ka thazang a dih-umnak in ka chuah i keimah caah vawlei zeihmanh kaa lakmi a um lo; cun ka sinum vialte hna cu khika ah rian ṭuan awkah cun an um.

¹⁷ Cun ka cabuai ah sawmmi minung za le sawm nga lengmang ka ngei hna, cu chungah cun Judah mi le bawi pawl kha an i tel; cun cu hna piin ah cun kan pawngkam i a ummi miphun hna chungin a rami an um rih fawn.

¹⁸ Ni khat ca i an chuanmi cu cawtum pakhat le thim khunmi tuu paruk an si tawn; ar zong kha an ka chuanpiak i ni hra dan paoh ah mitsur hang saphaw cua tampi an ka pek lengmang. Asinain, hi mi hna hi an thil a rih ko caah uktu bawi ca rawl kha ka la lo.

¹⁹ Maw ka Pathian, hi mi hna caah ka tuahmi thil vialte hi ka ṭhatnak ding caah ka hngalhpiak camcin ko.