LUKA 4 - Lai (Hakha) Common Language Bible 2006

Jesuh Tukforh Innak

¹ Jesuh cu Thiang Thlarau he khat in Jordan tiva khan a ra kir i Thlarau nih ramcar chungah khan a kalpi.

² Khika ah Khuachia nih ni sawm li chung a rak tukforh. Cu chung vialte cu rawl a ei lo caah cu caan a dih tikah a rawl a ṭam ngaingai.

³ Khuachia nih cun a thawh i, “Nangmah cu Pathian Fapa na si ahcun, hi lung hi changreu ah i cang tiah ti tuah ngat,” tiah a ti.

⁴ Jesuh nih cun a leh i, “Cathiang nih pei, ‘Minung nunnak hi rawl lawngin a si lo,’ a ti cu,” tiah a ti.

⁵ Cun Khuachia nih cun a hun kaipi i chikkhatte ah khin vawleicung ram vialte kha a hmuhsak dih.

⁶ Khuachia nih cun a thawh i, “Hi lianhngannak vialte le hi chawva vialte hi kan pek lai. A dihlak hin keimah pek ka si cang i ka duhmi paoh ka pek khawh hna.

⁷ Cucaah ka hmaiah na khuk i bil law hi vialte hi na ta an si dih ko lai,” tiah a ti.

⁸ Jesuh nih, “Cathiang nih pei, ‘Bawipa na Pathian cu na biak lai i amah rian lawng kha na ṭuan lai,’ a ti cu,” tiah a leh.

⁹ Cun Khuachia nih cun Jerusalem ah khan a kalpi i Biakinn parpahlek ah khan a ṭhutter. Cun a thawh i, “Nangmah cu Pathian Fapa na si ahcun hika hin vung zuang tuah ngat.

¹⁰ Zeicahtiah Cathiang nih pei, ‘Pathian nih nangmah kha ṭha tein zoh khenh awkah a vancungmi kha a fial hna lai,’ tiah a ti kha.

¹¹ Cu pinah, ‘An kut in an in cawi lai i lung ah na ke hmanh an i khawng lai lo,’ tiah a ti fawn,” tiah a ti.

¹² Jesuh nih aa thawh i, “Cathiang nih pei, ‘Bawipa na Pathian cu va hneksak hlah,’ a ti ve kha,” tiah a leh.

¹³ Khuachia nih Jesuh cu a phunphun in a tukforh dih hnuah caan tlawmpal chung cu a kaltak.

Jesuh Nih Galilee Ah Rianṭuan Aa Thawk

¹⁴ Cun Jesuh cu Galilee ah khan a ra kir i Thiang Thlarau cu a sinah khan a um. Cuka hrawng vialte cu amah kong kha a thang dih.

¹⁵ An i pumhnak inn ah khan a cawnpiak hna i a mi kip nih an thangṭhat.

Jesuh Cu Nazareth Khua Ah An Rak Hlawt

¹⁶ Jesuh cu a rak tlonlennak Nazareth khua ah khan a va kal i Sabbath ni ah cun hmasa i a rak tuah tawn bantuk khan pumhnak inn ah a kal. Cathiang rel awkah khan a hung dir i

¹⁷ profet Isaiah cazual kha an pek. Cazual cu a vun samh i,

¹⁸ “Bawipa Thlarau cu ka cungah a um. Sifakmi hna sin i Thawngṭha chim awkah chiti a ka thuh i Saltangmi hna sin i luatnak thanh awkah a ka thlah. Mitcaw mi hna sin i khuahmuh ṭhannak pek awk le Hremmi hna luatter dingah a ka thlah,

¹⁹ Bawipa nih a mi hna a khamh hna lai ding kum cu va thanh awkah a ka thlah!” tiah aa ṭialnak hmun kha a rel.

²⁰ Jesuh nih cazual cu a zual ṭhan i a zohkhenhtu kha a pek ṭhan i a ṭhu. Pumhnak inn i a ummi vialte nih amah cu ṭhep loin an zoh dih.

²¹ Annih cu a thawh hna i, “Hika Cathiang cang hi, nannih nih ka rel tikah nan theih bantukin nihin ni ah hin a tling cang,” tiah a ti.

²² An lung a hmuh ngaingai hna i bia dawhdawh a chimmi nih khan an khuaruah a harter dih hna. An i thawh i, “Amah hi Josef fapa kha a si lo hlah i?” an ti.

