NAMBAR 9 - Lai (Hakha) Common Language Bible 2006

Lanhtak Puai Ulhnak

¹ Cun Bawipa nih, Izipt ram in an chuah hnu a kum hnihnak thla khatnak thla ah khan Moses cu Sinai ramlak ah a chawnh i,

² “Israel mi hna nih Lanhtak Puai cu a caan khiahmi te ah khan ul hna seh.

³ Atu thla ni hleili ni ah, zan lei ah, a caan khiahmi te ah khan nan ulh lai; a nawlbia vialte le a phunglam vialte ning khan nan ulh lai,” tiah a ti.

⁴ Cucaah Moses nih Israel mi hna cu lanhtak puai ul dingin a chimh hna.

⁵ Cun lanhtak puai cu thla khatnak thla, a ni hleili ni ah cun, zanlei ah Sinai ramlak ah an ulh; Bawipa nih Moses nawl a pekmi dihlak bang khan Israel mi nih an tuah.

⁶ Cun mi zeimaw miruak a tawng i a thurmi, cucaah cu ni i lanhtak puai a ul kho lomi an um i, cu ni ah cun Moses le Aaron hmaiah an ra i,

⁷ cu hna nih cun a sinah, “Miruak tawnghnak in kannih cu kan thur cang; zeicahdah Israel mi hna lak i a caan khiahmi Bawipa sin i pekchanhnak pek cu nan kan thlauh?” tiah an ti.

⁸ Cun Moses nih annih sinah, “Um rih tuah u, nannih kongah Bawipa nawl peknak zeidah a si kha thei hmasa rih tuah ning,” tiah a ti.

⁹ Bawipa nih Moses cu a chawnh i,

¹⁰ “Israel mi cu va chim hna, nannih lak i mi pakhatkhat maw, nan tefa hna lak i pakhatkhat cu, miruak tawnghnak in a thur ahcun khual lam hla a tlawn ah maw, Bawipa sin lanhtak puai cu a ulh ṭhiamṭhiam ko lai.

¹¹ Thla hnihnak thla ni hleili ni zanlei ah an ulh lai; thilnu cawh lo changreu le a khami an he an ei lai.

¹² Zinglei tiang a zeihmanh an taanter lai lo, cun a ruh zong pakhat hmanh an khiak lai lo; lanhtak puai ca i nawlbia vialte ning khan an ulh lai.

¹³ Sihmanhsehlaw a thiang a si i khual a tlawng lo nain lanhtak puai ulh loin a um menmi cu, cu mi cu a mi hna sinin hlonh a si lai, zeicahtiah Bawipa sin pekchanhnak cu a caan khiahmi te ah khan a pek lo caah; mah mi nih cun a sualnak cu a phorh ko lai.

¹⁴ Cun nan lakah khual pakhat a pem i Bawipa sin lanhtak puai cu a nawlbia le a phunglam ning in ulh a duh ve ahcun, cu bantuk cun tuah ko seh; mipem ca le mah ram mi caah nawlbia pakhat lawng nan ngeih awk a si lai,” tiah a ti.

Puan Biakinn Cung Minmei

¹⁵ Puan biakinn an dirter ni ah cun, minmei nih puan biakinn, bia hngalhternak thlam cu a zelh i, zanlei ah cun puan biakinn cungah cun mei alh mui bantukin zinglei tiang a um.

¹⁶ Cuticun a um camcin ko; chun ah minmei nih, zan ah meialh mui bantuk nih a zelh.

¹⁷ Cun minmei cu puan biakinn cung cun cunglei i aa ṭhial chel paoh ah, Israel mi hna cu kal ah an i thawh; cun minmei a ṭumnak hmun paoh ah, cu ka ah cun Israel mi nih riahhmun an khuar tawn.

¹⁸ Bawipa nawl pek in Israel mi hna cu an i thawh tawn i Bawipa nawl pek in riahhmun an khuar tawn; minmei cu puan biakinn cungah a cam chung paohpaoh an riahhmun ah cun an cam.

¹⁹ Minmei cu puan biakinn cung i a um kha ni tampi a si hmanh ah Israel mi nih Bawipa nawlbia cu an zulh ko i an i thawh lo.

²⁰ Voi khatkhat cu minmei cu puan biaknak inn cungah ni tlawmte lawng a um i Bawipa nawlbia bangin riahhmun ah an cam; cun Bawipa nawlbia bangin an i thawh.

²¹ Cun voi khatkhat cu minmei cu zanlei in zinglei tiang a cam; cun minmei cu zinglei i aa ṭhial tikah annih nih an i thawh, asinain ni khat le zan khat hoi hna a cam zongah minmei cu aa ṭhial tik paoh ah annih cu an i thawh.

²² Ni hnih a si ah, thla khat a si ah, caan sau deuh zong a si ah, minmei cu puan biaknak inn cung i a um, cu ka i a cam chung cu, Israel mi hna cu an riahhmun ah an cam ko i an i thawh lo; sihmanhsehlaw aa ṭhial tikah annih cu an i thawh tawn.

²³ Bawipa nawlbia in riahhmun an khuar i Bawipa nawlbia in an i thawh tawn; Moses sinin Bawipa nawlbia an hmuh bangin Bawipa bia cu an zulh.