MARKA 16 - Lai (Hakha) Common Language Bible 2006

Thawhṭhannak

¹ Sabbath ni kha a dih tikah Mary Magdalin le Jeim nu Mary le Salome nih khan Jesuh ruak thuh awk caah cun zihmui kha an i cawk.

² Zarhpi Ni zingkate, nichuah kate ah khin, thlan ah cun an va kal.

³ Lam ah cun pakhat le pakhat kha. “Thlan khar lung kha ahodah a kan thawnpiak te lai,” tiah an i ceih.

⁴ (A khar cu lung nganpi a si). Cun an hun zoh i lung kha a rak i thawn cang.

⁵ Cucaah thlan chungah cun an lut i puan rang aa aih i orhlei kam i a rak ṭhumi tlangval pakhat an hmuh i an lau ngaingai.

⁶ Cu pa nih cun, “Nan thinphang hlah u. Vailam ah an tahmi Jesuh, Nazareth khua mi kha nan kawl ti kha ka hngalh. Sihmanhsehlaw hika ah hin a um ti lo — a tho cang! An vuinak hmun hi zoh hmanh u.

⁷ Cucaah cun va kal u law a zultu hna kha le Peter kha, ‘Amah nih an chimh hna bantuk te khan nan hlanah Galilee ah a kal i cuka ah cun nan va hmuh lai,’ a ti tiah va chim hna u,” tiah a ti.

⁸ Cucaah an chuak i an thin a phang i an ning a ṭih caah thlan cun an le. An thin a lau tuk caah ahohmanh an chim hna lo. [

MARKA THAWNGṬHA DONGHNAK SAU DEUH Mary Magdalin Sinah A Lang

⁹ Jesuh cu thihnak in a thawh hnuah Zarhpi ni zingkate ah khan Mary Magdalin sinah khan a lang hmasa bik. Cu nu cu a chungin khuachia pasarih a chuahpiakmi nu kha a si.

¹⁰ Mary cu a kal i a hawile kha a chimh hna. An ngaih a chia, an rak ṭap i,

¹¹ Jesuh cu a nung i ka hmuh, tiah a chimh hna tikah khan an zum lo.

Zultu Pahnih Sinah A Lang

¹² Hi hnuah hin zultu pahnih hna cu khuate lei i an kal lioah khan an sinah Jesuh cu a lang.

¹³ An kir i a dang kha an chimh hna, sihmanhsehlaw an zum hna lo.

Zultu Hleikhat Sinah A Lang

¹⁴ A hmanung bik ah Jesuh cu a zultu pahleikhat hna sinah khan rawl an ei lioah a lang. Zumhnak an ngeih lo ruang le a nung in a hmumi hna chimmi kha an zumh khawh lo ruangah a sik hna.

¹⁵ A thawh hna i, “Vawlei cung khuazakip ah va kal u law miphun kip kha thawngṭhabia va chim hna u.

¹⁶ A zum i tipilnak a ingmi paoh nih khamhnak an hmuh lai, a zum lomi paoh nih sual phawtnak an hmuh lai.

¹⁷ A zummi pawl cu hi ṭhawnnak hmelchuhnak hi pek an si lai: ka min in khuachia an ṭhawl khawh hna lai, holh theih loin an holh lai,

¹⁸ rul kha an tlaih hna i sivai an din zongah zeiti hmanh in an um lai lo; mizaw cungah an kut an chuan lai i an dam lai,” tiah a ti.

Van Ah A Kai

¹⁹ Jesuh nih bia a ruah dih hna cun vancung ah a kai i Pathian orhlei kamah khan a hung ṭhu.

²⁰ A zultu kha khuazakip ah an kal i thawngṭhabia kha an chim; Pathian nih an sinin rian a ṭuan i an phungchimmi kha ahmaan, tiah ṭhawnnak hmelchunhnak a pekmi hna thawngin a langhter.] [9 Nu hna kha Peter le a hawile sinah khan an va kal i vancungmi nih a rak chimhmi hna kha a tawinak in an chimh hna. 10 Cu hnuah cun Jesuh hrimhrim nih, nichuahlei in nitlaklei tiang, zungzal a hmunmi khamhnak kong bia nung le bia thiang cu a zultu hna thawng khan a thanh.]