LUKA 9 - Lai (Hakha) Common Language Bible 2006

Lamkal Hleihnih A Thlah Hna

¹ Jesuh nih pahleihnih hna kha hmunkhat ah a auh hna i khuachia ṭhawl khawhnak le zawtnak damter khawhnak ṭhawnnak le nawlngeihnak kha a pek hna.

² Cun Pathian Pennak kong chim awk le mizaw damter awkah a thlah hna.

³ Annih cu a thawh hna i, “Atu khual nan tlawn lainak ding caah hin zeihmanh i phorh hlah u: ṭhiangṭhunh siseh, zal siseh, riahcaw siseh, tangka siseh, angki khethuan siseh, zeihmanh i phorh hlah u.

⁴ Tluninn an in onh hnanak inn paoh ah, cu khua in nan chuah hlan tiang va um ko u;

⁵ tluninn an in onh duh hna lonak khua paoh cu, nannih nih va kaltak ko u law annih kha ralrinnak peknak caah nan ke beh leidip kha va khawnhnawh hna u,” tiah a ti.

⁶ Zultu hna cu an i thawh i khua kip kha an tlawng i hmun kip ah Thawngṭha kha an chim i a zawmi kha an damter hna.

Herod A Lung Aa Tuai

⁷ Galilee ram a uktu Herod nih khan hi bantukin thil a ummi vialte kha a theih ve; hi kong ah hin a lung aa tuai ngaingai, zeicahtiah mi a cheu nih, “Tipil petu Johan kha a nung ṭhan,” an ti.

⁸ Midang nih, Elijah kha a hung lang cang, an ti i a dang nih hlan lio pi i a rak ummi profet pakhatkhat a hung nung ṭhan, an ti.

⁹ Herod nih cun, “Johan cu a lu ka tanter ṭung hna, a thawng ka theih lengmangmi mipa hi ahodah a si kun?” tiah a ti. Cun Jesuh hmuh ding kha heh tiah aa zuam lengmang.

Mi Thong Nga Rawl A Pek Hna

¹⁰ Lamkaltu hna cu an ra tlung i an tuahmi vialte kha Jesuh cu an chimh dih. A sinah aa kalpi hna i anmah lawng tein Bethsaida timi khua ah khan an kal.

¹¹ Cu thawng cu mizapi nih khan an theih tikah an zulh. A rak lawmh hna i Pathian Pennak kong kha a rak chimh hna i damnak a herhmi kha a damter hna.

¹² Nitlak aa timh tikah khin pahleihnih kha a sinah cun an ra i, “Mizapi hi kalter hna law hika hrawng khua hna le lo hna ah hin rawl le riahnak kawl awkah kal hna seh, zeicahtiah kan umnak hmun hi mi um lonak hmun a si ṭung,” an ti.

¹³ Sihmanhsehlaw Jesuh nih a rak thawh hna i, “Nanmah nih ta ei awk cu nan pek ko hna,” tiah a ti. Annih nih, “Kan ngeihmi cu dihlak ah changreu hlum nga le nga pahnih pei a si ko cu. Mizapi caah hin rawl cawk fial maw na kan duh?” an ti.

¹⁴ (Cuka i a ummi cu upa thong nga hrawng an si). Jesuh nih a zultu hna cu, “Mi kha sawm nga hrawng duahmah in a bu a bu in ṭhutter hna u,” tiah a ti hna.

¹⁵ Cu bantuk cun a zultu hna nih cun an tuah i an dihlak in an ṭhutter hna.

¹⁶ Jesuh nih changreu hlum nga le nga pahnih cu a lak hna i van lei a zoh i Pathian kha a lawmh hnuah a cheu hna i mizapi phawt awkah khan a zultu kha a pek hna.

¹⁷ An dihlak in an ei i an khim dih; an nganhmi cu a zultu hna nih khan an khawmh hna i bawm hleihnih khat a si.

Peter Nih Jesuh Kong A Chimnak

¹⁸ Voi khat cu Jesuh kha amah lawng tein thla a cam lioah a zultu hna kha a sinah an ra i, “Mi nih aho a si an ka ti dah?” tiah a hal hna.

¹⁹ “A cheu nih Tipilpetu Johan a si, an in ti. Cun a dang nih, Elijah a si, an in ti. Cun a dang nih hlanlio i a rak ummi profet pakhatkhat kha a nung ṭhan, an in ti,” tiah an ti.

