MATTHAI 8 - Lai (Hakha) Common Language Bible 2006

Jesuh Nih Thinghmuipa A Damter

¹ Jesuh cu tlang cung khan a rung ṭum i mi tampi nih an zulh.

² Cun thinghmuipa pakhat kha a ra i a hmaiah khuk bil in a kun i, “Bawipa, na duh ahcun na ka damter khawh ko,” tiah a ti.

³ Jesuh nih a hei banh i a tongh i, “Ka duh. Thiang ko cang,” tiah a ti. Chikkhatte ah a zawtnak khan a thiang.

⁴ Cun Jesuh nih amah cu a thawh i, “Ka bia ngai, ahohmanh chim hna hlah, sihmanhsehlaw tlangbawi sinah khan ding teomao in va kal law rak in zoh seh. Cun mizapi sinah ka thiang cang, ti langhternak caah Moses nih tuah awk a timi raithawinak kha va tuah,” tiah a ti.

Rom Ralbawi Sinum A Damter

⁵ Jesuh cu Kapernaum khua i a va luh ah khan Rom ralbawi pakhat nih a rak don i,

⁶ “Bawipa, ka sinumpa cu a zaw i inn ah a ril ko, a cawl zong a cawlcang kho lo i a zual ngaingai ko,” tiah a ti.

⁷ Jesuh nih cun, “Ka ra lai i ka damter lai,” tiah a ti.

⁸ Ralbawipa nih cun, “Aa, bawipa, si hlah! Nang ka inn i rat dingah hin kaa tlak lo. Nawl hei pe law ka sinumpa cu a dam ko lai.

⁹ Kei zong ka cunglei bawi nawl tang i a ummi ka si i ka tang zongah ralkap an um ve. Pakhat cu, ‘Kal,’ ka ti i a kal ve ko, cun a dang pakhat cu, ‘Ra,’ ka ti i a ra ve ko; cun ka sal cu, ‘Hihi tuah,’ ka ti i a tuah ve ko,” tiah a leh.

¹⁰ Cu bia cu Jesuh nih a theih tikah a khuaruah a har i a zulmi mizapi hna cu, Hi pa bantukin zumhnak a ngeimi Israel mi hna lakah ahohmanh ka hmu rih hna lo.

¹¹ Hihi va philh hlah u: Nichuahlei le nitlaklei in mi tampi an ra te lai i Vancung Pennak chungah cun rawldanghnak cabuai ah Abraham le Isak le Jakob hna he tiah an ṭhu ṭi lai.

¹² Sihmanhsehlaw Vancung Pennak chung i a um ding a simi hna tu kha cu, khualeng muihnak ah hlonh an si lai i cuka ah cun an ṭap lai i an hacang an rial lai,” tiah a ti.

¹³ Cun Jesuh nih ralbawipa cu a thawh i, “Inn ah va ṭin law na zumhmi cu tuahpiak na si lai,” tiah a ti. Cun ralbawi sal cu, cu caan hrimhrim ah cun a rak dam.

Jesuh Nih Mi Tampi A Damter Hna

¹⁴ Jesuh cu Peter inn ah khan a va kal i Peter nupi nu cu a rak zaw i ihkhun ah khan a rak ril ko.

¹⁵ A kut kha a vun tongh i a taklin cu a dai i a tho i annih kha a bultawl hna.

¹⁶ Zanlei sang a si tikah khuavang ngeimi tampi kha Jesuh sinah cun an ratpi hna. Bia kaa khat in thlarau ṭhalo kha a ṭhawl hna i a zawmi vialte kha a damter hna.

¹⁷ Hi a tuahmi hi, profet Isaiah nih, “Amah hrimhrim nih kan zawtnak kha a phorh i kan dam lonak kha a kalpi,” tiin a rak chimmi tlinternak caah khan a si.

Jesuh Zultu Hna

¹⁸ A pawngkam i a ummi mizapi cu Jesuh nih a hmuh hna tikah, a zultu hna cu rili khattelei ral i rak kal kha a fial hna.

¹⁹ Phungbia cawnpiaktu saya pakhat kha a sinah a ra i, “Saya, na kalnak paoh ah kan zulh lai,” tiah a ti.

²⁰ Jesuh nih cun, “Cenghngia nih kua an ngei i vate cu bu an ngei, sihmanhsehlaw Mi Fapa cu riahnak hmun hmanh a ngei lo,” tiah a leh.

²¹ Amah zultu a simi, midang pakhat nih khan, “Bawipa, va kir ta ning law ka pa kha va vui ta ning,” tiah a ti.

²² Jesuh nih cun, “Ka zul ko, mithi nih an mithi cu rak vui ko hna seh,” tiah a leh.

Jesuh Nih Thlichia A Daihter

²³ Jesuh cu lawng chungah cun a lut i a zultu nih khan an zulh.

²⁴ Chikkhatte ah khin thlichia a hrang ciammam i tilet nih lawng cu a khuh. Sihmanhsehlaw Jesuh cu aa hngilh.

²⁵ A zultu cu a sinah khan an va kal i an ṭhangh i, “Bawipa, kan khamh tuah. Kan thi dih cang lai hi ta,” an ti.

²⁶ Jesuh nih cun, “Zeicahdah cu ti lawmmam cun nan thin a phan? Nan hei ka bochan lo hringhran dah!” tiah a leh hna. Cun a tho i thli le tilet cu nawl a pek hna i dai zirziar tein rili cu a um ṭhan.

²⁷ An dihlak in an khuaruah a har i, “Hi pa hi zei bantuk minung dah a si? Thlichia le tilet hmanh nih dahngai a bia an ngaih ko hi,” an ti.

Jesuh Nih Khuavang Tuahmi Pahnih A Damter Hna

²⁸ Jesuh cu Rili khattelei ral Gadarin mi hna ram kha a va phan i, miruak vuinak lungkua chungin a ra chuakmi mi pahnih nih an rak ton. Hi hna hi an chung i khuachia a ngeimi an si i ṭih an nun tuk hringhran caah cu lam ah cun ahohmanh an kal ngam lo.

²⁹ Hmakhatte ah khin an ai i, “Pathian Fapa, zeidah na kan duhnak a um? A caan a tlin hlanah kannih dantat awkah na ra maw?” tiah an ti.

³⁰ Cuka in aa hlat lem lomi hmun ah khin vok kha an tlong lulhmalh ko.

³¹ Khuachia nih cun Jesuh cu, “Kannih cu na kan chuah ding a si ahcun, vok chung tal ah khin kan luhter,” tiah an nawl.

³² Jesuh nih cun, “Va kal u,” tiah a ti hna i cucaah an chuak i vok chungah cun an lut. Vok cu an run ningpi in lungpang cun an zuang ciammam i rili chungah cun an tla i an thi dih.

³³ Vok zohkhenhtu hna cu khulrang in khua ah cun an va le i cu kong cu le khuachia nih a tuahmi hna kong kha an va chimh hna.

³⁴ Cucaah khua chung mi vialte cu Jesuh ton awkah khan an i thawh i an hmuh tikah, kan ram hin kir ko, tiah an nawl.