NAMBAR 13 - Lai (Hakha) Common Language Bible 2006

Kanaan Ram Ah Ngiatu Hleihnih An Thlah Hna

¹ Bawipa nih Moses sinah cun,

² “Israel mi ka pekmi hna Kanaan ram va ngiatthlai awkah mi thlah hna; an pa le phun, phun khat cio khan, pakhat cio na thlah hna lai, anmah lak i hruaitu cio an si lai,” tiah a ti.

³ Cucaah Moses nih Paran ramlak khan Bawipa nawl pek bang khan a thlah hna, an dihlak in Israel mi hna an lu kha an si.

⁴ Cun mah hihi an min a si: Reuben phun in, Zakkur fapa Shammua;

⁵ Simeon phun in Hori fapa Shafat;

⁶ Judah phun in Jefunneh fapa Kaleb;

⁷ Issakhar phun in Josef fapa Igal;

⁸ Efraim phun in Nun fapa Hoshea;

⁹ Benjamin phun in Rafu fapa Pali;

¹⁰ Zebulun phun in Sodi fapa Gaddiel;

¹¹ Josef phun in (mah cucu Manasseh phun in) Susi fapa Gaddi;

¹² Dan phun in Gemalli fapa Ammiel;

¹³ Asher phun in Mikhael fapa Sethur;

¹⁴ Naftali phun in Vofsi fapa Nahbi;

¹⁵ Gad phun in Makhi fapa Geuel.

¹⁶ Mah hihi Moses nih ram va ngiatthlai awk i a thlahmi hna min cu an si. Nun fapa Hoshea cu Moses nih Joshua tiah min a sak.

¹⁷ Moses nih Kanaan ram va ngiatthlai awkah cun a thlah hna i annih sinah, “Negeb ah khin hung kal u law, cun tlangram ah nan hung lut lai.

¹⁸ Ram cu zeidah a lawh kha nan hung zoh lai, a chung i a ummi hna cu an ṭhawng maw an der, an tlawm maw an tam,

¹⁹ cun an umnak ram cu a ṭha maw a chia; cun an umnak khua hna cu riahbuk men maw an si kulh ngei dah an si,

²⁰ ram cu a rum maw a pam, a chungah thing an um maw um lo. Cun nan ral ṭha ko u, cuka ram theitlai cu tlawmpal in run phor u,” tiah a ti hna. Cu caan cu mitsur thei a hmin hmasa bik pawl hmin caan a si.

²¹ Cu bangin an hung kal i ram cu an hung ngiat, Zin ramlak in Hamath luhnak Rehob tiang.

²² Negeb ah an hung lut i Hebron kha an phan i cuka ah cun Anak tefa hna Ahiman, Sheshai le Talmai kha an rak um. (Hebron cu Izipt ram i Zoan hlan kum sarih ah rak tlakmi a si.)

²³ Cun Eskhol Nelrawn an phan i cuka ah cun mitsur tlai bor khat a nge in an sah i lang in pahnih nih an put; taleti le theipi zong an rak phorh.

²⁴ Cuka hmun cu Eskhol Nelrawn tiah ti a si, zeitintiah cu ka ah cun Israel mi nih mitsur bor cu an sah hna.

²⁵ Ni sawm li ram an va ngiatthlai hnuah cun an rung kir.

²⁶ Cun Paran ramlak i Kadesh ah cun Moses le Aaron le Israel mibu vialte sinah khan an ra phan i, an sin le zapi vialte sinah bia an rak phorh i cu ram theitlai cu an hmuhsak hna.

²⁷ Cun annih nih amah cu, “Na kan thlahnak ram cu kan va phan; cawhnuk le khuaihliti in a luang i mah hihi a theitlai cu an si.

²⁸ Asinain cuka ram i a ummi hna cu an ṭhawng i an khua hna cu kulhmi an si i an ngan ngaingai; cun cu hleiah Anak tefa hna kha cu ka ah cun kan hmuh hna.

²⁹ Negeb ram ah Amalek mi an um; tlangram ah Hit mi le Jebus mi le Amor mi an um; cun rili pawng le Jordan tiva kam thluahmah ah Kanaan mi an um,” tiah an ti.

³⁰ Sihmanhsehlaw Kaleb nih mizapi cu Moses hmaiah a daihter hna i, “Khulrang in hung kal u sih law, hung umhnawh u sih; zeitintiah ṭha tein kan tei khawh ko lai,” tiah a ti.

³¹ Cu tikah a sin i a kalmi hna nih khan, “Kan do kho hna lai lo, zeitintiah kanmah nakin an ṭhawng deuh,” tiah an ti.

³² Cuticun an hung ngiatthlaimi ram kong cu a ṭhalo lei in Israel mi hna sinah an chim i, “Ngiatthlai awkah kan hung ṭolmi ram cu a chung i a ummi hna a eitu a si; cun cu ram chung i kan hmuhmi hna cu mi ngan pipi an si.

³³ Cuka ah cun Nefilim mi (Nefilim in a chuakmi Anak fapa hna kha) kan hmuh hna i kanmah le kanmah cu khaubawk bantuk ceo ah khin kan i hmu i annih sin zongah cu bantuk cu kan si ko,” tiah an ti.