²⁰ Cun annih cu a thawh hna i, “Nannih tah zeitin? Nannih nih tah aho a si nan ka ti dah?” tiah a hal hna. Peter nih a vun leh i, “Nangmah cu Pathian Messiah na si,” tiah a ti.

A Innak Ding le A Thihnak Ding Kong A Chim

²¹ Cun Jesuh nih ka kong cu ahohmanh nan chim hna lai lo tiah fek tein a ti hna i,

²² “Mi Fapa nih hin temhinnak tampi ka in hrimhrim lai; upa hna le tlangbawi upa hna le Phungbia cawnpiaktu saya hna nih an ka hlawt lai. An ka thah lai i ni thumnak ni ah thawhter ka si ṭhan lai,” tiah a chimh hna.

²³ Cun annih cu an dihlak in a thawh hna i: “Ahohmanh nih zulh nan ka duh ahcun mah zawnruahnak kha nan ngol lai i ni fa tein nan vailam kha nan i put lai i nan ka zulh lai.

²⁴ Zeicahtiah mah himnak lawng a ruatmi cu a nunnak kha a sung lai sihmanhsehlaw keimah ruangah a nunnak a sungmi cu khamhnak kha a hmu lai.

²⁵ Mi pakhatkhat nih vawlei hi a dihlak in co seh law amah cu lotlau ṭung seh law, asiloah rawkral ṭung seh law, zeital a miak hnga maw? Miak hlah.

²⁶ Ahohmanh keimah le ka cawnpiaknak kha a kan zahpimi cu, Mi Fapa nih ka sunparnak le ka Pa le a thiangmi vancungmi hna sunparnak he ka rat tikah, ka zahpi ve hna lai.

²⁷ Cun nannih nih hika ah hin, Pathian Pennak an hmuh hlan tiang a thi lo dingmi an um tiah kan chimhmi hna hi i cinken u,” tiah a ti.

Jesuh Muihmai Thlennak

²⁸ Hi bia a chim hnu zarh khat tluk ah Jesuh nih Peter le Johan le Jeim kha thlacam awkah tlang ah aa kaipi hna.

²⁹ Thla a cam lioah khan a hmai cu aa thleng i a hnipuan cu rang cercur in an um.

³⁰ Chikkhatte ah khan mi pahnih nih bia an hung ruah. Annih cu Moses le Elijah kha an si.

³¹ Vancung sunparnak in an i thuam i Jerusalem khua i a thihnak thawng in Pathian nih a timhmi a tlinter lainak kong kha Jesuh he cun an i ruah.

³² Peter le a hawile hna cu thu hluahmah in an rak i hngilh, sihmanhsehlaw an hun i hlau i Jesuh sunparnak le a sinah a dirmi pahnih kha an hmuh hna.

³³ Mi nih khan Jesuh cu an kaltak lioah khin Peter nih a thawh i, “Saya, hika i kan um hi thil ṭha a si. Deu pathum in kan sak lai, pakhat nangmah caah, pakhat Moses caah, pakhat Elijah caah,” tiah a ti. (Ka chimmi hi zei a si ti a hngal ngaingai lo).

³⁴ Bia a chim lengmang lioah cun minmei a hung kai i a hun zelh hna, cun a zultu hna cu an ning a ṭi.

³⁵ Minmei chung cun aw pakhat nih, “Amah hi ka thimmi ka Fapa a si, a bia kha ngai u,” tiah a run chim.

³⁶ Aw kha a daih tikah Jesuh cu amah lawng tein a um ko kha an hmuh. Dai tein an um i an hmuhmi kha ahohmanh an chim hna lo.

Thlarau Ṭhalo A Ngeimi Ngakchiapa A Damter

³⁷ A thaizing ah tlang cung cun an vung ṭum i mi tampi nih Jesuh cu an rak ton.

³⁸ Mizapi lak cun mipa pakhat a hung au i, “Saya, ka fapa hi ka zohpiak hmanh, amah lawnglawng hi fa ka ngeihmi a si.

³⁹ Thlarau nih a luhhnawh ciammam tawn i a au a khuang i a ther thluahmah i a buanbara zong a tawh dih tawn; atu le atu cuticun a tuah i a kal in a kaltak duh lo.

⁴⁰ Na zultu hna kha, hung ka ṭhawlpiak ko sawh u, tiah ka nawl hna i sihmanhsehlaw an ṭhawl kho fawn lo,” tiah a ti.

⁴¹ Jesuh nih cun a leh i, “Nan hei zum loin nan hei palh thiam dah. Zei can riamruam hen kan umpi hna a herh lai? Zei can dah kan in hna lai?” tiah a ti. Cun mipa cu aa thawh i, “Hika ah hin na fapa cu ratpi tuah,” tiah a ti.