²³ Cun anih nih a thawh hna i, “ ‘Sibawipa, nangmah le nangmah i damter,’ timi phungthlukbia kha nan ka chimhnawh te lai, tiah fiang tein ka hngalh ko. Cun nan i thawh fawn lai i, ‘Kapernaum khua ah na tuah tiah kan theihmi thil cu na chuahkehnak khua zongah hin tuah ve hna,’ ti zongah nan ka ti fawn lai.

²⁴ Cucaah hihi kan chimh hna: Profet cu amah chuahkehnak khua ah cun conglawmh a tong bal lo.

²⁵ Cucaah ka bia hi ngai hmanh u. Elijah chan i kum thum le a cheu khua a khen i Israel ram chung dihlak ah pam a tlun ah khan, cu ram chungah nuhmei tampi an rak um taktak ko,

²⁶ sihmanhsehlaw cu hna sinah cun Elijah kha thlah si loin Sidon ram Zarefath khua nuhmei sin tu ah khan thlah a si deuh.

²⁷ Profet Elisha chan ah Israel ram ah thinghmuimi tampi an rak um ko, sihmanhsehlaw Siria mi Naaman dah ti lo cu ahohmanh damtermi an um lo,” tiah a ti.

²⁸ Hi bia an theih tikah pumhnak inn chung i a ummi vialte cu an thin a hung dih.

²⁹ An tho i Jesuh cu khualeng ah an hnuh i lungpang cungin thlak awkah, khua a ṭhutnak tlang a par ah khan an kalpi.

³⁰ Sihmanhsehlaw zapi lak khan aa zuk i a lan.

Thlarau Ṭhalo A Ngeimipa

³¹ Cun Jesuh cu Galilee ram i khua pakhat, Kapernaum khua ah khan a kal i khika ah sabbath ni ah khan a cawnpiak hna.

³² A cawnpiakning hna kha an khuaruah a har, zeicahtiah a bia cu hmual a ngei ngaingai.

³³ Cuka pumhnak inn ah cun khuachia thlarau a ngeimi pa pakhat a rak um; fak piin a au i,

³⁴ “Nazareth khuami Jesuh, zeidah na kan duhnak a si? Kanmah hrawh awkah maw hika ah hin na rat? Nangmah cu aho na si kha kan hngalh ko — Pathian lamkaltu a thiangmi na si ko,” tiah a ti.

³⁵ Jesuh nih thlarau cu, “Dai tein um law, mipa chung khan chuak,” tiah a ti. Khuachia nih cun mipa cu an dihlak hmaika ah khan a thluk i a cungah zeihmanh ṭhat lonak tuah loin a kaltak.

³⁶ An dihlak in an khuaruah a har i pakhat le pakhat cu, “Hi bia hi zei bantuk bia dah a si? Hi mipa nih hin nawlngeihnak le ṭhawnnak in thlarau ṭhalo kha nawl a pek hna i an chuak ko,” tiah an i ti.

³⁷ Cun Jesuh kong cu cu ram chung khuazakip ah khan a thang.

Mi Tampi A Damter Hna

³⁸ Jesuh cu pumhnak inn khan a chuak i Simon inn ah a kal. Simon nupi nu cu a rak zaw i a tak a lin ngaingai i cu kong cu Jesuh kha an chimh.

³⁹ Jesuh cu a va kal i a ihkhun pawngah khan a dir i a zawtnak cu a sik. A taklin nih cun a thlah i chikkhatte ah a tho i a bultawl hna.

⁴⁰ Ni tlak hnuah, mizaw a ngeimi paoh nih khan, zawtnak a phunphun in a zawmi an mizaw hna kha Jesuh sinah cun an ratpi hna; an lu cungah khan a kut a chuan diahmah i an dihlak in a damter hna.

⁴¹ Mi tampi chungin khuachia zong kha an chuak i an chuahpah ah cun, “Nangmah cu Pathian Fapa na si,” tiah an au. Sihmanhsehlaw annih cu a sik hna i holh a thlauh hna, zeicahtiah Messiah a si kha an hngalh.

Judea Ram Ah Phung A Chim

⁴² Khuadei kate ah Jesuh cu khuachung khan a chuak i hmunking ah a kal. Sihmanhsehlaw mizapi nih khan an kawl i a umnak an va phak tikah khan, kan kaltak ti hlah, tiah an hnek.

⁴³ Sihmanhsehlaw a thawh hna i, “Pathian Pennak kong Thawngṭha kha khua dang zongah ka chim hrimhrim awk a si, cu chim ah cun pei Pathian nih a ka thlah cu,” tiah a ti.

⁴⁴ Cucaah Judea ram chung i pumhnak inn hna ah khan Thawngṭha cu a chim hna.