⁴² Ngakchiapa cu a rat lioah khan khuachia nih cun vawlei ah a thluk ciammam i i let cukmak in a tuah. Jesuh nih thlarau ṭhalo cu a sik i ngakchiapa cu a damter i a pa sinah khan a pek ṭhan.

⁴³ Pathian ṭhawnnak kha an hmuh tikah mi vialte cu an khuaruah a har dih. Jesuh nih a tuahmi thil kong ah mi hna cu khuaruah har in an um ko lioah khan a zultu hna cu a thawh hna i,

Jesuh Nih A Thihnak Kong A Chim Ṭhan

⁴⁴ “Kan chimh dingmi hna hi philh hlah u. Mi Fapa hi minung ṭhawnnak ah chanh a si lai,” tiah a ti.

⁴⁵ Sihmanhsehlaw cucu a sullam zeidah a si ti kha an hngal lo. An hngalh nakhnga lo thuhkanh an si i cu kong cu amah hal kha an ngamh fawn lo.

Ahodah A Ngan Bik

⁴⁶ A zultu hna lakah cun bia alnak pakhat a hung chuak i cucu an lakah ahodah a ngan bik ti kha a si.

⁴⁷ Jesuh nih an ruahnak kha a hngalh i cucaah ngakchiate pakhat kha a lak i a pawngah a dirter i

⁴⁸ annih cu, “Ka min in hi ngakchiate tluninn a onhtu nih keimah tluninn a ka onh a si, cun keimah tluninn a ka onhtu nih keimah a ka thlahtu tluninn a onh kha a si. Zeicahtiah nan lak i a hme bikmi cu a ngan bikmi a si,” tiah a ti.

An Dotu Hna A Si Lomi Cu An Bawmtu Hna A Si

⁴⁹ Johan nih a hun i thawh i, “Saya, nangmah min in khuachia a ṭhawlmipa pakhat kan hmuh i kanmah bu chungmi a si lo caah kan thlauh,” tiah a ti.

⁵⁰ Jesuh nih a thawh i, “Thlauh hna hlah u, zeicahtiah an dotu hna a si lomi paoh cu an bawmtu hna an si,” tiah a ti.

Samaria Mi Hna Khua Pakhat Nih Jesuh An Donh

⁵¹ Jesuh cu vancung i laknak caan kha a nai cuahmah tikah a lung aa thlek i Jerusalem khua lei kal awkah khan aa thawh.

⁵² A hmaiah khan lamkal a thlah hna i cu hna cu an rak kal i Samaria mi hna khua pakhat ah khan zeizong vialte rak timh chung awkah an rak lut.

⁵³ Sihmanhsehlaw Jerusalem i a kal lai kha a fian ko caah cuka khuami hna nih cun tluninn kha onh an rak duh lo.

⁵⁴ Cu thil cu a zultu hna Jeim le Johan nih khan an hmuh tikah, “Bawipa, hi mi hna hrawhnak ding caah hin vancung in mei au u tiah na kan duh maw?” an ti.

⁵⁵ Jesuh cu aa mer i a sik hna i

⁵⁶ khua dang ah khan an lan.

Jesuh Zulh A Duhmipa

⁵⁷ Annih nih an kal lengmang lioah khan pakhatpa nih a thawh i, “Na kalnak paoh ah kan zulh lai,” tiah a ti.

⁵⁸ Jesuh nih cun, “Cenghngia nih kua an ngei i vate nih bu an ngei, sihmanhsehlaw Mi Fapa cu riahnak hmun hmanh ka ngei lo,” tiah a ti.

⁵⁹ A dang pakhat tu cu a thawh i, “Ka zul,” tiah a ti. Sihmanhsehlaw cu pa nih cun, “Bawipa, ka pa kha va vui ta ning,” a ti.

⁶⁰ Jesuh nih cun a leh i, “Mithi nih an mithi kha va vui ko hna seh. Nang tu cu va kal law Pathian Pennak kong kha va chim ko,” tiah a ti.

⁶¹ A dang pakhat nih a thawh ve i, “Bawipa kan zulh lai, sihmanhsehlaw ka chungle kha dam tein, va ti ta hna ning,” tiah a ti.

⁶² Jesuh nih a leh i, “Ahohmanh leithuan aa ot i hnulei a zoh peng ṭungmi cu Pathian Pennak caah santlaihnak a ngei lo,” tiah a ti.